الله يلعنك ياابليس ....... ممنوع دخول القراوه (جمال,دايم)الابعد الفحص الشامل ..
 

يالمنشق...يالمنشق وثول !! .. المنشق ينطل المصقال أبو طقة اللي في يدة .. لبيه يمه .. قم قامت عصبك وتحنت ركبك أنت وأخوانك إفرشوا مراقدنا في السطح عشان يمديها تبرد قبل لا يجي أبوكم .. إنشاء الله يميمتي ..
موسيقى تصويرية بنغمة الطبول وصوت القدور مع كم برميل منطول من فوق جبل .. وتشرق الشمس ويلازمها شعاع قوي يكشح في خشتك مره ويختفي معلناً بداية الغروب ، يظهر بعدها صوت شيطاني قادم من بعيد .. تتلاشى أصوات الموسيقى تدريجياً على صجة عصافير السدر ..ونقاشات عقيمة عن هلال ونصر .. وبقايا غبار بزران الحارة عقب أشواط حامية من سبع الحجر وعظيم ساري !! فتبدأ شخمطة الفلم :

مدينة الرياض .. 1395 هـ قصة واقعية === مطلوب زيقارة بدون ريحة !!
بطولة => المنشق وإخوانه والدكتور حمدي وإبليس تفوووووو عليه.
إنتاج=> منتدى الخيام بالتعاون مع إدارة مكافحة التدخين فرع – شلقة -
مكياج => ساميه51.. إخراج=> جمال( يالله ياكريم إنك تعمي ظفره عن الحذف).. ترجمة => أنيس عبيد !!!!!! القاهرة .( ودي أدري هذا ما بعد مات !!؟)

المنشق يرجم أخوه ابراهيم ..(مالقى أخوه الثاني ) وتل معه إذن هدلق ولد جيرانهم .. يله .. تقول لكم أمي روحوا إفرشوا المراقد في السطح .. ولا تنسون تحطون مرقدي بعيد عن مرقد سلوم .. قبله يتدربى علي !! المنشق راح يكمل لعب المصاقيل .. وعلى وشك بأن يكسب أول مصقال مائي !!

إنتصف المغرب .. وملامح أبوي جاي من سوق أوشيقر !! الهجيج ياولد .. فضت الحارة في ظرف ثواني ..مع حصيلة لا بأس بها من الفلقات ..
المنشق راح يتسدح على فرش أخوانه يستمتع ببرادهن وإبن أمه يقول له شي !! ولا يفكر يقرب لم فراشه ، وإنسدح على بطنه وأخوانه من حوله يكتبون على ظهره ( والله ياهي ونااااااااااسه .. متى أعرس عشان أخلي حرمتي تشخمط على ظهري بظفرها ) ؟

بدأ يتقلب ويتفكر في هالنجوم اللي خلق ربي ، وكلام جدته ، إنا مانعدها عشان ما يطلع في يدينا ثواليل !! لحظات أخرى من التفكير وتثاؤب شيطاني ومسكة شطط .. المنشق مشتهي زقارة !! وبديت أتهاوش أنا ونفسي على هالمسكة اللي ما تجي إلا لواحد توه شارب سطل توت عقب ما طلع موتره من تغريزة ثلاث ساعات !! وشوي والا ألقى دحيم ( إبليس ) الله يلعنه مغطي السماء بلوحة مكتوب عليها ( إلحق على المستوصف قبل لا ينتهي الدوام ) وقعدت أهوجس وش علاقة المستوصف بالزقاره ؟ وما أمداني أكمل هوجاسي إلا ويرد علي بلوحة ثانية ( الدكتور حمدي المصري التتان !!) معقولة بقول له يعطيني تتنه !؟ كان ذا المصري يخق لأبوي ويذبحني ولا يفكني منه ولا حتى العسة !! رجع لي بلوحة ثالثة ( رح وتتدبر ) >> إسلوب بسيط .. مجرد تذكير بمواقع الفجور .. تخلي ذهنك حولها يدور .. وكان هذاك الوقت إبليس بنفسه يقوم بالمهمه .. لكن اليوم !! ألف إبليس وإبليس عايشين بينا من جلدتنا متسفينه العنوه !! .

وأنا اللي أتل نفسي من البيت زي الشعره من شمغ بعض المتزوجين .. وأروح للمستوصف .. وأثاري إبليس قد سبقني للمستوصف قاعد يقنع الدكتور حمدي ياخذ زقاره عند الباب !! وصلت وتسندت على ظهري قبال المستوصف وإلا هذا حمدي طالع وصاكه راسه خرمان .. قعدت شوي وأتحرى هالمصري يذب هالزقاره .. ماش أبطأعلي ((وإستوعب فكري درس جديد وهو بأن حتى إبليس ما يقدر يجبر الناس !! على التخلي عن بعض قناعاتهم أياً كانت !! )) .. ولا وش اللي خلا المصري يتأخر ما يرمي الزقاره وبليس بنفسه عاني لهالغرض ؟ المهم ذبها الدكتور ووطاها جعل راسه الوطي .. ما يكفي إنك ما بقيت ولا حتى القطف .. وعرفت إنه قفى يوم إنعمت عيوني من صلعته !! وكني أشوف الزقاره من بعيد فيها شوية حمره .. لحقت عليها .. توني أبتأمل هالصونة اللي في يدي ولا إبليس ينغزني .. عجل شهيق شهيق ( طبعاً مشغول يابن الكلفس .. تبي تلحق على حقين الشيح !!؟!!)حطيتها في إثمي ولا أمداني حتى أكمل حرفين " شهـ " ونااللي أدوخ ويصفق راسي في عمود الكهرب .. ومن قوة الضربة أظلمت الدنيا زود .. أحد أمرين يا نور العمود طفى ولا معاد صرت أشوف !! ومن حر ما أوجس صرت أقول " زفير زفير زفير " يا ملعون الوالدين يا بليس . إستجمعت قواي ورجعت للبيت بمساندة الجدران ونا مغمض ورقيت للسطح كني ناسي بعضي مثل واحد يطلع علك من رجله عقب ما وطاه في عز الشمس !!

والاقي أخواني توهم يلعبون في فرشهم وجيت ونطلت روحي على فراش براهيم بلحق على براده ، عقب ما رجفته بحكم قربه لنفسي !! وشوي إلا ويقول لي ريحتك مخيسة !!؟.. " هه ..ياوالله النشبة " قلت له إيه صح رحت للثلاجة ولقيت عسل مخيس ناسينه أهلي وكلته .. وتراني كبيته عشان ما تاكلون منه !! وتصدق يا براهيم إنك أنت أزبط أخواني ودايم ودي تصير في فرقتي !! ما ودك تنام في فراشي تراه بارد هو لك .....

يمه يمه ؟؟ وين أبوي ..وش تبي به؟ أخوي المنشق ريحته ريحة مصري ؟؟
وشو !! يابو المنشق !!؟ إلحق على ولدك المنشق ريحته مصري ؟ كمل أبوي الناقص من الدوخة بكم كف .. وش أنت مزين يالهيس الأربد بروحك ؟ أبد والله يبه ذا المصري الدكتور قعد يقول لي إذا بتصير دكتور مثلي لازم تشرب تتن .. ونمت من دوخة الزقاره والكفوف والصياح .. حسبي الله عليك يا بريه ..ولمحت أبوي لابس ثوبه ونعاله المنطوله جنب فراشه .. وبعدهاإختفى الدكتور عن الأنظار .....حتى تاريخه ؟ وين ظنكم راح له .. سؤال بريء ؟؟
..........................
..........................
..........................
مع السلامة جميعاااااااااااا
..........................
..........................
..........................
اشوفكم على خير انشاءالله
..........................
..........................
..........................

عزيزي المنشق

السلام عليكم ورحمة الله وبركاته

قصة رائعة .. اسلوب مشوق .... براد المراقد لها لذة في السطح.. على فكرةأنا خابر لك وحدة تحك ظهرك بشيء انعم من اظافرها ؟

لكن السؤال .... اللي ... يتكسمر ... ويحطم نفسه ....

دايم اش جابه عنكم على فراش اخوك براهيم بعد صكة عامود الكهرباء ... لا يكون هو اللي صكك وأنت ما تدري .تحسبه العامود..؟؟؟

شكرا لك على هالقصة الحلوة جداااا بالحيلللللل حلوة !!!

ابو عاصم
هو ماقصدة دايمنا اللي في الخيمة
لالالالالالالا
قصده انه دايم يبي اخوه براهيم يكون في فرقته
عاشقة سراب
شريرة 7

ابو عاصم ... الحين فهمت من كلامك انك معجب من الكلام .. طيب اللي مافهمته انا .. بما انك معجب من السالفه .. وراك حاط عند اسمك ايد مقلوبه ؟؟؟؟؟؟؟؟؟؟؟؟؟؟؟؟؟؟؟...
..........................

عاشقة سراب .. شكرا للترجمه ..

السلام عليكم ياشباب
أخوي المنشق ياخي لية تسوي فينا كذى حرام عليك تذكرني بالذي قد مضى أيام الحواري وأيام الشباب الزقرتية اللي يحبهم قلبك وقلب المتصفحين الكرام والأيام الخوالي ترى الله العالم إنك هاه هاه هاه من سواليفك تحكي بعض الأحياء القديمة منفوحة ،الشميسي، الطرادية، العود ، معكال ، مقيبرة ، والأرجح منفوحة أرجو التوضيح ياصديق الحارة أقصد ياصديق الخيمة
المعلم

السلام عليكم

شكرا يا أختي يا عاشقة سراب ... آه .... آه ... اثر ههاذااا قصده ...!!!

وأنا راح بالي بعيد ... قلت يمكن دايمنا كفخه ... لأنه يتتن مع التختور!!! ويماشي سرابيت !!! وما أولومه يمكن قاعد يحلم في المنام ... معه حق ...

لا تزعل يا المنشق ... تراني (اتغشمر وإياك )(امزخ معك) **

بعدين أنا محتج عليك .... تعرف ليشششش انزل تحت وأنا اتفاهم معك بعيد عن الضوضاء %%%%
.
.
.
.
.
.
.
.


صح بتقول طلعي هذا ...... بتفلسف علينا ... موهك ؟؟؟

اصبر شوي ... لحظة ... وأنت تفهمني يا المنشق ....

.
.
.
.
.
.
.
.
.
.


.
.
.
.


ليش :تقول هـــلال ونصر ليش ما تقول .. السالمية والقادسية ؟؟؟؟

وإلا تحسب جماهيرك بس عنكم في اوشيقر ... وإلا في الحارة مفنوحة مدري مفححوحة تاك محبوب وايد ... عندنا ... بالملتئم ...

اسمح لي أنا اناديك بالملتئم ... لأن (المنشق) عيارة واحد عندنا ... ولو درى .. أني أقول المنشق راح يزعل ... وأنت تعرف زعل المنشقين .... وايد ينفعلون ...وأنا أخاف اتكفخ مثلك !!

أنا يا المنشق أنا معجب بك .. وبهالقصة الحلوة

أما اليد المقلوبة ما دري والله وش القصد من قلبها .. أنا كنت أضع يد غير مقلوبة ... بعدين قلت الربع يملون ... اغير أحسن ..

والله ... والله ... ما لي قصد بها اللللقلبة ... !! تصدق .. وإلا ابخبط براسك عامود ثاني ... احلف لك ... وأنت ما تصدق!!(امزح وإياك ) لا تصدق وتكسر أعمدة الكهرباء ... تهاك هاوي تكسير ..

محبك : أبو عاصم

رائع يالمنشق قصه جميله جداً ومعبره وعلى فكره كنت ادخن
والحمدلله الذي رزقني بنعمت تركه ولي الآن ما يقارب الأربع شهور
اشكرك اخي المنشق على إيضاح أضرار التدخين ليتجنبه كل الذي
يخاف الله ويخاف على نفسه...سلامي لكah احمد

لا يالخبل..انت مارحت للمصحة الى الحين..كخخخخخخخخ
بعدين مالك ومال الدخان..اتركه عنك وتراهم يمدحوووون المعسل..هههههههه
تحياتي DAYEM.

ههههههههههههههههههههههه
ضحكتني و الله00
قصه حلوه00
بس بعد كل ياللي صار00
وكل هالطق00
متى قمت من فراشك؟؟
اكيد عالأقل0
بقيت شهرين في الفراش00
كخخخخخخخخخخخخخخ0
استمر 00
انتظر المزيد00
دلوعه الميته من الضحك00

السلام عليكم ورحمة الله وبركاته ....

صدقت يا أحمد هي قصة حلوة وايد لكن حبيبنا المنشق ( شسوي أنت ما وافقت على تغيير الاسم) مومصدق إنها حلوة ... ومفيدة .

وصدقتي يا دلوعة ...في كلامك ...

والله أنا خايف عليه لا يكون باقي في المصحة ...‍‍‍‍‍‍ ويفكر في دايم.. اشوفه على لسانه‍‍‍‍‍‍‍... ويحلم فيه وفي الدكتور اللي في المصحة ..ومن شدة الخوف قام يكمخ في أعمدة الكراسي والاسرة ... ومن شدة الفيروس .... يحسبها عامود كهرباء ....

يا اخوان ما فيكم أحد عنده عنوان المصحة نطمن عليه .. ونعرف شالسالفة ؟؟؟؟؟؟

برظده .... لا تزعل يا منشقنا .... وإلا تري ..... لالالالالالالا

اخوك/ أبو عاصم