اعلان التحدي للمنتخب الايراني .............فلاش
 

أخوي دايم مو ملاحظ انك ماخذ مقلب بمنتخبك
:D :D :D

يحق له دام منتخبه وصل هالمواصيل

مب زي منتخبكم اللي طلعه من الدور الأول منتخب (البـ . . ي .) أكيد تعرف الحروف الباقية صح؟

[ 02-10-2001: المشاركة عدلت بواسطة: ريفالدو ]

عزيزي رفالدو
شلون عرفت اني كويتي ؟؟؟ ;)
ماشاء الله عليك ساحر :p
على العموم تطلع من الدور الأول تطلع من الدور الثاني لا فرق كل الطرق تؤدي الى روما
:D :D :D

لا تغلط على روما عاد

الظاهر قصدك كل الطرق تؤدي الى أفغانستان

السلام عليكم ورحمه الله وبركانه
اخوي الراسي بقولك شغله
من حقي اني افخر بالمنتخب السعودي لا ني من ابناء هذا الوطن العزيز بالعربي اسمها (وطنيه)
اما انت اذا كنت لاتفخر بمنتخبك فهذا شي يخصك
الا اذا ماعندك (............) هذا شي ثاني :D :D :D :D :D
مشكور اخوي ريفالدو على الرد والمفروض انهم يحمدون الله على ان منتخبهم ما تأهل بدل البحرين
كان علمهم الصقور الخضر فنون اللعب زي كل مرة يلعبون مع المنتخب :D :D :D

هدو اعصابكم شباب وماودنا نرجع المواضع السابقه التي بسببها فقدنا اعضاء عزيزين علينا :(

وكلنا اخوان وحبايب تجمعنا الموده في ضل عهد الفهد والجابر :)

عزيزي دايم
اتمنى انك تاخذ الامر بروح رياضيه ;)
بالنسبة للوطنية لا تختزلها بمنتخب مرة فوق مرة تحت سواء فزت او خسرت لن يزيد او ينقص من مساحة و طنك :D
الامر الاخر انت تقول الصقور الخضر كان علموهم فنون اللعب كلام جميل بس منين يا حسرة التاريخ لا يكذب ;)
و خذ عندك هذه الاحصائية ...
الصقور الخضر لعبوا مع الموج الازرق 33 مباراة حلو؟ طبعا حلو ;)
فازت السعودية 12 مرة كلام جميل
فازت الكويت 13 مرة كلام روعة
تعادلو 8 مرات شئ طيب
سجلت السعودية 45 هدف بالتوفيق
سجلت الكويت 46 هدف اللهم لا حسد
اذا الواقع شئ و كلامك شئ اخر :D
على العموم نبقى حبايب و اخوان مهما صار و اتقبل كلامك بكل صدر رحب .
و يالله و كلها 3 شهور ان الله احيانا و احياك و تستضيفون دورة الخليج و مثل ما يقولون الوعد قدام و لكل حادث حديث ;)

أنتم حدكم كأس الخليج


الا يابومبا وش أخبار أخويانا الاولين وش صار عليهم؟ :D

افا يا ريفالدو هذا وانا اول واحد باركلك تسوي فيني جذيه :D :D :D
على العموم انا ساجيبك بموضوع حدكم كاس الخليج بس اهم شي الروح الرياضية و بلاش غلط :D
شوف اخوي ...
الموج الازرق اول فريق عربي اسيوي يتاهل لكاس العالم ... هذي وحدة
الموج الازرق اول فريق عربي يحصل على كاس اسيا ... هذي الثانية
الموج الازرق اول فريق عربي اسيوي يتاهل الى الالمبياد العالمي و ايضا لثلاث مرات اخرها المبياد سيدني 2000
و طبعا ماراح اجيب سيرة كاس الخليج لانه البطولة هذي مرتبطة طبيعي بالموج الازرق و لن اعددلك انجازاته بها فهذا امر مفروغ منه .
بمعنى اخر ...
ان كان الصقور الخضر تاهلوا مرتين الى كاس العالم فالموج الازرق تاهل مرة و له السبق و الفارق تاهل واحد ...
ان كان الصقور الخضر حصلوا على كاس اسيا 3 مرات فالموج الازرق حصل عليها مرة و له ايضا السبق و الفارق بطولتين ...
ان كان الصقور الخضر تاهلوا الى الالمبياد العالمي مرتين فالموج الازرق تاهل 3 مرات و له السبق و الفارق تاهل واحد ...
ان كان الصقور الخضر فازوا بكاس الخليج مرة فالموج الازرق فاز بها 9 مرات ( اللهم لا حسد ) و له ايضا السبق ...
عزيزي ريفالدو
هنا انا كلمتك بلغة الارقام و التاريخ لا يكذب و ذلك فقط لتوضيح الصورة وهي انشاء الله واضحة للكثيرين و لكن لا باس من التذكير بمثل هذه الامور .
اخيرا ...
اتمنى ان تكون مناقشاتنا موضوعية و يسودها الاحترام و عدم الانتقاص من اي منتخب فلكل منتخب تاريخه المشرف .
وبعدين لا تنسا انا اول واحد باركلك لازم يكون لي وضع خاص عندك ;)
و على فكرة انا هلالي حتى النخاع
:D :D :D

السلام عليكم ورحمه الله وبركاته
اخوي العزيز بومبا : شكراً لك
وترى حنا دايماًاخوان ومافيه شك في ذالك
اخي العزيز الراسي :
الوضع عادي جداً وانا ماخذ المسأله بروح رياضيه بس اتمنى انت ماتزعل لأننا اخوان والاخ مايزعل من اخوه صح كلامي :D :D :D
بعدين بقلك ان المنتخب الازرق كان زمان على عهد
ابو يعقوب وغيره من اللاعبين الكبار اما الان فالمنتخب السعودي افضل بكثير منكم وهذا رائي : :D :D :D :D شكراً للجميع

ريفالدو :

من تقصد انت بخويناالاولين تقصد الاعضاء :D

دايم السيف :

الف شكر لك على هذي الكلمات الجميله وهذا ان دل دل على خلقك العالي :)

عزيزي و حبيبي دايم
صح كلامك وانت ما خليتلي شي اقوله كفيت و وفيت ;)
و اذا كان رايك ان منتخبك افضل بكثير صحيح اني اختلف معك في ذلك و لكن احترمه و اقدره كصاحبه
و سبب اختلافي معك في رايك انه اذا كانت الافضلية بكثير كماتقول فمن الطبيعي ان تنعكس على نتائج مباريات الفريقين و الملاحظ انه في العشر السنين الاخيرة في المباريات التي يفوز فيها الصقور الخضر ( عشان تدري اني ماني متعصب :D ) لا يتعدى الفارق هدف واحد و في اسوا الاحوال هدفين صح كلامي و لا انا غلطان :D
و غير ذلك انا اتفق معك ان المنتخب الكويتي انخفض مستواه و بالذات من مرحلة ما بعد الغزو الى ان حقق بطولة خليجي 13 سنة 96 و من هذه البطولة اخذ مستواه بالارتفاع التدريجي الى ان وصل الى مرحلة اعادت الى الاذهان الجيل الذهبي و هو قادر على تحقيق البطولات و لكن تبقى مشكلة واحدة في نظري و هي ضعف اللياقة البدنية فالملاحظ ان المنتخب يقدم مستوى رائع في الشوط الاول عكس الشوط الثاني تجد فيه اللاعبين يتسدحون :D بمعنى اخر منتخب الشوط الواحد
بس انا متفائل خير انشاء الله خصوصا بقدوم المدرب العالمي الجديد بيرتي فوغتس الالماني و المعروف ان المدرسة الالمانية تعتمد بالدرجة الاولى على اللياقة البدنية و الجاي احلى انشالله
عزيزي ...
ادري انا طولتها و اهي قصيرة بس شسوي احب الفلسفه شوي :D :D :D

[ 02-10-2001: المشاركة عدلت بواسطة: الراسي ]

السلام عليكم ورحمه الله وبركاته
على العموم اتمنى من كل قلبي التوفيق لجميع المنتخبات الخليجيه خاصه والعربيه عامه
وبكل تأكيد ارتفاع مستوى المنتخبات الخليجه شي حلو وجميل وفيه تطور لجميع المنتخبات
المنتخب البحريني ماشي صح ومستواه حلو وكذالك المنتخب الكويتي لازم يرجع لمستواه علشان تكون المنافسه قويه ان شاءالله في الدورة القادمه في الرياض
اكيد اللي بيكون بطلها الصقور الخضر ان شاءالله
:D :D :D شكراً لكم

أنا أقولك يالراسي عن منتخبكم من فترة كان من أقوى المنتخبات ومدري وش صارله عقب وأنا أعتقد ان السبب في انخفاض مستواه منع الاحتراف الخارجي ولما فتحوه الحين ان شاء الله راح تتحسن الصورة

وأما بالنسبة للغة الأرقام اللي تتحدث عنها ماصارت لغة أرقام صارت تاريخ و احنا مانتعامل بالتاريخ نتعامل بالجغرافيا أقصد العالم في الوقت الحاضر مايتكلم عن الماضي حنا أول من سوا وأول من فعل


أول فريق عربي يجيب بطولة اسيا بس مب أكثر فريق في اسيا حصل عليها وفي فرق كبير
احنا ماتأهلنا لكأس آسيا الا 5 مرات وفي كل الخمس مرات كنا نتأهل للنهائي ونفوز 3 مرات وننهزم مرتين بنتيجة1_0

ما تلاحظ الفرق كبير اذا قلتلكم حدكم بطولة الخليج اللي ماأنكر انكم جبتوها 9مرات وكلها كنا منافسينكم بس الواقع يفرض نفسه

واللحين جا على بالي موضوع بمناسبة ذكر البطولات الخليجية ماراح أحاكيك عن المنتخبات بحاكيك عن بطولة الخليج قبل الأخيرة اللي صارت عندكم باستضافة القادسية وشارك فيها الهلال واللي أعرفه منك انك هلالي
طبعا تذكر هالبطولة اللي قدم فيها الهلال روائع كرة القدم وكان كل مباراة يفوز فيها بـ4أهداف لين لعب مع القادسية و من سوء الحظ انتهت المباراة بالتعادل وكانت المباراة هي قبل الأخيرة للفريقين
وكانت مباراة الهلال الأخيرة مع الاتحاد(القطري) بينما مباراة القادسية كانت مع الأهلي الامارتي

في المباراة الأولى استلعن (القطريون)في المباراة ولصقوا العشر لاعبين قدام الباب عشان الهلال مايفوز ونجحوا في تلك المباراة اللي كانت على مرمى واحد

وفي المباراة الثانية فاز القادسية على الأهلي بمساعدة الحكم الواضحة(عيني عينك) حتى ان لاعب الأهلي صب كامل غضبه و(مزع) الكرة في الحكم وطرد باثرها هذا اللاعب وفاز القادسية بكأس الخليج


هذا الكلام كان نسخة طبق الأصل لما حدث في الكويت أيضا في كأس الخليج للمنتخبات حيث استلعن نفس الذين استلعنوا في تلك البطولة وهم (القطريون)

فانني من هذا المنبر العالي أناشد جميع الرياضين السعوديين ان لا يشنوا غضبهم على الكويت فقط فان هناك أعداء اخرون

(والله انقصت رقبتي وأنا أكتب هالرد يااااوك)

عزيزي ريفالدو
ياخي والله ضحكت على سالفة اعداء اخرون :D :D :D
أخوي الامور ما توصل لهدرجه اعداء مره وحده لا ياخوي كلنا اخوان صحيح انه يصير تنافس و يصير احيان حزازيات بس ما توصل اعداء و الامور هذي تصير بالبلد الواحد و بين الاخوان عندك مثلا جمهور الهلال و النصر بينهم حزازيات بس ما نقول اعداء ;)
الامر الاخر ...
عزيزي انا جبت الارقام هذي لما قلت حدكم كاس الخليج و حبيت ابينلك ان كاس الخليج انجاز من انجازات الكرة الكويتية و غيره الكثير و بينتهم لك .
بالنسبة لانهم اخذوها 9 مرات هذا صحيح و لا تشكك فيه و انشالله العاشرة بالطريق ;)
ايضا ...
بالنسبة لموضوع اللعب الدفاعي امام المنتخب السعودي هذا مو اسلوب منتخب الكويت في مبارياته مع السعودية و ارجع للمباريات و انت تشوف .
اما دول الخليج الثانية اذا انت واثق من منتخبك و تعتقد انه قوي فما يهمه اسلوب الخصم امامه انشالله ال 11 لاعب كلهم دفاع في الاخير القوي يكسب .
و لو كان كلامك هذا صحيح كان بوتان اخذت كاس العالم باللعب الدفاعي و انتهت المشكلة .
انا اعتقد ان المشكلة ليست بالاسلوب الدفاعي المشكلة فيكم انتم بمعنى دائما تحاولون تهميش الفرق اللتي تلعب امامكم و اذا اتت النتيجة عكسية قلتوا والله هذولا لاعبين باسلوب دفاعي .
و اذكرلك سالفة ...
كاس الخليج الاخيرة بالبحرين قبل لقاء المنتخب القطري و كان المنتخب السعودي بحاجة للفوز لتتويج كتبت احدى الصحف قبل المباراة عنوان بما معناه اللي يبي الكاس ياخذه من الرياض .
علما ان البطولة لم تحسم بعد الا بفوز السعودية على قطر .
طيب اذا انتم تقولون هذا الكلام ماذا تتوقع من المنتخب القطري و هذا الكلام فيه اهانة كبيرة لمنتخب قطر و كان مباراتكم مع قطر مضمونة و تحصيل حاصل .
طبيعي المنتخب القطري راح يقاتل و فعلا لعبوا مباراة كبيرة و انتهت بالتعادل و راح الكاس .
اللي ابي اقوله مهما كان الفريق اللي تقابله لا تحاول تهمشه و بعدين اذا خسرت و لا تعادلت قلت والله هذولا يلعبون لعب دفاعي .
مادري هذي وجهة نظري و اعتقد انها صحيحة .

مشكور .. أخونا دايم السيف ..

ماعليه .. يا شباب .. خشيت عرض و أنتم متحمسين في المناقر

ريفالدوا .. صباح الخيرات ...
يسلم عليك ... عبودي .. بالحيل :D :D
و يقول لك .. عندك كور صبّه ؟؟
الراسي .. منتب هين

ولله سياسي و رياضي .. صباح الخير

كوكتيل هذا بعض ما عندكم ;)
على العموم انا ( و اعوذ بالله من كلمة انا ) ذو مواهب متعددة و مميزات نادرة :D
على فكرة انا افكر ادخل منتدى الشعر بعد بس متردد اخاف اخرب على الشعار هناك .
شرايك اروح منتدى الشعر و لا لا ؟؟؟

الشرهه على اللي يتعب نفسه ويكتبلك كل هالرد وفي الأخير ما تفهم شي منه :mad:

:) :)
اشكر كل من اضاف ردة الجميل في هذة الخيمة ;)
: :D :D :D :D