انا ونورة وصديقي سعيدان..الجزء الأول
 

ياهلا ومرحبا..يالله حيهم..ولد ياسقراط صب القهوة
للريجيل..وخل سقراطة تصب القهوة للبنات..
ندخل في الموضوع..صراحة الجزء الاول من القصة
طلع طويل وحاولت اختصر فيه ولاقدرت (الثرثرة وراثة في العائلة)..علشان كذا اعتذر عن الاطالة من بدري..
والحين اتركم مع الفيلم.
سوااااااااااليف من اياااام المرااااهقة..لاتدققووون كثير
.............................................
جا الصبح وصحيت من النوم (لايا شيخ ..!! )..غسلت وجهي واخذت دش (يا نظيييف!! ) ..لبست ملابسي (احلف!!)..وبديت اجمع كتبي ودفاتري (كل واحد في ديره)..دورت كتاب الرياضيات وما لقيته ..رحت للمطبخ ..صباح الخير ياماما (يعنني مؤدب ) ما دريت الا ذاك الصحن مبنط في جبهتي ..عمى يعميك كم مره أقولك لاتقول ماما قل يمه(أصول التربية..عشان ما أطلع خكري!! )..رحت لها وحبيت على راسها وقلت..يمه شفتي كتاب الرياضيات حقي ..وانا وش عرفني كتاب الرياضيات من العنقليزي ياوليدي(مثقفه مره ؟؟! )..رح اسأل اخوك سعد عنه..(سعد عمره سنتين ..واي كتاب نضيعه نلقاه عنده !! )..رحت لسعد ولقيته في سابع نومه(يا حظه ما عنده مدرسه..!! )..ولقيت الكتاب مقطع مليون قطعه ..بغيت اسطره كف واعطيه كم ركبه في بطنه بس قلت يا ولد خلك الكبير وسامحته(اجل انت الصغير ؟!! )المهم اكلت كم لقمه وركبت سيارتي ومريت سعيدان وضربت عليه بوري ..وطلعلي وحش ما هو ادمي (شعره منفوش ..وعيونه مغمصه..والثوب مدري وشلون جاي ..والشماغ على جنب)..صباح الخير يا صديقي(نسمع بالصداقه )..ما رد علي (نفسه في راس خشمه)هو بالعاده ما يروق الا بعد الحصه الثالثه ..سكت وشغلت شريط خالد عبدالرحمن وهو يغني ويقول:
زيديني عشقاً زيديني**حبيني يالله واخذيني (يسمع بالفن!!)..مرينا مدرسة البنات كالعاده نبي نكحل عيونا على الصبح ..واشوف لكم هاك البنت ..سعيدان سعيدان شف شف يا حلوها.. والله موووت ..قال لعنبوا ابليسك حنا رايحين ندرس ولا نغازل البنات (متعقد من البنات ..مايعطونه وجه ؟؟ )...طفشني ورحنا للمدرسه وعلى طول للفصل (الطابور ما نحضره لانه للبزارين بس )..مسك سعيدان زاويته المعتاده ودقها نومه وطنش الحصه والمدرس (مشكلته ان ابوه غاصبه على الدراسه )...وانا جلست اسولف مع محيميد الأول على فصلنا(ايه اتلزق عندكم شي!! ..نبي ننجح يا هوووووووه ) ..بس تبون الصراحه هذولى هم الطلاب ولا حنا مفروض يعطون كل واحد منا ملفه ويقولون اذلف انت وياه دور لك وظيفه ازين لك..
سعيدان صحا بعد الحصه الثالثه (طبعاً الفسحه وصلت )..في الفسحة اشترينا سندوتشات فلافل وجبن..وميرندا فراووولة..(ليش ميرندا فراولة..اكيد تعرفون ليش؟؟ )..اجتمعوا الشباب عندي (أعضاء الفريق ) وطلعت ورقة المعاهده علشان يوافقون عليها(عندنا مباراه اليوم العصر) وبديت أقرا عليهم بنود المعاهده :
1- ممنوع أي واحد غيري يسجل هدف..انشاء الله يشوف الباب فاضي والحارس ميت لازم يرجعها الي وانا اسجل الهدف ..
2- الوجعان اللي راح يسجل في بابنا هدف ترا نبي نتوطا في بطنه بعد المباره ..
3- اذا بدت المباراه لا احد يتكلم ..انا بس اللي اقول شتها يا سعيدان والحقها يا نويصر وطلعها برا يا عصمان(عصمان واحد سوداني معنا في الفريق !! )
4- اليوم بعد المدرسه ممنوع أي واحد يروح لمدرسة البنات (ريحوا البنات من وجيهكم شوي)..روحوا ناموا احسن..
5- ممنوع تناول الكبسه اليوم(حتى لو ابوك يغصبك قل لا)
6- انا معتبركم موافقين (يعني ما فيه داعي توقعون انا وقعت بدالكم ..)
خلصت الفسحه وكملنا الدراسه وطلعنا وكل واحد راح بيته ..الا انا اخذت كم لفه عند مدرسة البنات (لاتفهموني غلط ) ابي بس اشوف الوضع عندهم لا يكون احد يلف عليهم من الفريق..
............................................
الوقت الحين العصر والجو مغيم في الرياض ..فرقة الرعب (فريقنا) يباري فريق العرابجه(الحاره اللي جنبنا)..والملعب في الارض الفاضيه اللي جنب بيتنا..الكابتن دااايم (راس حربه)لابس فنيلة النصر وعليها صورة ماجد عبدالله ولابس الرقم (3+3+3) (الرقم 9 ممنوووع ..!!)..زيدان الحاره سعيدان(ايه هين )يمتع الجمهور الغفير (بزران الحاره)بترقيصاته الساحره..عاد وش صار في المباراه ماني فاضي اقولكم عليه بس الاكيد انا فزنا عليهم وسجلت انا الهدفين..بس بعد ما انتهت المباراه وصفر الحكم (دحيم ولد عمي )تحول الملعب الى عاصفه رمليه (بدو يضربونا !! ) وما عاد نسمع الا ...اوووو..اّاّاّاّاّاّاّ....أي ي ي ي ي..هدئت العاصفه ولقيت فريقنا منحاشين لبيوتهم(الله يفضحهم )..ولقيت سعيدان منصرع في الملعب (مكمخ تكميخ !!)..وبديت أشيك على نفسي ..الحمد الله كل عضو في مكانه ..بس فنيلة النصر صارت فنيلة علاقي وصورت ماجد صارت صورة وائل كفوري(من كثر الغبار )...ودورت وحده من عيوني وما لقيتها(مدري وين راحت؟؟)..شيكت على راسي ولقيت فيه سلسله جبال اول مرة اشوفها (فلقات)..وبعد ما تطمنت على نفسي (أي تطمنت وأي خرابيط..؟؟ )...رحت لسعيدان وصبيت عليه مويه(اجل وش تبي تصب عليه..ديزل !! )صحا وهو يقول ..خذني بقايا جروح يادااايم(خالد عبدالرحمن)..طالعت فيه وقلت..وين اخذك وين انهزم بيك ياسعيدان(كاظم الساهر)..(قلبناها محاوره..كخخخخ )..المهم ضحكنا شوي ...ورحنا للبقاله واشترينا اثنين عصير شفاط وبسكوت مدور (يا قديم!!)وجلسنا نسولف ونتذكر ايام شبابنا ..قصدي ايام طفولتنا(على بالنا صرنا كبارالحين )..وقعد سعيدان يقول تذكر يادااايم ..تذكر يومك تتلزق فيني وحنا في الروضه (بداية تعارفنا )وانا مطنشك ولا أعطيك وجه..وقعد يضحك ..قلت له لا والله ..تخسى وتعقب انت اللي كنت تتلزق فيني ذيك الايام..كلمه مني على كلمتين منه ...تهاوشنا(بزران )..وشيل وحط وبقس وكف الين جا الهندي اللي في البقاله وفرقنا..وبدا يعطينا محاضره في الاخلاق ..صديق كذا ما فيه كويس ..إيب إيب..دااايم انت اخو سئيدان وسئيدان اخو انت..أيس فيه فايده انت في يضرب اخو انت..(واستلمنا نصائح على الطريقه الهنديه !!) ...جا محيميد من وراء الهندي ودخل البقاله واخذ علبة ببسي وبسكوت تويكس(متطور الولد)وحط رجله..شافه الهندي..وقعد يطرد وراه..ضحكت انا وسعيدان (تصاحبنا من جديد )ودخلنا البقاله واخذنا مثل محيميد (يعننا متطورين!!)وطلعنا ورجعنا لبيوتنا...
في اليوم التالي.......................................
صحيت من النووم يوم طلع الصبح..(يحاول يغير اسلوبه..هههه)..ونفس اللي صار امس صار اليوم..تروشت ولبست ملابسي وجمعت كتبي ...وما لقيت كتاب الكيمياء (تتوقعون وين القاه ...كخخخخ)..واستقبلت جبهتي صحن ثاني من ماما قصدي من امي..ومريت سعيدان ...الخ...بس فيه شي غريب صار اليوم ...واحنا طالعين للمدرسه لقينا ملعبنا مليان عمال وحفريات..يبنون عماره جديده..قال سعيدان رحنا فيها يادااايم وين نلعب فيه الحين ..(هذا اللي يفكر فيه بس )..مرت الايام بسرعه ..واعتزلنا الكوره(ما عندنا ملعب )..وكل يوم كنت انا وسعيدان نراقب العمال وهم يشتغلون ونحذفهم بالحصى وننحاش(مقهورين منهم علشانهم خربوا ملعبنا )...والعمال يشتكون لاهلنا..وصارت الوجبات عندنا اربع في اليوم(ثلاثه أكل ..ووحده ضرب )
بعد سنه..
تحول ملعبنا الى قصر ضخم وفخم وبدت الشركات العالميه(الايطاليه ..والامريكيه ..والاسبانيه ) تنزل من الاثاث اللي ما عمرنا شفنا مثله(عيال فقر )..في يوم من الايام جلست انا وسعيدان قبل المغرب ...وسألت سعيدان ...سعيدان من تتوقع بيسكن في هالقصر ..قعد يفكر وقال ...شف يا دااايم القصر هذا مهب صاحي وراعيه مطنطخ طنطخة بنت كلب.. يمكن الملك يسكن بحارتنا ..طالعت فيه وبغيت اعطيه كف يضيع ملامح وجهه..قلت يا غبي الملك ما يسكن الا في العليا..أصلا هم علشان كذا سموها العليا(ذكي مررره!!)..قال والله انك صادق...طيب انت من تتوقع ..قلت انا ما أتوقع بس أتمنى (متابع برامج الرياضه ..دايم يقولون كذا ).. أتمنى يسكن بحارتنا وزير(علشان نضمن الوظيفه )...مراهقين ما علينا شرهه...
المهم اذن المغرب ورجعنا لبيوتنا..
في اليوم التالي (أحلى ايام حياتي)...
جالس انا وسعيدان عند بيتنا وشوي الا جايه ذيك السياره اللي طولها خمسه متر (مدري وش اسمها ..بس الاكيد ما هي ددسن )وفيها بنتين وطفل صغير ...ووقفت عند القصر الجديد ..ونزل السواق وفتح الباب ..نزلت البنت الاولى وكانت كبيره في السن وكانت قشرا ومالها داعي وشيفه وسنونها طايحه..فلم نلقي لها بالا..ثم نزلت البنت الثانيه وكانت في مثل عمرنا ...كانت حلووووه وجرررررح وموووووت.. فحسبت ان القمر قد هبط من السماء واستقر بحارتنا ..بدأت عيون الصغرى تطوف المكان مستكشفه معالم الحاره ..وعندما وقعت عيناها بعيني ..بدت رجولي تتنافض والركب تصفق في بعض وبدأ قلبي يقرقع ..وصاحت الكبرى بالصغرى ..يالله يا نوووورة تعالي ادخلي ..فأجابت الصغرى حاضر يا ماما (تصدقون ما جاها صحن..مع انها قالت ماما مثلي )..دخلت المنزل ..وابحرت انا في احلامي وشفتها قدامي وصارت عيني بعينها ..وايدي بيدها وقربت.........من..............وبدينا..
شششششششششششششششششششششش(انقطع الارسال..خلل فني )
وما صحاني من حلمي الا بقس سعيدان في بطني ..وهو يصيح ويقول.. قطعت براطمي يادااايم...(مدري وش سويت فيه ) ..واصبحت ابربر وأقول ..كيف السبيل الى هواك يانووورة...
هذا اللي راح تعرفونه في الجزء الثاني ...
.................................................. ..........
تحياتي DAYEM.

أهلا دايييييم
أول شي أبي اقل لك انه سقراطة ما جابتلي القهوة للحين
وين هجت البنية؟
وش هالتطور صرت كاتب مسرحي واحنا ما ندري
---------------------------------------
هادية في انتظار الجزء الثاني لتكمل التعليق
----------------------------------------

رهيييييييييييييييب يا دايم

متى ينزل الجزء الثاني ؟؟
الفيلسووووووف

الله رائعه القصه يادايم اقسم بالله انها ممتازه وتفطس ضحك الله يوفقك ياصديقي صراحه اهنيك على هذه القصه الفكاهيه ومتشوق اشوف بقية الأجزاء...احمد...

بصراحه..
نفع معك التشجيع...ولاعبد الخالق..(طاش ماطاش)
خيال..خصب..من جد..
بصراحه اكثر ماظحكت عليها(سالفه شربك للميرندى)
همسه*

ياهلا بالاخ دايييم اما انتاج و اكشن رهيييييب مافي زيه اكييييد هذا انتاج شركة شيووومة يالله بانتظار الجزء الثاني باحر من الجمر
الا صحييح وين كان القصر لا يكون حي المرسلات بس تراني اعرفها البنت و اقدر اتوسط لك عندها عشان تكلمها كخخخخ

أحداث سريعة غير مملة و مترابطة ، خفة دم و ظرافة كبيرين ، سهولة اندماج القارىء في القصة.

أخي دايم كعادتك .............. رائع

ما أروعـ ـــــــك

مرحبا دايم
وين المنتجين عنك الحقيقة منت سهل
فطستنا من الضحك
الله يعينا على الجزء الثاني
بالتوفيق يا دايم
.
.
مهند

سلام..
اول شي انا ضيعت موضوعي..جيت ادور عليه ويادوب لقيته (من كثر المواضيع نزل تحت)..
بصراحة كنت اتوقع بلقا مليوووووووووووون رد بس يالله اللي ردوا فيهم الخير والبركة..واللي ماردوا ماألوهم لان القصة بايخة ومالها طعم !!!!
.................................................. ..........
هادية:
من جدك سقراطة ماصبت لك قهوة..انا اوريك فيها بس خليني اشوف زوجها سقراط وتشوفين وش اسوي.
وبالنسبة للتطور راجع لان دموعي خلصت من كثر قصص الحزن اللي كتبتها قبل وقلت ياولد اكتب للضحك احسن..
مشكووووووووووووورة..
.................................................. ..........
الفيلسوووووووووووووف..
انت والله اللي رهييييييييييب..
الجزء الثاني بينزل الاسبوع الجاي..واذا صار طويل ابي اسوي جزء ثالث بعد..الله يعينكم علي.(عطيتوني وجه‍‍‍‍)
.................................................. ..........
احمد..
لاتخليني اصدق..وينتفخ راسي من المدح..
مشكوووووووور ياغالي..وابشر باللي يسعدك.
.................................................. ..........
همسه..
شفتي شلون الروح المعنوية لها دور؟؟
بس ترا ماني معطيك ولاشي من الارباح.. هونت..(تأثرت بالقصة وصرت بزر..كخخخخخ)..
.................................................. ..........
هنوووووووووود..
انت ليش داخلة فيني عرض..كخخخخخ..
بس تعالي هنا..انت وش دراك ان القصر بالمرسلات (لاتكوني نورة وانا مدري..كخخخخخخخخ)..
الصراحة القصر ماهو في المرسلات..بس ماهو بعيد عنه..
دمك خفيييييف وياهلا فيييييييك.
.................................................. ..........
المر..
صدقني انا سعيد برأيك..ويارب اكون مثل ماقلت..
وبعدين ترا احنا مشتاقين لمواضيعك بعد..
.................................................. ..........
فجر..
صحيح انك كتبتي كلمة وحدة بس..لكن هالكلمة تعني لي الشيء الكثير..
بس اهم شي ضحكتي ولا لا..
.................................................. ..........
مهند..
جهز نفسك للجزء الثاني..وانتبه لاتموت من الضحك وتخليني انتحر بعدك..لاني السبب..كخخخخ
مشكووووووووووور يامهند على تواصلك معي..
.................................................. ..........
للجميع تحياتي DAYEM.

اثـــــــــريك منت بسهـــــــــل
الله يقويك وتنزل الجزء الثاني بسرعه
عيني عليك بارده
تراني نجدي وعيني حاره
بس ابهل البداع الله يوفقك دائما وابدا

شكراً دايم

بنسواراااااات مرة ثانية
ههههههه داخلة عرض ها طييب بس كنت افحط شوي قلت خليني اطب عالجيران شوي كخخخخخ
وشفييييك صفرت و حمرت و اخضريت لا تخاف مني نوورة و هم بسكت مني كاشفة عمايلك اللي تسويها بالحارة كخخخخخخخخووو
و ميغسيي بوكو ادري دمي خفيييييف مررررة زي الكاتشب هههههه بايخة صح
هنووووودة

حرق الميهني..
مشكووووووووور ياغالي..
.................................................. ..........
فجر..الشكر لك.
.................................................. ..........
هنووووووووودة..
تصدقين انك تخوفين..كخخخخخخخ
وسالفة الكاتشب ماهي صاحية..هههه
.................................................. ..........
تحياتي DAYEM.

هههههه حرام علييك و ش شايفني دراكولا يالله ماعليه اخوف احسن من اني اعطي وجه بزيادة هههههه امزح
يالله يديمك للخيمة
هنوودة

هنووووووودة وش دعوا دراكولا مرة وحدة..اصلا انا مقدر اقول عنك دراكولا تدرين ليش..اخاف الدراكولا يزعل مني..كخخخخخ
وبعدين تراك ذبحتيني بكلمة امزح كل شوي..خذي راحتك ومافيه داعي لكلمة امزح..(وش قالولك..غبي..كخخخ). ‍‍‍‍‍‍‍‍‍‍‍‍
تحياتي DAYEM.

رااااااااائع يا دايم...ومتميز

سقراط وصللللللللللللللللللل
أسفين على التاخير (كنهم دارين عني هالحين)
تسلم يادايممممممممم والله روعه لا صراحه روعه من جد ترى روعه..
عن أذنكم شوي ابغى اقرأ القصه وأشوف اللي يعجبني فيها..
(حلوه الثرثره وراثه في العائله على بالك شي جديد)..
(صباح الخير ياماما (يعنني مؤدب) ما دريت الا ذاك الصحن
مبنط في جبهتي ..عمى يعميك كم مره أقولك لاتقول ماما
قل يمه(التربيه الحديثه ..عشان ما أطلع خكري!!)..
حلوووووووووووووووووه (أثرك بغيت تصير خكري الا شوي..)
أما حبيت على راس امك كثر منها ..ترانا شباب وعارفين بعض أترك عنك هالحركات(على بالك مؤدب)..
أماتسطر سعد ألعب بعيد ترى أبوك قريب (بمفتاح الغاز)..

صراحه سعيدان هذا أكبر غبي عرفته القرون الوسطى (أجل فيه أحد يكره البنات)بالله يا دايم عطه كم كف بالنيابه عني..

أجل سعيدان يبغى براطمه تصير سود ..ماله حق صراحه وشفيها الحمر هالحين ترى حلوه ويمدحونها بعد ..
دايم صراحه القصه حلوووووووووووه كنت أتمنى (مثل ما يقولون في البرامج الرياضيه)أكون معك بس انشاء الله تحطني في الجزء الثاني..ترى ما فيه مشكله لو شلت سعيدان ترى عادي ..تقمص شخصيه..
بعدين تعال وش قالوا لك سقراطه شغاله عندك انت وضيوفك ..لا واللي قاهرني تقول وش فيها اذا خدمنا دايم ترى نحبه وانا اذا قلت لها جيبي لي كوب مويه قالت شف المطبخ قدامك ...
.................
دايم والله انك نكته ودمك خفيف بالمره ويمكن زياده حبتين ..ما علينا كله في مصلحةالمجموعه الشمسيه..
دايم في الانتظار للجزء الرابع انشاء الله (واحد غلطان)
XXXXXXXXXXXXXXXX
(سقراط يقول شكراً دايم واترك عنك سقراطه لا أجيك اتهاوش معك )
XXXXXXXXXXXXXXXX

طيب خلاااااص الحق علي اني ما ابيك تزعل و اقولك امزززح اجل خذ على راسك ها
بعديييين انت وش تسوي للحين وين الجزء اللي بعده على فكرة اذا تبي مساعدة في التاليف حنا حاضريين بتكون قصة تحطم الخيمة تحطيما كخخخخخخخخ
..........
اقوووووووول اقول سقراااط ممكن اتعرف على سقراطة ابي استشيرها في موضوع و بعطيها كتاب ابلة نظيرة
هنوووودة

يامرحبا يامرحبا نورك ياسقراط طفا الكهربا (واحد مصري..كهههه)..
سقراط الله يرجك..ياخوي انت وينك..تصدق كنت ناوي اكتب موضوع الليلة اسال عنك (واحد نصاب..هههه)..
ادري انك تبيني اقولك شكرا على رايك ياسقراط..بس والله مااقولها لو تموت..كخخخخخ
ابي اقولك مرسيييييييي ياسقراط (يعنني اعرف اوردوووووو..كخخخ)
صراحة اكثر شي اعجبني في ردك هو انك حددت المواقف اللي ضحكتك اكثر شي..وهذا الشي اللي انا ابيه..لا تقولي ليششششش
تصدق عاد..بديت اقتنع فيك..ويمكن احطك بطل فيلمي القادم اللي بيكون بعنوان..(سقراط والعنزة دوللي) اتوقع ان هالفيلم يبي يقطع اطناب الخيمة كلها..كخخخخخخخ
باييييييييييي..
.................................................. ..........
هنوووووووووووودة..
تعالي ابي اقولك شي..
-
-
-
-
-
-
-
-
-
-
-
-
-
-
تعبتي؟ (احسن)..
تعالي بعد..
-
-
-
-
-
-
-
-
-
-
-
-
-
انا كنت اقولك..لاتكتبين كلمة امزح..لان صدري وسييييييييع..يعني اخذي راحتك بالمرة لاني ادري انك تمزحين ياام دم خفيييييييييف..فهمتي يابنتي..ههههه؟
وبالنسبة للجزء الثاني..انا شغال فيه الحين بس الجامعة ماهي معطتني فرصة اكمله..راح يكون جاهز مع نهاية الاسبوع.
وبالنسبة للتعاون بينا اتمنى يجمعنا عمل مشترك في القريب العاجل (متأثر بكلام الفنانين.....دايم يقولون كذا)..
.................................................. ..........
دنيا معكوووووووسة..ارسم دجاجة تطلع جاموووووووووووووسة..
تحياتي DAYEM.

مراقبنا العزيز..عمر الشادي..
شكرا لك..واتمنى ان استحق هذا الاعجاب حقا.
تحياتي DAYEM.

اهلين ابوحميد..
اول شي ترا انا اسف على التاخير في الرد..
ثاني شي انا اسف على التاخير في نزول الجزء الثاني..بس والله انا كنت مشغول شوي خلال هالاسبوع وكتبت معظم القصة..وباقي منها شي بسيط راح اكمله..وانزل القصة بكرة او بعده بالكثير..
صديقك DAYEM.

انتظروا الجزء الثاني هذه الليلة..
تحياتي DAYEM.

ابدااااااااع.......
بس ياخوي الدعايه كانت ماهي قويه للفيلم !!ما انتبهت له الا الحين وزين لحقت قبل الجزء الثاني ...الله يعطيك العافيه.