أرشــــــيـــف حوار الخيمة العربية

أرشــــــيـــف حوار الخيمة العربية (http://hewar.khayma.com/index.php)
-   خيمة بوح الخاطر (http://hewar.khayma.com/forumdisplay.php?f=31)
-   -   من روائع الأمير 00 عبدالرحمن بن مساعد 00 (http://hewar.khayma.com/showthread.php?t=58465)

الشــــامخه 25-10-2006 09:01 AM

من روائع الأمير 00 عبدالرحمن بن مساعد 00
 


طـــــــــــــاح الحطب.... و حـــــــلوة الحياة


المشهد الاول

وحدة مزيونة بالحيل.......و حبيبة ...

بس تخون!!!!

وش اسوي بجمالها؟؟

بياخذها الزمان و تبقى عجوز.....

عادي........طاح الحطب.......... و حلوة الحياة



المشهد الثاني

ملتزم ......

يصلي كل الفروض........

و اذا تعب..... فوت صلاة الفجر

واذا شبع راحت صلاة العصر......

و عنده دش....... و يكذب كثير

و اذا صحى الصبح ..... مشط اللحية

عادي........طاح الحطب.......... و حلوة الحياة



المشهد الثالث

غني و ظالم ..........

يطرد المساكين......و يستغل الضعوف

مغرور و فاسق......

و مجلسه عامر.......

كلن يبهر له........

و مع ذلك يجمع حسنات.......من كثر اللي يسبونه

عادي........طاح الحطب.......... و حلوة الحياة



المشهد الرابع

يكد يدرس و يشتغل.........

لاجل يبني مستقبله.......

تزوج و جاب عيال......ثم تقاعد

صار يسكن في مكان.....و أم عياله في مكان

والسبب العيال......

صار دار المسنين بيتهم............

عادي........طاح الحطب.......... و حلوة الحياة



المشهد الخامس

تغازل و تاخذ ارقام...........

و تطلع مع هذا.....و تواعد هذاك........

و يوم طاح الفاس في الراس.......

بكت........

و راحت تشكي لامها غدر الزمان.......

طبطبت عليها امها وقالت:

ولا يهمك ......سفرة لمصر.... وشوية سيولة

و ترجعين بنت......

عادي........طاح الحطب.......... و حلوة الحياة



المشهد السادس

مرفوع الكفن أبيض ......

وصاحبه وسط البياض.........

بعضهم يبكي.......و بعضهم عادي

دفنوه.....و تبكبكوا شوي

و اخر الليل سكارى.........

عادي........طاح الحطب.......... و حلوة الحياة



المشهد السابع

سيارة مسرعة........

و تدعس لها واحد........

مسكين هندي..........

و العسكري صديق الطايش.......

والخطا نصه على الهندي......

والباقي على أبو الطايش..........

و في الليل.....الطايش يلعب بلوت

عادي........طاح الحطب.......... و حلوة الحياة


المشهد الثامن

قارورة مويه ......

ما تضره ........طايحة في السيارة

يناظرها بغضب.......زعلان منها

و يفتح الشباك .....و رماها وسط الطريق

واذا اجتمع مع الشباب قال:

متى بنتحضر؟؟؟؟؟؟

عادي........طاح الحطب.......... و حلوة الحياة



المشهد التاسع

اهم شي الثوب نظيف.......و الشماغ مكوي......

و القلم ماركة......والساعة تضوي......

و الجزمة جلد.......والسيارة عجب......

و تلفونه ما يسكت......

إما بنات.....

أو البنوك تبي فلوسها.......

عادي........طاح الحطب.......... و حلوة الحياة



المشهد العاشر

سطحية .......و مغرورة

غبية......و متكبرة......و يا ريتها حلوة

تبي زوج مواصفات......

ما يقول لا.......ويكره الاستراحات

لازم وسيم.....و انيق.....و متعلم.....و دخله ممتاز

و يحب السفر.........

و بعد سنين......تلاقي نفسها في الانترنت

تدور واحد يقبل بها.......

عادي........طاح الحطب.......... و حلوة الحياة



المشهد الحادي عشر

فتح الكمبيوتر......

و دخل للمنتدى......و كلامه ما يتعدى

ان الموضوع روعة و رهيب

و هو ما قراه و لا يعرف كاتبه........

بس يبي يزيد المواضيع موضوع .......

ويزيد همومنا هم.........

علشان يصير صاحب الألف موضوع......

و يتميز........

والمشكلة انه يتميز...........

عادي........طاح الحطب.......... و حلوة الحياة





المشهد الأخير

الكذب اثم.........ومع ذلك نستخدمه

و ندري ان هذا حرام........و مع ذلك نجربه

نتذكر السهرة و الفرح و السفر.......

و ننسى الجالسين على كتوفنا.........

و نتناسى ان معهم كتاب يسجل افعالنا و نياتنا.......

كل شي محسوب.......

حتى النظر......

نسينا ان ورانا يوم......علاماته قربت

ومع ذلك كلنا ناسين.......

أن بقيت على حالك تتناسى .......لازم تعرف

إن ذاك اليوم مهوب عادي

وانت الحطب

و ما به حياة





كونزيت 25-10-2006 05:22 PM

مشاهد واقعية برغم ماتحمله من مرارة إلا أنها تجسيد لما هو موجود


وللشاعر طريقة جميلة للإنتقاد وروح الفكاهة عنده حاضرة تعجبني أمسياته التي تعرض على الشاشة


شاكرين لك مااخترتيه لنا أختي الشامخة من مشاهد

الشــــامخه 17-11-2006 03:54 AM



غاليتي كونزيت 00

كل الشكر والتقدير لك ولمرورك العطر..
لكِ من الود عبقه...

:)


الشــــامخه 17-11-2006 03:58 AM



"طـابــــور"


لا تقروا ما بين السطور ..
هذي القصة خيال ..
وما لها أبدا علاقة ..
بالذي دار ويدور..

تبدأ القصة بناقم... كُلَفّ يأدي مهمة ..
وكان بايع مايهمه ..
يموت هو أو يبقى عايش..
سهم مُتَعمد وطايش..
من بعيد يسدده..
ويدمي هذاك الثور..
ثور هائج مندفع مجروح..
هائل القوة..
عدائي غاضب ومغرور..
وطابور..
كلهم ناطر ويرجي..
مايجيه الدور..


وفأول الطابور ..
يوقف ثاني واحد..
حيث الأول .. مالقى أحدٍ يساعد..
انتظر فترة طويلة..
وبعد طول الانتظار..
وعلى الملا فوضوح النهار..
أجهز عليه الثور..
ثاني الطابور أول..
فسّر وحلل وأوّل..
قال أنا مالي هروب..
ودوم تايه في الدروب..
وياما قالوا الناس إني..
في جنوني مافي منّي..
وضعي متدهور ويائس..
ببدأ بخلع الملابس..
قال أنا يا ثور عاري..
وباقتناعي واختياري..
بصبح البقرة الحلوب..
ويترك الطابور.. ويتجه للثور..
ويختفوا خلف التلال..
وماحصل صعبه يقال..
الرقابة لا تجيزه..
يرجع الثور العدائي..
يواجه الطابور..
طابور .. كلهم ناطر ويرجي ..
مايجيه الدور..


أول الطابور .. يحمل في يدة باقة زهور..
بادره لحسن النوايا..
يدري هو ماله مزايا..
شاءت الأقدارُ أمرا..
كانت الأزهار حمرا..
وزادت هياج الثور..
طابور.. كلهم ناطر ويرجي..
مايجيه الدور..


باقي الطابور يرجف..
كلهم يدري ويعرف..
وضعهم حالك وهالك..
ضعفهم ينبي بذلك..
كلهم غارق في أصناف البلاوي..
فقر مدقع .. جهل مفزع .. عقل خاوي..
طابور .. خلفه هلاكه والثبور..
وأمامه الثور الجسور..
طابور .. صمته مثل صمت القبور..
ينطر المنقذ يجي..
ويكف بطش الثور عنهم..
أو ينطر الدنيا تدور..
ويصبح الطابور فجأة..
قوة عظمى !!
ويطحن عظام الثور..
بالدور..

أو ربما .. على الأقل .. يصبح الطابور ثور..
والثور طابور..
لا تقروا ما بين السطور ..
هذي القصة خيال ..
وما لها أبدا علاقة ..
بالذي دار ويدور..
آخر القصة .. كهل مجنون..
يوقف على تلة قريبة..
يصيح بالطابور..

يا طابور:
أنت أول وربما آخر أعاديك..

يا طابور:
كل مابك منك وحدك من صنع أياديك

يا طابور:
أسمع كلام الأقدمين
لربما يهديك..

يا طابور:
أمشي عدل.. يحتار ثورك فيك !!




الحنين 20-11-2006 12:48 PM

أختي الحبيبة .. شامخة الخيام
اخترتي من بين المبدعين رأس القائمة
لكلماته التي تحاكي الواقع صدىً وأثراً عميقاً في النفوس ..
اسمحي لي أن أشاركك نقل إبداعه :)
**

بدء ذي بادئ ..
هذا تعريف المبادىء ..
كل وقت .. وله أذان ..
الزمان .. غير الزمان ..
ياكلام الليل .. يمحيك النهار ..
باختصار ..
المبادىء .. شىء تحكمه الظروف ..
مثل طفل .. ترتبك في الحروف ..
ما اجمل أغلاطه ..
المبادىء .. للأسف ..
كلمة مطـّاطة ..

بدء ذي بادىء ..
يا بايع إحساسك ..
وش احساسك ..
وأفكارك لغيرك ..
ياشاري إحساسك ..
وش احساسك ..
واحساسك لغيرك ..
ليتك توصف متعتك ..
لاخذت من غيرك مشاعر ..
تدري لو تقدر ترى ..
ماهو بعيد تصير شاعر ..
كيف الخلاص .. من ناس تغتال الشعر ..
و حد القصاص في كل سرقة ..البتر
الا الفكر ..

بدىء ذي بادىء ..
هذا تعريف المبادىء ..
يا بايع أموالك .. لفقرك ..
وللعذاب اللي في بيتك .. ودمعة عيالك ..
ليت توصف متعتك ..
ليت أوصف ضيقتك ..
لو جرى لك ..
في القمار .. اللي جرالك ..
ليت نعرف ..
متعتك أو ضيقتك ..
أيهم اللي بقالك ؟

يا بايع أعصابك .. لخمرك ..
ياكثر ماحرت بـ امرك ..
يابايع الصحة .. لخمرك ..أو سمومك ..
وش يفيد أني ألومك ..
كيف تلقى متعتك .. لا ضاع عقلك !
وبان بين الناس ذلك
وكيف تسعد في شعورك ..
وانت خارج عن شعورك ..
يا بايع اعصابك و وعيك ..
ياللي تهرب في عذابك ..
من عذابك ..
لو بغيت في يوم ..
تهرب من هروبك ..
وش هو احساسك ؟

بدء ذي بادىء ..
هذا تعريف المبادىء ..
يابايع بلادك .. بكم كان الثمن ؟!
يا بايع بلادك ..
انسى المباني .. والبيوت .. والحب الأول
انسى غبار المدرسة .. و وجوه اصحابك ..
انسى فؤادك .. وميلادك ..
وارمي ورا ظهرك ..
كل العبارات الكبيرة ..
عن الوفا .. والتضحية ..
وعن حب الوطن ..
يا بايع بلادك ..
لو كبروا أولادك ..
وكان السؤال في عيونهم ..
سجنك وجلادك .. !
" احنا يابوي من وين ؟! "
وش هو احساسك ؟!

يابايع آخرتك .. يالعاصي القاسي ..
اسمع نصايح صاحبك " ابليس " :

" لا تترك التدليس ..
اظلم ولا تفكر في باكر ..
هيم في العصيان جاهر ..
واختار من بين الذنوب ..
مايسعدك ..
ولاسار عمرك للغروب ..
لاتتوب ..
لا تحسب للعمر ..
ولا تفكر بالقبر ..
ولا العذاب ..
توك شباب .. "
هذي نصايح صاحيك ابليس ..
يابايع آخرتك بدنياك ..
لا عدمناك ..
لو عدمناك ..
وش هو إحساسك ؟

الشــــامخه 01-01-2007 05:22 AM


غاليتي الحنين ،،

اشكرك جزيل الشكر
على حضورك العذب وروعة القصيدة التي اضفتها ،،
لكِ من الود أطيبة ،،

:)


الشــــامخه 01-01-2007 05:27 AM



" الــــوداع "

الا يا قلب نبضي ..
يا سما دمي ووجداني
فمان اللي عطاكي كل طهر الأرض ..
أنا ماشي ..
هذا كان اخر مانطق قلبي ..
وأول نبض في لساني
وتلاشى النطق ..
وعصر حزن الوداع اللي حضر قلبك دموع ..
بكت ادفى دموع الخلق ..
وسرى في داخلي برد الخشوع
وغير العطر ودموعك وجرحي من وداعك ..
مابقالي ..
استعفر اللي صورك مما طرالي
طرالي يادفى عمري..
وياترحالي وحلي
ارشف دمعك الطاهر .. واغسلبه واصلي
واحمد ربي اللي بك حباني
الا يا ام اجمل من سكن قلبي
ويا داري وعنواني
فمان اللي عطاكي كل طهر الأرض
أنا ماشي ..




Powered by vBulletin Version 3.5.1
Copyright ©2000 - 2024, Jelsoft Enterprises Ltd.