|
™« فهد المساعد »™
 شاعر تلاعب بكلماته.. وتراقص القلم بين أنامله مسطراً أروع ما جادت به القرائح.. كلماته بسيطة .. تلج القلب بيسر.. فتؤثر به .. حين تبحر بين أبياته تحتار أين تُرسي سفينتك وعلى أي شاطئ ستقف لتنتهل من سيل عباراته.. فهد المساعد .. شاعرٌ ترنّم بأجمل و أجزل القصائد.. واكتب نبذه بسيطة عنه ( على حسب معلوماتي البسيطة عنه) اسمه الكامل.. فهد بن فالح بن مساعد السبيعي... ولد في الرمحيه.. التابعة لمدينه الرماح اشتهر بقصيده المدينة والغريب في بيته الشهير... جا يشوف الحال كيفه ؟ بعد ماهزه حنينه ... وقبل يسألني .. سألته "كيف حالك يالحبيب قال أنا كني غريب ضيع دروب المدينة ... قلت "أنا كني مدينه تنتظر رجعه غريب تأثر بشكل كبير بالشاعر متعب التركي أما بالنسبة لحياته الشخصية ... فهو أعزب ,, ساكن في مدينه الرياض ,, موظف بشركه الاتصالات...... نزل له مؤخرا ديوان صوتي الذي طال انتظاره طويلا ... وكان بالفعل يستحق هذا الانتظار فخرج لنا بشريط أكثر من رائع.. ضم هذا الشريط أجمل وأعذب القصائد منها: خلاص , المدينة والغريب ( عنوان الشريط) , صالات المطار , لا تسافر , المراسيل، الدلوعة, سالفة العشاق , أنت زعلان , رسالة, هديه عيد ميلادك , اعز الناس , نديم الجرح, ثلاث سنين, كبوه جواد, اللي تركني , الناس , التوبة, يبه ,,,,,,, يتبـع ... :) |
|--*¨®¨*--| يــبه |--*¨®¨*--| يبـه وأنا بعد 12 عـام حسيت ... اني قدرت أقول شئٍ كتمتـه ابطى قصيدي ماانكتب فيك وابطيت ... أجرّ صوتي وأرجع أجر صمته ما ودي اكتب بيت واندم على بيت ... ماهوب شعر الشعر كاني زهمته الشعر كانه ماانحنى لي ماجيت ... ان ما عزم مرثيتك ماعزمته ان ماكتبته بازرق الدمع وابكيت ... كل الجروح المبطيه مارحمته يبه وانا من بعدك ابو التناهيت ... مامر طعم للحزن مانهمته يبه ( يبه ) كلمة وانا كل ما اوحيت ... كلمة ( يبه ) صديت و الوقت لمته يبه ( يبه ) كلمة و أنا كم تمنيت ... اهدم بها وابني بها اللي هدمته يبه وانا لا ضقت رحت وتهجيت ... ركون بيت ضم حلم حلمته يومك تعلمني الامن تحاكيت ... درس الحياة اللي كبرت وفهمته هناك كانت دلتك لا تقهويت ... وهناك كان يساق طيبٍ حشمته وهناك ايه اذكرني هناك خليت ... طفلٍ ملا بالدمع دربٍ رسمته هناك جاني علمك انك توفيت ... و هناك خاويت الشقا واحتزمته واليوم قلت اليوم يومي ومديت ... كف القصيد وطاح شعر ونظمته لكن بعد صمت 12 عام حسيت ... اني عجزت اقول شئٍ كتمته يتبـع :) |
|--*¨®¨*--| صديــق الطفولة |--*¨®¨*--| رثاء في الأمير الشاعر طلال الرشيد. فقيد الرجوله وين حطت بك الأقدام؟ ... انا ما تخيلتك تزور اللحد قبلي عقيد الطنايا شيخ شمّر ذرى المنضام ... حفيد الجنازة بلوة اللي بلا المبلي عقيدٍ لقومك.. بس تبكي عليك أقوام ... من الساحل الشرقي الى الساحل القبلي أنا لا ذكرتك طاح راسي على الأكمام ... اسولف لقلبي عنك وابكي على مهلي أسولف عن أول مرةٍ جيت قبل العام ... وشفتك بعيني مثل ما كنت في عقلي امير و عظيم و شاعر و فارس و مقدام ... سجل البياض اللي بنقش الذهب مطلي سنافي شهم فزاع .. لا قام يعني قام ... يغيث الضعوف ولا يقول الوبل وبلي طلال .. الشهامه نكّست عقبك الأعلام ... الا من قتل خيال وش نفعة الرجلي؟ طلال .. الأوادم كلها من لحم و عظام ... تعيش وتموت بصمت تالي ورا متلي عداك انت يا من عشت عمرك عظيم اشمام ... وقفت فمماتك تنتخي: من نوى قتلي؟ رحيلك بنى للحزن وسط القلوب خيام .. ووداعك جعل كف الثرى بالدمع مملي عسى من لبست لخشيته فـ رمضان إحرام ... ودعيته يارب اكرم نهار الحشر نزلي يعوّضك عن دنيا بها حاسد و نمّام ... ويرفع مقامك عن مقام البرى السفلي يتبــع:) |
|--*¨®¨*--| المديـــنة والغريـــب |--*¨®¨*--| جا يشوف الحال كيفه بعد ما هزه حنينه ... وقبل يسألني سألته كيف حالك يالحبيب قال أنا كني غريب ضيع دروب المدينه ... قلت أنا كني مدينة تنتظر رجعة غريب قال أجل وش فيك تكره سيرة الحب وسنينه ... قلت أجل وشلون ما اكره سيرته دامك تغيب أنت لامن غبت حتى مرايتك صارت حزينة ... كيف ماتبغاني أحزن وانت لي حظ ونصيب الهدايا والرسايل والمكاتيب الثمينه ... والليالي والقمر والريح والكون الرحيب كل ماتبعد تجيب الشعر ليه من يدينه ... وتقعد جروحي تودي في الطواريق وتجيب يابعد كل القصيد ونزوة احداه وانينه ... لاذكرتك لاح بيت وطاح ورد وفاح طيب وان نسيتك ما نساني صوتك المبحوح لينه ... ياخذ لجرحي بثاره من خطاياك ويطيب وبعد هذا جاي ترمي ذنبك بوجه المدينه ... ما دريت ان المدينة كلها شمعة غريب |
|--*¨®¨*--| الرســـــالة |--*¨®¨*--| يا صاحبي جيتك اشكي لك من احوالي ... جيت وما دامك رفيقي ليه اطولها العلم وما فيه يا أول واخر آمالي ... عندي رسالة ولا ادري كيف اوصلها للي سبتني وأنا من قبلها سالي ... ابيك توقف معي وتروح تسألها وش فيها تفتح علي أبواب عذالي ... وتحمّل النفس حاجة ما تحملها وش فيها رغم الوفاا تتركني لحالي ... وأنا لجفاها تركت الدنيا بأكملها ان كان هذا زعل علمها يالغالي ... وما كان قصدي ورب البيت أزعلها علمها واللي يخلي قلبك الخالي ... عن ضيقتي وين وصلت من تجاهلها علمها كم لي وأنا ماشلت جوالي ... كله علشان ما أقلب رسايلها وعلمها وشلون لا مرت على بالي ... اروح وأضم صورتها وأقبلها وعلمها وشلون انشغل عن كثرة أشغالي ... وأسرح و أغمض عيوني وأتخيلها علمها عني وعن همي وغربالي ... علمها عن كل حاجة في تجهلها وان شفتها دنقت تبكي على حالي ... انسى الكلام وتذكر كلمة وقلها قل شاعرك يعتذر ويعاهدك تالي ... انه يرتب حساباته من أولها ويقول حتى القصيد اللي على بالي ... والله ما عاد اكتبه كانه يزعلها |
إقتباس:
رائع اختيارك أختي الحنين. وهذه القصيدة لها ذكريات جميلة معي شكرا لك ايتها العذبه .. |
الرائع هو مرورك الكريم أختي الحبيبة ... :) |
|--*¨®¨*--| اللي تركني |--*¨®¨*--| اللي تركني وأنا في عـز غربالـي ... بعد الشدايد وش اللـي ذكـره فينـي يبغى زماني يعود ويرجـع الغالـي ... وشلون يرجع بعد ماطاح من عينـي لا الوقت وقته ولا له شي في بالـي ... أنا نسيتـه مثـل ماكـان ناسينـي ياما تمنيت نظـره منـه فـي حالـي ... ياما تمنيـت صوتـه لـو ينادينـي وأقول لأظلم علـي الليـل بلحالـي ... الله يجيبـه يشتـت غربـة سنينـي من كثر ماكان طيفـه دايـم اقبالـي ... أحيان أحسه معي وتضمـه ايدينـي ولامن تنبهت ليـن وجيـه عذالـي ... كلٍ علـى ماطـرا بالـه يسمينـي ليته تركني بعـد هـذا علـى فالـي ... زي ماتركته بعـد قتلـه بساتينـي من بعد ماصار جاء بلسانه الحالـي ... يبغى يرجّـع زمـانٍ بينـه وبينـي قولوا له إني ما أحبه كثـر ترحالـي ... أو لا .. حرام يتضايق وإلا يبكيني؟؟ قولوا له إني أحبه .. بس من تالـي ... إن راح وإلا رجع ماعـاد يعنينـي |
|--*¨®¨*--| خــلاصة |--*¨®¨*--| يا صغيّر السن قدرك طاحت ابراجه ... الجرح خلّى الصخر ينطق ونطقني خلاص ما عاد تعني لي ولا حاجة ... رح جعل ربي يوفقك ويوفقني من بعد ما كنت نور العمر وسراجه ... اليوم صرت الظلام اللي يطوّقني عطيتك أكثر من اللي كنت تحتاجه ... أسرفت فالحب لين الحب وهّقني خلاص مالي ومال الحب وازعاجه ... مالي ومال الدروب اللي تضايقني تعبت أضم البحر وأهدّي أمواجه ... تعبت أجامل و أشوف الوقت يسرقني شكواي للي عليه الضيق وافراجه ... اللي اذا شاء يرحمني ويرزقني اما انت يا بو جبين عقّد حجاجه ... لا عاد تسأل علامك منت طايقني ؟! الناس كلٍ على دربه ومنهاجه ... و أنا عن الناس ما به شئ يفرقني الا اني دايم احب الصدق واواجه ... مخلوق والله على هالوضع خالقني حتى رفيقي ضماد القلب وعلاجه ... على كثر ما اتمسك فيه صدقني لو أدري انه مرافقني على حاجه ... لأمسكه حاجته و أقول فارقني |
غاليتي الحنين 00 الف شـــكر ،، قصائد اكثر من رائـــعه ،، اسمحي لي اشارك معك بقصيدته الجديدة ،، قصيدة الأســـــرار 00 يا رفيف الماء .. وفجر العيد .. وأحزان المواني يا أكثر أهل الأرض طيبة قلب .. وأسرار دفينه المكان اللي هنا .. مليان ضحكات ، وأغاني ! والكلام اللي بغيت أقول .. يحتاج لـ سكينه ! شوفي الركن البعيد هناك .. كنه صدر حاني هذا هو اللي يليق بـ شاعر وبنت حزينه ! أنسي الشارع ، وعتمات الزوايا، والمباني هاتي يدينك نلف الغيم ونشكل مدينه !! عندي الليلة كلام وصمت .. وأخاف الثواني .. تظلمه .. أو تظلم اللي فيه كم ضاعت سنينه بس لازم تسمعين اللي أبي ولا تراني لو بـ أعيده لك .. نسيت .. ورحت أقول اللي تبينه شي واحد قبل ما أبدأ .. ما أبي أي شي ثاني يخطر فـ بالك .. وأنا أكشف لك شعور تجهلينه ! إن أنا .. وبكل ما تحمله "أحبك" من معاني كنت،وراح أبقى أحبك .. لين .. مدري وش هو لينه !! بس والله ماقدرت أنسى .. ولا همي نساني .. لا ذكرت إنسان .. فيه أسرار مابينك وبينه كل ما تطري علي فكرة هواك الأولاني أشعر إني أنطعن مليون مره من يدينه! أشعر إن عيونك.. الله ما خلقها إلا عشاني ! كيف كانت تبتسم له؟!.. قولي إنك تخدعينه !! صورة إنه كان يمسح دمعك .. تزلزل كياني وكيف كان يلم شعرك .. ويتبعثر في يمينه حتى اسمك يوم رحت أدللـه .. حظي رماني .. بنفس الاسم اللي يقول .. بذمتك ماهي غبينه !؟ وكني اللي .. كل ما أناديك بالاسم الفلاني أطلب النسيان .. يترك منه شي تذكرينه !! لا تظنيني أناني .. لا .. أنا مانيب أناني لو سلمت من الغرق . بـ أموت في ظهر السفينه! يا إني ما أكمل،وأعاني .. أو أكمل ثم أعاني .. كل ما اسمع طاري اسمه .. أو تجي عيني فـ عينه! أيــنا كان الضحيه ؟.. وأينـــا اللي كان جاني ؟ مدري !.. ولكن قراري لازم إنك تقبلينه: مثل ما أكره فكرة إنه واحد ياخذ مكاني ما أقدر أجلس في مكان إنسان.. كنتي تعشقينه! // فهد المســاعد // |
Powered by vBulletin Version 3.5.1
Copyright ©2000 - 2024, Jelsoft Enterprises Ltd.