الملحــــــمة

قصيدة للشاعر المعروف / محمد الدحيمي

ليلة البارح رقد بعضي ينازعـْـه أغلبي ... ليلة ٍ بآخر ليال الحج غدرا مظلمه
كني اللي نايم ٍ مابين داب وعقربي ... هي حقيقه هي خيال ٍ سج؟ هي حلم ٍ أحلمه
قمت من صوتٍٍ دعاني وانثنيت على ركبي ... والا أنا ناظر قبالي ... ناقة ٍ متكلمه
يانيازك لو عرجتي فوق دخان أشهبي ... علقي في زئبقي في مارج ٍ متنجمه
قلت وش قومك وش انتي واصدقي لاتكذبي ... جاوبتني شاعره من جن وانظم مبهمه
وقبل تنشدني ترى اسمي "ابكمه" ياصاحبي ... وأدّر كانك مادريت ان اشعر الجن ابكمه
اسكن "البرلس" على وادي يسمـّى المحلبي ... في نهاية طور موسى جل رب ٍ كلمه
جيت ابسمع منْك شعر الوصف وآشب إلهبي ... كان توصف مثل جدك ياعسى الله يرحمه
جدك اللي من سمع شعره ذهل واستغربي ... مثل وصفه لآجمل سنينه بـ نوق إمدرهمه
قلت حياك إرحبي ثم أرحبي ثم أرحبي ... في ضيافه شاعر ٍ يثني القصيد ويلجمه
شاعر ٍ ورّد هواجيسه على ماهو يبي ... واعذب الشعر أصدقه في أغربه في أجهمه
من شيوخ ادحيم جدانه وخاله تغلبي ... ان طلع عز وشرف وإلا طمن في مكرمه
قد ورثت الطيب قبل الشعر من جدي وأبي ... ولابتي سيل الحقوق اللي تزابر مرزمه
واشهد اني من سنام الشعر دسـّـمت إشنبي ... وهاتي اشعر شاعر ٍ بالجن نذر ٍ لآفحمه
ودام يستهويك شعر الوصف بانظم وأطربي ... ع القوافي نفسها قدامك الحين أنظمه
واصف ٍ حلو الترايب والقوام الاكعبي ... وابتدي بسم الله الرحمن سمعي ياابكمه
جادل ٍ بحجاجها فجر ٍ زبنه المغربي ... عنز ريم إنثرتني بين خرز وسلهمه
في سواد اعيونها فاجر يقول انه نبي ... كل صابي يتبعه وايصدقه يهدر دمه
وفي لحظـْـها حاكم ٍ سفاح متهور غبي ... يطلب الرحمه لميته يوم شبع إمن إلحمه
وفي هدبها مدهل ٍ راعيه شيخ ٍ يعربي ... اجودي ٍ نوب يعزمني ونوب أعزمه
راعني خال ٍ بوجـْـنتها تقل ْ عبد إمسبي ... حارس ٍ روض الزهر من كل يمنا مجرمه
ومن قليب اللون جا ثعبان فضي لولبي ... من لعق سمه يقول الشهد مر وعلقمه
كلما بلل شفق ْ عنـّـابها قال أعجبي ... راح ينشد لولها هي مشركه هي مسلمه
يوم جا اللول إبـ يجاوب قلت ربي روف بي ... ناض براق الثمان وسال وادي عكرمه
الندى عود ٍ غدا بأوجانها طفل إيحبي ... والعطر ْ راعي بأثرها إيحدي إبله واغنمه
ومن جدايلها تجلاّ فارس ٍ قال إلعبي ... واستفزي الريح يابنت الهبوب المدهمه
وفي نحرْها كافر ٍ لعيوني إيقول أذنبي ... كل ماياكل رطب شوفي حذفني بعجمه
في ترايبها ثمر طاح إبنهم عين أشعبي ... جا يقول إلخصرها المياس حذرا مااتهمه
انثنى الخصر وتمايل قال قلبك مرّبي ... توه اللي كان ضيفي وانظر آثار إقدمه
الجمل هج وتذيـّـر يوم شاف الاحدبي ... الحدب قال اش معه ْ ماينظر الحدب إسنمه
كل نظره روّحت حبلى تجي معها صبي ... راح جوعه ينشد امه وش بلاها تفطمه
لامشت في مشـْيها خطو الكحيل الأشهبي ... انثنت حايل ثنيـّـه لا رباع ولا اقحمه
كنها لا لدّت النظره خجل عـ المنكبي ... صادق ٍ يستودع الفتان سر يكتمه
في خجلـْها بنت شيخ ٍ طاحت إبحب اجنبي ... في غنجـْها مهرة ٍ تتلي الصهيل ابهمهمه
في رضاها حصني يتلذذ بمحض اعنبي ... في عتبها ظالم ٍ حطوه قاضي محكمه
لااقبلت مثل الحمام ولا ادبرت مثل الظبي ... لا اوقفت طير الهداد ولاجلست تقل ارخمه
لا وردْتي يامغاتيري على العد ّ أشربي ... وهيجني ياحي ذا المبسم ومنهو مبسمه
مبسم ٍ يوم ايتبسم كل عرق ٍ صاح بي ... و تلني قوم ألثمه نذر علي ّ إن تلثمه
اذن الفجر و وقفت إلا " ابكمه" تقول اطلبي ... يالدحيمي هالقصيده سمها بالملــحمه

تحياتي

:)

كني اللي نايم ٍ مابين داب وعقربي...هي حقيقه هي خيال ٍ سج؟ هي حلم ٍ أحلمه
{{ وصف عميق لإنسان عرف الدنيا وعاشها بكل حذافيرها..}}


يانيازك لو عرجتي فوق دخان أشهبي...علقي في زئبقي في مارج ٍ متنجمه
{{خيال إبداعي .. رائع }}



بالفعل قصيدة رائعة بكل معنى الكلمة،،قرأتها أكثر من مرة..
أعجبني فيها عمق فكر الشاعر واتساع مداركه..

أخوي الوافــــي ..
مشكور ماقصرت والله.. تسلم يمينك..

أخي الفاضل / السيد عبد الرزاق

شكرا لمرورك العاطر من هنا ، والتعليق على الموضوع
وقد نسيت أن أذكر أن اسم الناقة التي تتحدث مع الشاعر إسمها ( ابكمه )
لهذا جاء البيت الأخير واصفا أنها عندما رفع أذان الفجر وقفت من الجلوس وقالت :
طلبي أن تسمي هذه القصيدة بالملحمة
وهي بالفعل ملحة في الوصف والنظم في نظري

تحياتي

:)

صدقتي أختي الكريمة
فالقصيدة رغم بعض الإنكسار في أبياتها الأولى والتي ربما كانت من الناقل
إلا أنها بالفعل رائعة في الوصف ، والأسلوب
فمن يقرأ القصيدة وهو يملك بعض الثقافة البدوية سيجد فيها عمقا كبيرا في المعاني
والشاعر الدحيمي غني عن التعريف ، وهو مشهور بجمال ما يكتبه وجزالته

وشكرا لمرورك العاطر من هذا الموضوع

تحياتي

:)

" إعجاز في إيجاز "
هو ما أستطيع أن أقوله عن ردك أختي الفاضلة
شكرا لمرورك العاطر من هنا

تحياتي

:)

وجودك في هذا الموضوع هو الأروع أخي الكريم
فشكرا جزيلا لك على ذلك

تحياتي

:)

ليلة البارح رقد بعضي ينازعـْـه أغلبي ... ليلة ٍ بآخر ليال الحج غدرا مظلمه