من مظاهر كبر السن عند الرجال والنساء؟؟
 

من مظاهر كبر السن عند الرجال


1- يبدأ الأولاد وعيال الأقارب يقبلون راسه.
2- يقدمونه في الدخول والخروج ويقومون عن مكانهم علشانه.
3- يسأله البعض إذا كان يصبغ أم لا.
4- يستغرب البعض من ازدياد الشيب فيه ويسمع عبارات مثل: ( وش هالشيب) أو( كم عمرك) أو (مين أكبر أنت أو فلان).
5- يسمع عبارة مثل ( أنت في مقام الوالد ) أو ( أنا من أولادك ).
6- تكثر وفيات أقرانه من المعارف والأصدقاء.
7- يبدأ الشباب بالتحفظ أمامه في سوالفهم وعباراتهم وحتى في جلساتهم يعني يصيرون رسميين...وبعدين ما يحبونه يجلس معهم مدة طويلة.
8- يبدأ الإحساس بالحرج أوالخجل أحيانا من تصرفات كان يقوم بها سابقا.
9- عند السلام عليه وهو جالس يسمع عبارة:"استرح والله ما تقوم".
10- يبدأ يسمع بكثرة نصائح الآخرين بأن هذا النوع من المأكولات أو المشروبات يقوي ويرتاح لذلك.
11- يلاحظ ازدياد مجاملات الآخرين له في كل مكان، المحلات العامة وغيرها وتقديمه عليهم.
12- يبدأ بمحاسبة الآخرين الأصغر منه سنا والتشره عليهم، باعتباره الأكبر وله الحق.
16- يبدأ ما يحب السهر ولا يميل له.
13- يكثر من عبارات أول والحين، يعني يقارن بين ما يحصل في الوقت الحاضر وما كان في السنين الماضية.
14- يشعر بألم في المفاصل والركبتين.
15- يتجنب الجلوس على الأرض ويفضل أن يجلس على الكرسي.
16- يجلس ويقول مستندا على يديه وبكلفه اشوي وربما يصحب ذلك يقوله ((يالله يا قوي)).
17- يبدأ يحس بضعف في نظره ويحتاج إلى نظارات للقراءة.
18- يبدأ بطنه يكبر عن المعتاد رغم إنه ما ياكل كثير.
19- يصعب عليه لبس السروال وهو واقف وكذلك الشراب.
20- يا يحب كثرة المشاوير بالسيارة ويفضل الركوب مع الآخرين عن قيادة السيارة.
21- يبدأ يروح لدورة المياه بكثرة (من تأثر البروستات) عند الرجال فقط
22- ما يحب الأصوات العالية وينزعج منها و لا يحب لعب الاطفال بجانبه.
23- لما يسجد ويضع يدينه على الأرض ينتظر اشوي لمدة ثانيتين حتى يلتم جسمه ويتواسى ثم يتم السجود.
24- يبدأ شعر راسه يحت وتطلع له صلعه في مقدمة الرأس أو وسطه.
25- يبدأ شعر هوادبه يتهدل ويبدأ يفكر يقصه.
26- يبدأ يجمع المسامير والصواميل المرمية.
27- لو دخلت يدك تحت مرتبة سيارته تجد عدد كبير من أكياس البلاستيك الفاضية (يقول يمكن أحتاجها).
28- كل مادخل البيت يطفي اللمبات ويسحب الأفياش.

شتتبع مظاهر كبر السن عند النساء قريبا إن شاء الله:p :)

بالانتظار ياابني بارك الله فيك:p

من مظاهر كبر السن ((نساء))

1- كل اللي فوق عدا بعضهم!!!!
2- تطول في الصلاة اشوي وأحيانا تقوم اتسوي لها كم شغله و احجاب الصلاة عليها ثم ترجع وتكمل اتصلي.
3- تبدأ تعمل فساتين واسعة اشوي وتعمل فيها مخابي للمفاتيح والحلاوة لعيال بناتها.
4- تبدأ ما يعجبها بنات هالوقت ودائما تشوفهم غلط.
5- تستسلم للأمر الواقع وتبدأ تقول لجارتها اللي أصغر منها (يا بنتي) أو( اعتبريني مثل أمك) وتقول لبنات اخوانها وأخواتها لما تبي منهم شي يا بنتي.
6- تبدأ تحب تخزن الاقمشة الجديدة ولا تخيطهم.
7- تبدأ اتقفل على كل شي ولا تحب تفتح أماكن التخزين ومعها أحد.
8- تكشخ أحيانا وتتجمل ويوم اللي تتجمل دائما تمدح في عيالها وأنه كل من خيرهم.
9- تبكي بسرعة ويحن قلبها أكثر لما تتذكر أهلها اللي ماتوا أو تسولف عنهم.
10- تبدأ تكثر من الدعاء للي حولها ودائما تقول له (الله يبلغني أشوفك معرس أو عروس)
11- ما تحب صجة الأطفال ولا ترضى أحد يهاوشهم أو يضربهم قدامها وتعصب وتعتبر هذا تضايق منها هي.
12- تبدأ اتخف من الروحة للسوق ودائما تخلي بناتها يشترون لها اللي تبي.
13- تبدأ اتغطي شعرها معظم الوقت واتخش الشعر الأبيض.
14- تبدأ تتابع إذاعة القرآن الكريم، ودائما تستشهد ببعض الأحاديث اللي تسمعها أو المواعظ لصالحها.
15- تفهم أحيانا كلام أو مزح بناتها خطأ وتزعل، وعلى البنات طبعا تفهيمها وإقناعها.
16- أحيانا إذا جاء طاري العمر تقول أنا من كبري بس الشيب (تعني الشعر الأبيض) طلع بدري من الهم.

واللي عنده إضافة على الطرفين يعطينا إياها:)

تابع لمظاهر الكبر عند الرجال

29- يلبس شتوي في الصيف وكل يوم يتكلم عن الطقس ( اليوم برد يفتت العظام ودرجة الحرارة 40 )

30- كل يوم يخرج من لسانه اعذب الحكم والنصائح للجيل الجديد .

31- يمد رجليه ويطلب منك ( تهميزها )



اذكر جدي الله يرحمه وصل ل 90 سنة وكان يكره يمسك العصا عشان مايحسس نفسه بأنه شايب . الله يرحمه كان اذا شاف شي مايعجبه وتغير الزمان عليه يقول ( ياحبيبي أنا وش بيدي ؟ * * * كلما عدلت واحد يميل الثاني )

كبار السن هم نور البيت ولا احد يتنقص منهم رجاءا , لأن عشقي ( الشيبان ) احبهم واحب سوالفهم.