أرشــــــيـــف حوار الخيمة العربية - الشرف غالي ,,, تعالوا اقولكم السالفة

يالله صباح خير .. ياشين القومه الصبح من النوم .. كنك نايم بخلاط سمنت موب بسرير .. المهم قمت ورحت للمغسله ومير اغسل خشتي وبعدهاكشخت بثوبي وشماغي حقات العيد (ترا اليوم موب العيد بس شاريهن للعيد) وناظرت الساعه .. ايه تونا بدري الساعه 6 المغرب .. رحت اتقهوا مع العجوز وهي تطالع فيني وتقول يخزي العين من وين نبي نلقى لك بنت بحلاتك نجوزك انت (عاد انا مصدق يعني انه مهوب القرد بعين امه ) ورديت ايه ازين ما ابي اعرس (يعني انه ماقطر سعبولي على العرس ابد) المهم عقب القهوه والسواليف واللازم منه دقيت سلف الموتر ورحت ادشر (ترا موتري كشخه) قلت اييييه ياولد وين تبي تروح اليوم .. نمر الموسى شوي .. وش الموسى بلا قراوا انت فشلتنا .. رح لم قزاز .. بس عاد وش ابشري من قزاز .. يالله عشان اذا مريت العيال بالقهوه اقول اني كنت بقزاز اليوم .. بس المشكله بنات هاليومين متوحشات يخوفن تقعد وحده تنفتن فيني وتتعرض لي والا شىء .. (من زينك عاد انت ووجهك).. رفعت عيني في المرايه وناظرت وجهي .. حرام والله اني كلي ملح (ايه هين يارامي) .. اخذتني الهواجيس ولادريت الا انا قدام العقاريه قلت ايه فرصه آوقف عند المحل اللي برا آخذ لي بطاقه تلفون (خبركم الجوال مفصول!!) لبقت الموتر (عييت على الهندي يغسله ومير يخلين اوقف بآخر الدنيا وأدقها رجل للمحل) عاد دخلت عند المحل وقلت له عطنا زجول ام خمسين .. فتحت البوك والا ماهناش الا فكه .. قلت له عندك ذيك حقة الفيزا قال لا وقلت ولا صراف قال لا (قلت بيني وبين روحي اشوا) قلت له طيب باصرف واجي وطلعت ووقفت على درج العقاريه اهوجس في تصاريف الدنيا وشلون قضى الراتب والشهر مابعد بدا هل ياترا الخدامه تسرق من مخباتي ام انني مسرف والعياذ بالله .. مادريت الا ذاك السوبربان اللي مقبل من آخر الشارع مظلل داير مادار ولوحته اللي قدام مفكوكه .. مدري ليش تسمرت في مكاني حسيت بالخطر القادم (الحاسه السادسه اشتغلت) المهم ان السوبر وقف جنبي وانفتحت الدريشه اللي ورا السواق وهوب ذا اللي يسحبني مع الدريشه ولا دريت الا انا جوا .. افا واللة أسوأ كوابيسك تحقق .. الجمس يسوقه كور يروع مدنق عن التندنه من طوله وورا فيه 13 بنت كل وحده تقول للثانيه وش انتي .. البلا انهم مسلحين وقالوا لي اخيرا وقعت ياحلو .. من اول الليل وحنا ندور صيده واشوا اللي لقيناك ياقمر 14 انت .. قلت لا والف لا لا تحاولي انك تراوديني عن نفسي يا فتاه قالت ومن شاورك انت ووجهك .. عاد انا حاولت اطل مع الدريشه قلت يمكن اشوف احد حولي استفزع به لكن ماش بمقطعه ومير انط لزاوية الجمس واطلع مفك العجل من مخباتي واصبخ راس اقرب بنت واقول والله ياللي تقرب لاشلخ جبهته ومير يضحكون كلهم !! خويتهم تخر دم وانا مستهيش والشرار يطق من عيوني وهم يضحكون وقاموا يقربون كلهم لمي جميع .. قلت يالله ياولد الحين اليوم يومك والله لاوصل الدم للركب واخلي اللي ما يشتري يتفرج وطحت فيهم ركلا وصفعا ولم يكفيني مفك العجل في يدي اليمين بل استليت ابو جلنبو ووضعته في يدي اليسرى يوم حمي الوطيس .. وبعد ساعات وساعات بدت كأنها ايام من السجال داخل ذلك الجمس الاسود بدا لي النصر قريبا ققد استطعت ان ارى تندة الجمس بين الاجساد التي تطايحت فوقي تحاول ان تطرحني وبعد ان بدا النصر قريبا قلت لا الهلال احسن ونطيت على حيلي وتطايحوا حولي والا مافيهم يقدر ينفس الا ثنتين غير زعيمتهم (زعيمتهم القشرا اللي سحبتن مع دريشه الجمس) واشلخ راس الاولى بمفك العجل واصك راس الثانيه بابوجلنبو وايلاهن طايحات مغمن عليهن واناظر الزعيمه والاه تناظرني بنظره فتح الرؤوس يوم قربت لمي ومير تتغير نظرة فتح الرؤوس الى نظره بقر البطون .. ونطي علي ذيك النطه ومير اوخر واصبخه مع راسه صبخه مزدوجه باستخدام ابو جلنبو ومفك العجل سوا .. ومير تلتفت لمي وهي مبتسمه وتمسح الدم من راسه باصبعه وتلحسه وقالت جاك الموت ياتارك الصلاه .. واصفقين بكف يوم قامت عيوني تصافق وصكتني الدوخه وخنقتني العبره .. قلت مابه الا اللي به هذى ماينفع معه الا السلاح السري ومير ارفع ثوبي واسحب ال LMG من ربقة السروال واطلق الطلقه الاولى واتبعها بالثانيه ثم الثالثه التي اهجدتها تماما لترتمي امامي كالنمر الذبيح فرفعت رأسي وقلت هعععع ماعاد الا هي تبي تخطفوني وتضيعون شرفي .. فتحت باب الجمس ونزلت وقعدت امشي وانا اشاهد شروق الشمس في طريق رماح وانا امسح جروحي راضيا بعد هذا النصر الكبير واقول الحمد لله اني سرقت فلم الكاميرا والا كان فضحوني بالصور.
_________________________
_________________
___________
____