البارحة نومي هموم وكوابيس
وأبعد من الجوزاء علي الوناسة

نفسي وانا والليل والهم وإبليس
وكلٍ على الثاني يبي له رياسة

ما أدري ظروف أو حب وإلا هواجيس
او الثلاثة كلهن فوق راسه

أو أن عقلي صايرٍ فيه تنكيس
وللعقل في بعض الأمور انتكاسة

يا لايمي لا تلومني قبل ما تقيس
اللوم للميّس يزوّد بياسه

والشمت طبعٍ الرجال الهلابيس
أهل الهدف والنمنمة والنجاسة

وأنا معي عقل ومشاعر وأحاسيس
وعيون وأخلاق وقلب وشراسة

ولكن حصلي من زماني عواكيس
وعجزت هذا الوقت لعرف لناسه

هذا يموهنا بهرج وتماليس
وهذا تجاهلها عناد وخساسة

وهذا تذعذع له هبوب النسانيس
وهذا تقول مغمغم له بطاسة

وناس على ناسٍ تجند جواسيس
لاجل الطمع والسيطرة والبلاسة

وناس تهجس من غثى الوقت تهجيس
وناس على ناس تجيد السياسة

وناسٍ تبي عرش مثل عرش بلقيس
وناس تبي لو يوم فرقا التعاسة

وللناس بالدنيا حظوظ وقواميس
واللي غرف برميل واحدٍ بكاسة

وليا حصل لك من زمانك عواكيس
أصبر وللصبر الجميل أنعكاسه

تدرسك دنياك من غير تدريس
ما هو لزوم أنك تدرس دراسة

ترى الردي لو فيك سوى النواميس
ينقد على نفسه ويرجع لساسة

قنعت واقنعني كتاب الوساويس
لكن عقب ماصرف شيك الفلاسه ..

للشاعر .. البحر الميت ..