[منال درويش]

مفتتح :
سكت الكلام ....
لما الكلام ضاعت معانيه والسلام
لَّما يدوب قلب الحجر
عشق السفر بين الضلوع أوهام
سكت الكلام ...
لما الكلام مرر فِ قلب الحلق
و اتلخبط الباطل فِ قلب الحق
ما دريت أنا ....
امتى اقول الآه ...
ولا أقول اللأ...
سكت الكلام

(1)
علمتنى الدنيا يا أمه
ازاي اعوم
ضد تيار الهموم
علمتنى كيف راح ازرع
نجمتي وسط النجوم
لجل ما تطرح نجوم
علمتنى الدنيا يا أمه
ازاي أكون
شجرة صنبور ولا شجرة سنديان
قلب ما يقدر عليه الف جان
لو يخون النور طريقه
يركب الحلم الحصان
علمتنى الدنيا يا أمه
والحقيقة طعمقها في القلب زاعق
والانين اللي محاوطنى
دايس الأحلام ومارق
واحنا في السكة الَمفارق
كالغريب اللي مسافر
تارك الدنيا ومِفارق
علمتنى الدنيا يا أمه
ان حلمى لو ملكته
مش ح ياخده منى ناهب
ولاَّ سارق ...!!

(2)


وباذاكر واشقى وباتعلم
وأحلم بالشمس وبنهاري
واشيل الحلم المتلمل
وأذوق بالفجر خضاري
وادوب في الحلم وما اشبعش
وأطاوع بكرة وما احنيها...
راسي والعز اللي ماليها
ورغيف العيش واللي خلقنى
شهاداتى في الدنيا كتيرة
متعلم والعمر سرقنى
ويقولوا على الطبقة فقيرة ؟!!
شهاداتك ايه انت يا افندى ؟!!!
اسكت وتضيع منى الكلمة
شهاداتى ؟!!
يتلجم صوتى الجوانى
يتبعتر حلم ورا تانى
شهادتى مش علم أخذته !!!
ولا درس من الدنيا انا شوفته
شهاداتى كرت من اياهم !!!
ولا عمري شوفته ولا عرفته
يتلجم صوتى الجوانى
وأدور علي الكارت فِ جيبى
وبادور ليه ...!!!
هو أنا مش وطنى يا بلادي
وحلمى زرعته لولادى
محتاج أنا واسطة عشان أخدم ؟!!!
ويضيع الحلم المقتول
ويروح علي بن المسئول ؟!!
وأرجع
مالقيش ....غير لقمة عيش
مغموسة في المر العلقم
يا بلادى يا أعز ماليه!!!
امتى ح تكونى في يوم ليه؟!!
ده انا عاشقك من ساسى لراسى
وكيانى انت واحساسى
يتلجم صوتى الجوانى
ويضيع الحلم ورا التانى
ويضيع الحلم ورا التانى