[*اليشمـــك*]

السلام عليكم

الأمير الشاعر عبد الرحمن بن مساعد ..
ظاهرة ..
حالة خاصة ..

تعالوا نستمتع معاً بقراءة رائعة من روائعه .. وهي إن لم تكن الأكثر صدقا وتعبيرا .. فهي بلاشك الأكثر ملامسة لواقعنا .. المضحك المُبكي .


صدق أولا تصدق ..

كل ما تباعدت المسافة بين الرغيف والجوع .. تلقى الفرح أصدق !

صدّق أولا تصدّق ..
إذا غدت كل المشاكل .. جوع الصغار ..
وسقف(ن) يداريهم قبل يصحى النهار ..
تلقى الشعور أعمق !

صدق أولا تصدّق ..
كل من قفل درب .. انفتحت أبواب ..

صدّق أولا تصدّق ..
مافيه أحد طيب .. للطيبة أسباب!

صدّق أولا تصدّق ..
قليل من يعفي ويسامح ..
كثير ودّه ينتقم ..
بس ينتظرله وقت سانح !!

صدّق أولا تصدّق ..
القناعة كنز يفنى ..
ولو كل من ياخذ قنع ..
أو كل من ياكل شبع..
كان الفرح غطّى شوارعنا !

صدّق أولا تصدّق ..
كل النهايات البداية …
وأحلى البدايات النهاية..
وكلنا رغم القساوة الظاهرة …
نبكي قدّام المراية ..

صدّق أولا تصدّق ..
فيه مطوّل لحيته ..
والثوب يلمس ركبته ..
وماقرا في الشهر آية !!

صدّق إن الشعر صِدقه أعذَبه ..

ودّي أحكيلك حكاية وقبلها أبغى لسؤالي أجوبة ..

المال ..
المال هذا هو وسيلة .. ولا غاية ؟!
لو ماهو غاية ..
ليه الحروب ؟!
ليه الحسد يملى القلوب ؟!
ليه السلام اللي تمنّاه الشعوب ؟!
وليه الفقير المعدم الكادح ..
بهجته تملى الملامح ..
إذا لقى ذاك الثري .. يعطي هذيك المطربة مليون ..!!

وهذا الثري لمّا سرى من حفلته ..
وقّفت سيارته عند الإشارة ..
وجاه شايب يطلبه..
الهم عافي في وقاره ..
دّق بأصابع متعبة على الشباك ..
قال أنا ياسيدي مديون ..
وانته الكريم يحكون عنّك في الجرايد..
و(اتقال ) في جودك قصايد ..
ويقال انك للأرامل واليتامى عون …
ما أبغى منك إلا حاجة ..
لبس الشتا لجل العيال ..
الله يسددلك خطاك ..
أعطني مما عطاك ..

واعتدل راعي الملايين الكثيرة في جلسته وعقد حجاجه .. ثم قال :
ألا ما أثقلك وأغباك ..
ليه ياخي ماتشتغل ؟!!!
انته كسول ومستغل !!

وطلّع من المحفظة فكّة ..
رماها وقفّل الشباك ..!

أبغى لسؤالي أجوبة ..

ليه البِّر والتقوى مليان في جرايدنا؟!
وليه هموم هالشارع بعيدة عن قصايدنا ؟!
ليه الفساد؟!
ليه الكساد؟!
وليه الحروب ؟!
وليه الحسد مالي القلوب ؟!

وشو الجواب؟!

أتمنى إنه مايكون المال هذا هو وسيلة ماهو غاية !
هذي الكلمة النبيلة .. اخترعها أغنية لجل مسكين(ن) شقى يرضى بقليله !!
وصدّق انت أو لا تصدق ..
ماني الشخص المثالي ..
كل مافي الامر إني شاعر(ن) ماهو يبالي كان صار اللي أقوله علقم أو صار حالي..

كل مافي الأمر إني أستريح ..إن مشى بي مركبي عكس اتجاه الريح ..
وماأبرّي من الخطى نفسي ..
واللي أجاهر به .. مثل همسي ..

صدّق إني ماني الشخص المثالي ..
كل مافي الامر إني أجمع إحساس الحواري وسط صدري ..
وأنقل الواقع لشعري ..

كل مافي الأمر إني شاعر(ن) مطرود من جنّة خيالي …

صدّق إني ماقصدت إني أكون صوت للي مايبون ..
صدّق إني.. ماني الشخص المثالي ..

ولاّ تدري ..

لاتصدّق !!