يـاريف قلبي للمسـايير قم شب *** وحـط المنـاره في طويـل الضلالي
عقب تشق لها لجزل الحطـب جب *** وهات النجر وأحضر جـداد الدلالي
ثـلاثن الهن راعي الكيف يطـرب *** وسوطهـن ضمر والآخـر جـلالي
وبطونهن ماخذن اسبوعن عن الرب *** وجنـوبـهن صـفرً تـلالا تـلالي
والرابعـه ملقـامةٍ لونـها أصهب *** حيـث إنهـا للنـار دايم تصــالي
ولاجبت كل شروطها اللي تطـلب *** إجلـس عليهـن يازعيـم العيـالي
وإحمـس لنا بريـة ٍحبهـا أشهـب *** وبهـارهـا هنـدي ومـاهـا زلالي
وإعـرف ترى قانونـها مايـخرب *** ونـدارهـا ينقـى وماهـا يكـالي
تراه مايصـلح لهـا كل مـذهـب *** ولاتقـبل الراضـه ولا الاعتجـالي
وليا حمست إحرص على حمسة الحب *** واعرف ترى الحمسه تبي وسع بـالي
تاخذ على ادنى الجمر فتـره تقـلب *** لين العـرق يطـلع سـوات اللوالي
ومن يـوم يطلع فالمبرد لـها كـب *** لـين النـدار ان كـان فيهـا يشالي
وليا خذت مقـدار للنجـر قـرب *** ودنـه بصـوتٍ يسمعـه كـل غالي
دنـه وخلـه للمسـايير يـجذب *** لاقـام صـوتـه لـلنشـامى يـلالي
يـوحونـه الـجيران لاقم يقنـب *** ويجـيك الاقصى والقصـير الـموالي
وعقـب تـدق البن لقـم وركب *** لين انـها تسمـح مـن الاجتــوالي
وقبـل تبهـرها عـن النار تجذب *** وتركـد شـويه لين يصـفى الحثـالي
وبـرويد في أحـدى المباهير تسكب *** مـن عقـب غـال الـهيل فيها يهالي
واعـرف ليـا بهرتـها يالمشــبب *** تـراه يكفيهـا مـن النـار صــالي
ثم اجـذها من يوم بالهيـل تقــلب *** ومـن يـوم تـركد صبهـا للرجالي
حـتى يجي الفنجـال منهـا لياصب *** بين الشقـار وبين لـون الشعــالي
أما اشقرٍ رايب مثـل بـول الارنب *** والا اشعـل يشـبه لـدم الغــزالي
يطـرب لها من كان للكيف يشرب *** كيـف النشـامى اللي من العيب خالي
واعـرف تراها عـادةٍ مـاتسيـب *** ولاينتقـدهـا إلا قصـير الحبـــالي
احـرص تخـلي عـادة الجد والاب *** ما هم عـليه اول عـليه انت تــالي
تـراك مـن كل المنـاسب معـرب *** مـابين جـدان وعمـام وخـــوالي
وابيـك عـن منهاجهم مـا تجـنب *** ان كـان فكـنك بنـات الليــالي
وسلامتكم
المسك