[صعرور افندي]

أول شي أحب أعرفكم اني جديد على هذا الحوار ..لكن ليس جديد شخصيا ً ولكن جديد أسماً فقط..ولا انا معكم منذ مبطي قلبً وقالباً
أبدخل في السالفه وبدون مقدمات
هذي السالفه صارتلي من يومين تقريباً..كنت في احد شوارع الرياض وكنت واقف عند الأشاره..وكانت ازره الباب ذاك اليوم مفتوحه..المهم مادريت الا واحد يفتح الباب ويركب بدون مايشاور او يستأذن؟؟؟
قعدت اناظره هو انا اعرفه ولا لا..المهم اناظر ؟؟ والله ياولد ماأعرفه
قلتله سم يابوي وش بغيت .. قال: أبغاك تكفى توصلني لمشيوير قريب هينا .... ورغم انه ركب بدون استاذان..لكني قلت ياولد خلك ازين منه ووصله نلقى من وراه الأجر
فتحت الأشاره ومشيت قلتله :وين تبغى اوصلك .. قال :قدام؟؟ وقعدت امشي وامشي وهو ساكت وكل ماسألته قال قدام ؟؟؟ أنا مااااش بدء الفار يلعب في عبـي .. قلتله : ألحين انا كل ماسألتك قلتلي قدام وشو قدام ذا..؟؟ لايكون حاره ولا حي وانا ماأدري..ألتفت علي وقال : والله انا مالي وجهه معينه؟؟؟؟؟؟ هو قالها ولا ماقالها وانا الي أسفط على جنب .. كني هاليموزينات الي إذا شافله زبون على طوول دق اشاره ولف بدون مايناظر ..
المهم وقفت وقلتله :انت وش تبي الحين بالظبط..قال: والله ياخوك الحال هاليومين صعب ..وماادري ايش المهم انه قام يشكيلي حاله ..الله يستر علينا وعليه ..يعني الزبده انه يبغى فلووس يعني(يطر،يشحذ)..قلتله: طيب وراء ماقلتلي من أول ؟ ليه تلف وتدور ؟؟
والمشكله انه مابان عليه انه وجه فقر بالعكس مشخص ومن احسن مايكون.. وانا وياه أبفهمه اني مامعي المبلغ الي هو طالبه ..لكن ماأقتنع..ليين قلتله تدري انك الحيين انت خسرتني على هالمشي بنزين ..وماأمداني أكمل كلامي الا وهو عاط .. لا ..ويرزح بالباب (يعني يصكه بقووه) يعني الولد معصب .. ؟؟ والله شي(شين وقوي عين)؟؟

والـلـه مشكله كل يوم والثاني طالعيين بطريقه يتسولون بها.. لأنـهـم مالقوا من يوريهم شغلهم ولا كان مايسوون كذا
حتى إشاره طريق الأمير عبدالله هذيك الأشاره دايـم احصل عندها ناااس من هالنمونه..بس ذووليك كلهم صغار .. والمشكله في ذوليك انك تصير منسجم وتحتري الأشاره تفتح ولو تلتفت شوي على يسارك ماتدري الا وهو حاشراً راسه وحاط خشمه على الدريشه وهو ساكت بدون مايتكلم ولا على الأقل يطق الدريشه .. والله ياكم مره ارتعت منهم( يعني قمصت ) بدال مااعطيهم فلووس اقعد اهاوشهم.. الـلـه يتوب عنا

وعلى العموم أقوللكم انتبهوا بس لااحد يخلي ازره الباب حقت السياره مفتوحه لا يصيرلكم مثل الي صارلي وتقولون ماقاللنا (صعرور)..
وعلى العموم انا آآآسف على الأطاله ،، وعلى ثقل الدم شووي

صـــعـــرور افـــنـــدي