ياصغيـر مـا يكبّرنـي لـقـب
ومايصغرني اليا انكرني صغيـر
ما خذينا الصيت من جمع الذهب
ولا نسابة شيخ أو قربـة وزيـر
كاسبينه من هل السيف الحـدب
الجنايز كـان مـا جـاك النذيـر
صيتهم نجم علـى راسـه لهـب
سمعوا الصقهان به واجهر ضرير
بالوفا تاريـخ ابيـض ينتصـب
لا حكوا بالحق حييـن الضميـر
ضيغمـي ٍ للسناعيـس انتسـب
لابة ٍ طلنـا بهـا عـرش كبيـر
عند حدك يا كثيـر الهـرج تـب
ولا تمر النـار وثيابـك حريـر
كان لـك عـز ٍ بذلـي فتعقـب
والله إلا تبطـي وحبلـك قصيـر
احسب انك من صناديـد العـرب
واثري ساترتك عباتك يا غريـر
ما حسب للسّوس زراع القصـب
والقرادة مـادرى عنهـا البعيـر
لو حسبنـا للحسايـف والتعـب
مابذرنـا ياالعصافيـر الشعـيـر
عن هلـك ابـراي لله احتسـب
الرجال اللـي مجاراهـم عسيـر
من قريش المصطفى وابو لهـب
والدغالب ما غشت عذب الغديـر
للرجال مـن الرجاجيـل العتـب
والزكاة اتحل فـي حـال الفقيـر
لعن ابو وقت ٍ غدينا بـه حطـب
تحرقـه نـار ٍ يثورهـا أجـيـر
ما ألومك.. الزمن سـوا العجـب
هو بقى غير الكرامـة بالجفيـر
ما أذل وراسـي يشـم المهـب
لو بقى من شمر ٍ طفـل ٍ غريـر
وما أهاب ولا يزلزلنـي غضـب
الشجاعة ورث والعاقـل غزيـر
يـا صغيّـر مـا يكبّـر باللقـب
غير منهو كان من دونه صغيـر