كان يا ما كان والقلب العليل اللي بصدري
لا لمح زولك خفق خفقة عن الباقي غريبة
تنتشي عيني فرح بك وانت عني ما تدري
حتى انا مدري ولكن! أشعر لطلتك هيبة
وتتعلق بك عيوني لين اشوف الزول يسري
واتبعك في ناظري واقول ياربي تجيبه
فزتي لك طيش ؟ مدري حب ؟ مدري حس فطري ؟
الوكاد انك نهبت القلب من صدري نهيبه
يعني وش اكثر من اني لا لمحتك فز عمري ؟
وصار يوم اللي اشوفك عيد عندي واحتفي به
يوم اشوفك ... احفظ التاريخ ميلادي وهجري
وارسم لعين المحبة قلب به سهم يصيبه
واتهجى كلمه ( ا ح ب ك ) واغنيها بشعري
واكتبك بين القوافي واتسمى لك حبيبة
من كثر ما اسعى لوصلك اذكر انه كان نذري
( لو يجي والله لاجي له لين اصير اقرب قريبه )
ومن عقب ذاك التمني عاضني ربي بصبري
وجيت تشكي لي جروح الود والشوق ولهيبه
نذري اوفيته .. وفي قلبك علا شاني وقدري
نلت وصلك يا حبيبي طيب ولا بالغصيبة
ما امداني اشربك واروي ضما روحي وعمري
ما دريت الا انت مقفي تلعن الحب وتعيبه
كيف يقوى قلبك القاسي على صدي وهجري
وانت تدري في ليالي عمري بدونك كئيبة
من بعد عينك ترا صار البكا لليل يغري
والليالي ترتدي ثوب الالم وتشق جيبه
كل دمعة تنحدر تكتب على الخدين ( بـدري )
ايه بـدري لا تروح القلب دونك ويش ابي به ؟!
باسالك وشلون تسفه قلب وانته فيه تجري
وانت تدري من بعادك دقته صارت صعيبه
ان تماديت بجفاك .. بتنقل عظامي لقبري
صدتك عني تبرهن لي على ان للحظ خيبه
اسالك بالله ان صدقت او كذبت عذري
لا تزيد الهم في قلب به جروح عطيبه
آه لو تدري وش اللي دايم بالبال يطري
لا طرالي قلبك وحب تذكرته بطيبه ؟
يختنق دمعي بعيني وقلبي اللي وسط صدري
يرتجي وصلك .. وصارت دقته دقة غريبه
البـــــندري