"
أحمد منصور: أنت عارف حضرتك إن يعني في أوروبا في المطاعم الفخمة جداً بيقدموا زيت الزيتون وبيضعوا عليه أيضاً.
د. عبد الباسط محمد سيد: نقطتين خل.
أحمد منصور: نقطتين خل كشيء كمقدمة في.. في الأكل.
د. عبد الباسط محمد سيد: حاجة مشهيات من المشهيات اللي بتعطي، ودلوقتي لما عرفوا فايدته، وعرفوا إنه بيقاوم تصلب الشرايين، الخل يصنفر الشرايين.
أحمد منصور: يصنفر الشرايين.
د. عبد الباسط محمد سيد: أيوه، أنا بأتكلمها الكلمة دي يمكن عشان العامة يفهموها، إنه فعلاً لما زيت الزيتون بيدخل، أنت عارف حضرتك إن فيه دهون حميدة ودهون غير حميدة في الجسم، فيه الدهون اللي بيسموها أيه High density protein دهون عالية الكثافة، ودهون قليلة الكثافة، الدهون قليلة الكثافة اللي بتترسب في الشرايين، إنما عملية الكثافة البلدوزر اللي بيكنس الشرايين.
أحمد منصور: اللي هي؟
د. عبد الباسط محمد سيد: اللي هي دهون عالية الكثافة.
أحمد منصور: اللي بتكنس الشرايين.
د. عبد الباسط محمد سيد: بتكنس الشرايين، الخل.. قصدي زيت الزيتون يزيد من كمية الدهون عالية الكثافة، البلدوزر اللي بيكنس الشرايين، والخل بقى يعمل أيه بقى؟ الخل يخلي النسبة يعني حضرتك الزيادة من الجسم بتخزن على صورة دهون، لأ ده هو بيذيب هذه الدهون ويحولها إلى المركب اللي أنا قلت عليه الأسيتو أسيتيت، ويخليه يخش في التمثيل الغذائي.
أحمد منصور: هنا برضو في قضية الدهون أنا فوجئت أيضاً، وجدت حديث تعجبت له "أول طعام أهل الجنة زيادة كبد الحوت" الرسول -عليه الصلاة والسلام- كان في بيئة صحراوية.
د. عبد الباسط محمد سيد: أيوه.
أحمد منصور: ومع ذلك فيه حاجات كثيرة في كبد الحوت يعني جاءت حتى إن الدكتور حسين شمس باشا لقيته عامل كتاب كامل حوالين هذا الموضوع من بين مجموعة كتب قيمة الحقيقة عاملها، "الأسرار الطبية الحديثة في السمك والحوت" هنا في قضية الفوائد زيت كبد الحوت، ويقال إنه من أغنى أنواع الزيوت بالدهون.
د. عبد الباسط محمد سيد: أيوه، هو أغنى أنواع الزيوت بس الأوميجا 3، اللي هي الدهون الأيه.. شوف حضرتك فيه دهون غير مشبعة، الدهون غير المشبعة يعني بتحتوي على روابط كيميائية غير مشبعة، اللي منها زيت الزيتون، وعندنا الزيت الحار بتاعنا هو..
أحمد منصور: يعني هذا أيضاً مفيد.
د. عبد الباسط محمد سيد: مفيد جداً الزيت الحار.
أحمد منصور: اللي هو زيت الكتان.
د. عبد الباسط محمد سيد: زيت الكتان مفيد جداً جداً، بس عيبه إنه سريع التزنخ شوية، على اعتبار إنه هو..
أحمد منصور: ريحته شوية..
د. عبد الباسط محمد سيد: وسريع التزنخ ويعني لابد، لكن زيت الزيتون مش سريع التزنخ، لأن الزيت الحار أو زيت الكتان بيحتوي على رابطتين غير مشبعتين، إنما زيت الزيتون يحتوي على رابطة واحدة، فبناءً عليه إنه يعتبر زيت الزيتون من واظب على زيت الزيتون لا يمكن يأتيه مرض خبيث.
أحمد منصور: ما شاء الله.
د. عبد الباسط محمد سيد: تقريري يعني ده ربما بعض الناس يقولوا إحنا بنتكلم بالعاطفة الدينية، كونه أن القرآن ذكر وكون إن الحديث ذكر. لأ، إحنا العاطفة الدينية دي قضية إيمان، مش كده ولا أيه؟
أحمد منصور: نعم.
د. عبد الباسط محمد سيد: إنما قضية العلم دي حاجة ثاني.
أحمد منصور: وإحنا بنحاور طبيب وعالم معروف ومخترع، ولك براءات اختراع.
د. عبد الباسط محمد سيد: حضرتك.. حضرتك كتاب كامل عن زيت الزيتون يكتبه أندريا ويل ويعالج نفسه بزيت الزيتون.
أحمد منصور: غير هذا.
د. عبد الباسط محمد سيد: من سرطان العظم، يعالج نفسه من سرطان العظم، زيت الزيتون والمشي، واخد بال حضرتك؟ يعني حاجة غريبة جداً، ولذلك حضرتك رسول الله لما كان بيأكل الكسرة، بعد كده رسول الله نهى عن إدخال الطعام على الطعام، ودي الراجل ده كاتب فيها باب بحاله، يعني أيه رسول الله ينهى عن إدخال الطعام على الطعام؟
أحمد منصور: يعني أيه ينهى عن إدخال الطعام على الطعام؟
د. عبد الباسط محمد سيد: حضرتك كلت دلوقتي، العادة العربية بعد ما نأكل يقول لك: تعال نحلي، يعني نأكل فاكهة ونأكل.. بتاع ده، لأ لو كلت يبقى ما تأكلش بعد ساعتين.. ساعتين ما تأكلش حاجة خالص.
أحمد منصور: طب ما هي ضمن الأكل الفاكهة والحلويات والحاجات دي كلها.
د. عبد الباسط محمد سيد: لأ إزاي؟ لأن دي بتعمل تخمر لما بتأكل سكريات مع الأكل ثاني وكميات من السكريات بتعمل تخمر، التخمر ده يزود الغازات ويعيق الهضم.
أحمد منصور: عجيب!! يعني الآن إذا الإنسان أكل الوجبة الأساسية بتاعته.
د. عبد الباسط محمد سيد: خلاص.
أحمد منصور: لا يأكل معها لا فاكهة ولا حلوى.
د. عبد الباسط محمد سيد: ولا حلوى، ويأكل بعد ساعتين.
أحمد منصور: بعد ساعتين يأخذ هذه الأشياء.
د. عبد الباسط محمد سيد: لابد على الأقل بعد ساعتين، ولذلك رسول الله شوف حضرتك في الأساس كيف نهى عن إدخال الطعام على الطعام؟
أحمد منصور: ودي علمياً؟
د. عبد الباسط محمد سيد: علمياً حضرتك حتى يعني القرآن لما قال أيه (وَفَاكِهَةٍ مِّمَّا يَتَخَيَّرُونَ (20) وَلَحْمِ طَيْرٍ مِّمَّا يَشْتَهُونَ) بدأ بالفاكهة أولاً، يعني إن كلت كل فاكهة واسكت، لو أنت عايز تاكل فاكهة كل فاكهة واسكت استنى بقى بعد شوية كده لما تجوع ابقى كل، إنما لو كلت وجبتك الأساسية اللي فيها الغذاء المتوازن يبقى عليك أنك تنتظر لحد الساعتين ما يفوتوا أو 3 ساعات أو 4 ساعات وتبتدي تأكل الفاكهة أو الحلو.
أحمد منصور: ده شيء آخر..
د. عبد الباسط محمد سيد: آه، ولذلك شوف حضرتك نهى عن إدخال الطعام على الطعام، ولذلك هو بيقول لك: هل هو كان أستاذ أغذية بحيث إنه يقول الكلام ده؟
أحمد منصور: هو قضية إدخال الطعام على الطعام الناس تفهم منها إن الواحد ما يبقاش واكل مثلاً قبل نص ساعة ويرجع يأكل تاني.
د. عبد الباسط محمد سيد: آه.. ما هو حضرتك أيه؟ هو الأساس في المعدة إنه حضرتك بعد ما بتأكل بنسد الفتحتين وتبدأ المعدة تخض الطعام، ولذلك رسول الله قال: "إن كان لابد فثلث لطعامه وثلث لشرابه وثلث لنفسه" طب لو مليت عندك إزازة ماليها للآخر تقدر ترجها؟
أحمد منصور: لأ.
د. عبد الباسط محمد سيد: ما فيش مساحة للرج، ولذلك لما تخلي الثلث للطعام والثلث للشراب، والثلث للنفس يبقى معناها.
أحمد منصور: فيه مساحة للرج صح.
د. عبد الباسط محمد سيد: ما هو النفس معناه إن ثلث المعدة فاضي، يبقى يقدر يرج الطعام ويخلطه بالعصارات اللي موجودة، لو حضرتك بعدما قفلت نزلت حاجة ثانية هنفتح..
أحمد منصور: وهتعمل عسر للذي تم تناوله.
د. عبد الباسط محمد سيد: بالضبط، يبقى هنخلي الأكل يبقى هنخرجه ثاني، لأن لسه هنكوم ثاني على ما هو موجود من الأيه.. اللي أنت كومته، ولذلك ده أساس مهم جداً، ولذلك من الغريب بقى في (شتوتجارت) هتجد فيه عبارة موجودة في المستشفى الأساسية في (شتوتجارت) في ألمانيا مكتوب الحديث ده، الحديث ده مكتوب ومكتوب بالعربية والألمانية، أنا طبعاً سألت هل الألمانية دي ترجمة الحديث؟ قالوا: نعم.
أحمد منصور: زرتها؟
د. عبد الباسط محمد سيد: أيوه زرتها، قال لي حضرتك أيه فإذا كان لابد، هم بادئينه من كده، وطبعاً هم ما بيشيروش إن ده حديث يعني، إذا كان لابد فثلث للطعام، وثلث للشراب وثلث للنفس، هكذا يكتبون.
أحمد منصور: يعني كسياسة.
د. عبد الباسط محمد سيد: غذاء.
أحمد منصور: غذاء.
د. عبد الباسط محمد سيد: فحضرتك بترج المعدة، خلاص مدام بتترج أنت لو كلت أدخلت الطعام على الطعام فتفتح ثاني.
أحمد منصور: سيبها خالص لما تفرغ ما فيها وتدخل شيئاً جديداً إليها
"
|