|--*¨®¨*--| صالات المطــار |--*¨®¨*--|
قبل أسافر كنت جالس في زمان الانتظار .. ارتشف هم المكان وكل همي حاجتين
كنت خايف من يباس وكنت خايف من خضار .. كنت أخاف انك تجين وكنت خايف ما تجين
لين شفتك من ورا بيبان صالات المطار .. مقبلة من كثر شوقك كنت اشوفك تركضين
مرةٍ ركضك يمين ونظرة عيونك يسار .. ومرةٍ ركضك يسار ونظرة عيونك يمين
تايهه ما كنك إلا ضحكة وسط انكسار .. ساكتة ماكنك إلا دمعة فيها حنين
خايفة..وجله..حزينة..يعني كنتي باختصار .. تشرحين لكل جاهل معنى كلمة عاشقين
بعدها جيتك ولدّت عينك ودار الحوار .. ومن كفوفي دمعتين و من كفوفك دمعتين
كنت أصدّ و كنتي أنتي ثايرة مثل الشرار .. ما على لدغة لسانك غير كلمة ( وين؟ وين ؟ )
واذكر إني رحت قبل أبديلك أية اعتذار .. رحت حتى قبل أطيّب خاطرك في كلمتين
لكن أنتي عارفتني زين واللي صار صار .. سامحيني واذكريني قد ما أنتي تقدرين
اذكريني لا انتهت للشمس رحلة مع نهار .. واذكريني لا صحا للصبح ورد الياسمين
واذكريني لا لمحتي في ليالي البرد نار .. واذكريني لا سمعتي للمطر صوت حزين
اذكريني واذكريني واذكريني باختصار!! .. اذكري فهد المساعد قد ما أنتي تقدرين