[على رسلك]

(1)
يوم ضاقت ..
قلت وينك ياالفرج ..؟
قال : جيت ..
وشفت حولك ألف صاحب ..
وخفت أسبب لك حرج ؟!

( 2 )

إرتكيت ..
بس وين إللي يشيل الحمل وينه ..
وين ذاك اللي ذخرته للظما قطرات وينه ؟
وين أبو الفزعات عني ..
ما قدرت ألقاه وينه ؟
من لمحني فوق كف الموج ..فض
وكسّر ألواح الرجا بيني وبينه ؟!

حزّ نفسي ..
غص في حلقي ورض
كل ضلع لي معاه .. وغض عينه؟! .
يحسب إني مت هم ..
ولا درى إني حيْ لكن ..
مِت من خنقة يدينه؟!

( 3 )

يالفرج :
صاحبي ما شفت زوله..
من فقدته يوم شده ..
بس لوجاني على قلعة عيوني ..
حالف إني ما أرده .
والموّده يالفرج هيّ الموده ..
صاحبي .. مالي بصده
صاحبي روحي عرينه ..
ولو نصاني والنواصي عشب قبري ..
والله إني غصب لأحيا ..
ثم أعينه

( 4 )

إرتكيت
وطحت
( والجلمود ) ناخ .
آه يا كذب الليالي البيض ..
آه يا ظلم السباخ ؟!
من مشاها ولا وراه زنود تبري الكبد ، داخ .
يا كثر ما خيـّبت ظن اللبيب
ويا كثر ما غيـّبت وجه قريب
ويا كثر ما شاف منها ..
صافي النية وشاخ ؟

إرتكيت ..
وأثر ظلي مايمون ..
وأثرني كومة طعون
من غلاة أصحابها ..
ما قدرت آقول : آخ .

( 5 )

لي مبادي ..
وصـــاحبي لو جار منْه الجور عادي
وصاحبي لو هو خذل رجواي عادي
وصاحبي لو هو بخل برضاي عادي
وصاحـبي لو هو قتل ذكراي عادي
وصاحبي ..
يبقى العزيز الناصع إللي له ودادي

ودام أنا ستره وثوبه
صاحبي ما آقول عنْه أبدا وتوبه
يا هلابه
وبعيوبه
وبذنوبه
يا هلا ..
إن وصلني يا هلا ..
وإن قطعني يا هلا ..
صاحبي وإلا فلا .. وإلا فلا
والغلا نعمة كريم وساقها لكل الملا .


يا الفرج : حاول تحب
ودام لأهل الأرض رب ..
ولو تشوف أصحاب واجد حول قلبي ..
لا تعاند
السواعد من سراب ..
والحصايد من يباب
والشِعر كذاب .. ؟

خل فـتـّال الشوارب عن يمينك ..
ولا تخاف من الحرج .. لو قيل وينك ؟
كلهم مثلي تراهم بالنهاية طالبينك ..
طالبينك يالفرج ..
ويوم ضاقت ..
قلت : وينك يالفرج ..؟!
قال : جيت .. وشفت حولك ألف صاحب ..
وخفت أسبب لك حرج .

صـالـح الــشــــادي