على الله يازمن بشكي جروحي والليالي طوال ... عسى راعي العنا ينسى عناه وينشرح صدره
على الله يازمن بشكي همومي والهموم جبال ... تعدت عاصمة حزني حدود العالم بأسره
خساره يالسنين اللي كتبتي سيرة الرحال ... فرحت امس وحزنت اليوم بس الخوف من بكره
لساني كم شكى صمته والى منه حكى ماقال! ... طغى طبع السكوت بسيرة المحروم من صغره
سقى الله يوم كنت أضحك وبالي مستريح البال ... ضحوكٍ ما عرفت الحزن وش معناه وش قدره ؟
وكبرت وكبرت احلامي وصارت قصة الترحال ... أماني في مهب الريح وحلمٍ مااكتمل بدره
بعذر اللي مع أيامه جلس يبكي على الأطلال ... تذكر ماضي أفراحه الين خنقته العبره
عزيزه يالعيون اللي حضنتي دمعة الرجال ... حبستي دمعته بين المحاجر يوم ضاع أمره
عزيزه يالحروف اللي سكتي والكلام يقال ... حكيتي .. ماشكيتي الهم وهم القلب يا كبره
عزيزه ياليدين اللي ثنيتك بأصعب الأحوال ... اكفك ساعة الحاجه وامدك ساعة القدره
وعزيز النفس لو يصبر على صبر الليالي نال ... ابصبر والرجل يصبر ومقياس الرجل صبره
أنا منهو حمل همه على راسه تقول عقال !! ... مجاديف الزمن دارت عليه ونسّف الغتره
و أنا منهو فقد صوته وبعض الصوت به مازال ... دعيت الله يفرّجها علي وبحّت النبرة
أشيل الهم عن غيري وحملي صار ما ينشال ... كما الشيخ الهزيل اللي مشيبه منقض ظهره
جروحي مزنةٍ منها هطل فيض الشعر همّال ... سقت جدب العروق اللي تبلل ريقها قطره
و عن حر الزمن صارت حروفي للجروح ظلال ... تذرت عن هبوب الياس حلم قد بنى قصره
عساها للمطر روحٍ قضى مرباعها ماطل ... كساها ثوبها الأصفر,, وكانت تلبس الخضره
على الله ينجلي وقتٍ قضيته همٍ وغربال ... ويشع النور في قلبٍ غشى ليل الظلم فجره
على الله والولي الله وبامر الله يزين الحال ... ويضحك للزمن قلبٍ مع همومه قضى عمره
الشاعر .. مجهول لدينا