18-03-2006, 11:56 AM
|
مشرف عام
|
|
تاريخ التّسجيل: Jul 2003
الإقامة: السعودية
المشاركات: 7,232
|
|
هذي أبجدية مضارب المواشي
اللي شكله رايحن فيها لكن يسلي نفسه
على الرغم إنه شاري المواشي بغالي لكن باعها ببلاشي
الله يكون في عونه
ألف : أولف وأول السـوق نسبـه نسبة تحت ما عاد تحتـاج حسبـة
سوق ضربنا فوق عشريـن ضربـة والصبر زين إلا بسهـم المواشـي
والبـاء : بدينـا وأشترينـا وبعنـا وياليتنـا فيمـا كسبـنـا قنعـنـا
طرنـا وتعلينـا ولـكـن وقعـنـا والصبر زين إلا بسهـم المواشـي
والتاء : توقعنـا تزيـد المكاسـب وقلنا نبي نشـرب لذيـذ المشـارب
لكن ورطنا بيـن عـارض وطالـب والصبر زين إلا بسهـم المواشـي
والثاء : ثبت عنـدي بعلـم يقينـي اني خسرت وراح مـا فـي يمينـي
الله علـى تسديـد دينـي يعيـنـي والصبر زين إلا بسهـم المواشـي
والجيـم : جمعنـا سهـوم كثيـرة ولا درينـا أن الدعـاوي خطـيـرة
حتـى خسرنـا والخسـارة كبيـرة والصبر زين إلا بسهـم المواشـي
والحاء : حسافة يا جماعة فلوسـي حطيتها بأسهـم وكسّـرت قوسـي
صحيح هالدنيـا عطتنـا الدروسـي والصبر زين إلا بسهـم المواشـي
والخاء : خلاص اقول توبه ولا أعود لو كنت بالمكسب موصى وموعـود
وهذا قرار مـا علـي فيـه منقـود والصبر زين إلا بسهـم المواشـي
والدال : دجينـا بسهـم المواشـي نشريه غالـي ثـم نبيعـه بلاشـي
هذا جزاة اللـي شـرا بالخشاشـي والصبر زين إلا بسهـم المواشـي
والذال : ذاك اللـي تسبـب علينـا ويـلاه لـو انـه يطيـح بيديـنـا
من دون ذبحـه كلنـا مـا رضينـا والصبر زين إلا بسهـم المواشـي
والراء : رمينـا رميـة دون رامـي وصابت وقلنـا حرفنـة ياسلامـي
السوق طيب لين جانـا الصرامـي والصبر زين إلا بسهـم المواشـي
والزاي : زدنا يوم شفنـا المرابـح وقمنا مـع العالـم نزيـد المطابـح
ويمكن على بعض السهوم انت ذابـح والصبر زين إلا بسهـم المواشـي
والسيـن : سوينـا بهـا فاهمينـي نشري نقول السوق بكـره يزينـي
نبغى المكاسب وأثرنـا خاسرينـي والصبر زين إلا بسهـم المواشـي
والشين : شاري يومه السوق غالي مـا همنـي لـو زاد فيهـا ريالـي
لا والله الا راح بـاقـي حـلالــي والصبر زين إلا بسهـم المواشـي
والصاد : صدق اللي سهمـا منـول حول ميه وسبعيـن واليـوم حـول
ينـزل الـى ستيـن شـي يهـول والصبر زين إلا بسهـم المواشـي
والضاد : ضاربنا بسهـم الفنـادق لكن رمونـا مثـل رمـي البنـادق
حتـى زبنـا بالحفـر والخـنـادق والصبر زين إلا بسهـم المواشـي
والطاء : طمرنا طمـرة دون داعـي نبغى النسب بالباحه أو بالجماعـي
واليـوم يكفينـا حليـب المراعـي والصبر زين إلا بسهـم المواشـي
والظاء : ظلمني من نصحني بتعميرويقول لي هذا السهم مكسبـه غيـر
وانا مطبح فيـه مـن دون تفكيـروالصبر زين إلا بسهـم المواشـي
والعين : عيـوا يرفعـون المؤشـر يمكن سياسـة سـوق لازم يخسـر
كم واحـد مـن ذا المؤشـر مدمـروالصبر زين إلا بسهـم المواشـي
والغيـن : غيّـر يالمحافـظ وبـدل موضوعنا حلـه وبالسـوق عـدل
نظامكـم مـا هـو كتـاب منـزل والصبر زين إلا بسهـم المواشـي
والفاء : فتيحي مشترينـه بطمعـه لكـن جانـا منـه عشريـن قمعـه
ما اظن يستاهـل حسابـه وجمعـه والصبر زين إلا بسهـم المواشـي
والقاف : قالوا بكره السـوق يرتـد والوضع اشوفـه كـل يـوم يتعقـد
مقرود يامن طـاع شـور المقـرد والصبر زين إلا بسهـم المواشـي
والكاف : كافي يا وزيـر التجـارة خمسيـن بالميـه علينـا خسـاره
ان كـان تفهـم فـي فنـون الادار هو الصبر زين إلا بسهـم المواشـي
واللام : لبنى يوم أغارت بلا خيـل خذت بسطوتها سهـوم الرجاجيـل
وخلـت مدامعهـم تبـل المناديـل والصبر زين إلا بسهـم المواشـي
والميم : ما تنفـع سهـوم العوايـد خسرانة ومـا عـاد فيهـا فوايـد
الفايـده بالكـاش لا صـار زايــد والصبر زين إلا بسهـم المواشـي
والنون : نادوا من يعرف السلومـي وقولوا توجه يـم شيـخ القرومـي
يحلهـا لا صـار وقـت اللزومـي والصبر زين إلا بسهـم المواشـي
والهاء : هروج كـل يـوم تعـادي كـل يسـوي فاهـم ٍ واقتـصـادي
ياطيبكم عنـد العشـاء والمنـادي والصبر زين إلا بسهـم المواشـي
والواو : وهقنا المسمـى ابراهيـم يقول انـا بقلـب جميـع المفاهيـم
ياعزتيـلـه علـقـوه الشغامـيـم والصبر زين إلا بسهـم المواشـي
والياء : ياربي طالبك ترحم النـاس وان تنتقم يارب من فعل الأنجـاس
ولا باس ياللي صابه الهم لا بـاس والصبر زين إلا بسهـم المواشـي
__________________
فضلاً لا أمراً .. اضغط بالفأرة على الصورة ..
|