فمان الله يااول من سكن بين الضلوع العوج
عسى دربك سهيل ويا عسى الله ما يخليني
توكل لا توادع رح عسى درب الجفا المسهوج
يصادف درب فرقا عقبها ما تلمحـك عيني
سمحت من الهوا ومن القصيد ومن زراق الموج
ورميت اغلى مجاديف الغرام وجيت بيديني
ابغرق في عذابك لي رحلت ويصبح المنتوج
قصيد في حياتي سلوتي وان مت يرثيني
واذا هبن بنات الريح لذكرى بدون اسروج
ابسرج مهره النسيان وارحل من عناويني
وابنسى لين اسج وبرسل الونات فوج وفوج
وبنسى دمع عيني ينتثر وانساك من حيني
صبور اي والله اني ما ثنيت العزم قبل ادوج
بريضان الجفا ورمال غصنك لين تسقيني
شجاع اي والله اني ما عرفت الذل قبل اسوج
قدم رجلي على درب لبيت اهلك يوديني
كريم اي والله اني ما عرفت الشح قبل تروج
دموعي في عيوني ثم اشح بحسرتي فيني
احبك حسبي الله ليه اتمالك في سماي وتروج
ولا لك فالبسيطه برج شي بينك وبيني
دخيلك لا تلفت رح بفالك واترك المرجوج
ترانا ما بقــا لك بيننـا ما عــاد يمديني
فمان الله عسى دربك على درب السنين العوج
ولكن طالبك لي نخيت عني لا تخليني ,,