انا وقريني .......

[المنشق]

شفتكم نمتوا بدري قلت اجي واكتب شي جدي شوي ..انشاءالله يعجبكم

مره جالس بالبيت على طرف الدرجه حقت الصاله وزهقان وطفشان وواصله معي اتشششششش...وبلشان بنفسي مادري وين اروح ولا وش اسوي المهم مسكت معي اني اقعد اطل على روحي واشوف وش اخبارها المهم وانا اطل اعجبني الوضع وقلت ياولد ورى ماتطب جوه بس اصرف من ذا الزهق .. والله واطب في روحي فكني الله من بلعومي ولا شوي واشمّع فيه ...
المهم بديت امشي شوي شوي وانا ارجف وخايف من الضلام الا اسمع صوت كحكحة والحق الصوت الا والله وحده عجوز قاضيه وجسمها كله عرافيط وسوووووداء يوم اقبلت عليها وتصفقني بعشر كور حمراء على عيني وهي تقول حسبي الله عليك كان شيبت فيني وانا توني شباب
قلتلها ليه عسى ماشر من انتي؟
قالت انا الرئه حسبي الله عليك ... ليش تسوي فيني كذا يابن..
وتمسك البنكرياس تبي تصفقني فيه والله واعض ثوبي واحط رجلي ..
ومن زعلي عليها قررت ادخن باليوم بكتين دخان عناد لها (الله يشفيك ولا يبلانا ياخبل)
المهم واناماشي امشي بحذر ..اشوى وطحت بساحه كبيره حريريه
يوم عرفت ويني فيه واتنفس واولع زقاره واروق شوي ...
واشربلي بيالة شاهي ..وقيلت شوي ..
المهم يوم صحيت الا اشوف نور من بعيد بعدة الوان وتخبروني ملقوف قلت اروح اشوف وشو النور هذا ..الا والله بريق شكله حليوو (كنه بريق امي حق العزايم مااشوفه الا اذا جو عندنا ضيوف )
المهم خذته وجلست العب فيه كني بزر يلعب بضب صغير ولا بفرخ جربوع ....المهم قلت ياولد خلني اخذه وادور اشياء ثانيه يمكن القى محفضه ولا جوال(مقهور ماعنده جوال) ولا حزمة فلوس .ولا يمكن تذكرة سفر الرياض القصيم الرياض(كخخخخ ابعد من كذا مااعرف)
.ماش مالقيت الا اوراق مقطعة وكبريت فاضي وفنايل مرميه ...
المهم قلت خلني العب بهالبريق بس اصرف من المشي بدون فايده ..
والله اول ماقمت احكحكه الا دخان واصوات طيران واصوات ناس تصفر (كنك في ملعب والهلال جايب قول بالنصر)
شوي الا طلع واحد كبرقريح من كبره مااشوف راسه ....بيني وبينكم وقتها جتني ام الركب وقامت رجولي تصفق ببعض والعرق قام يصبب وحالتي حاله ..يوم اكتمل شكل العفريت وانتفض نفضه (كني قطو مرت سياره وطشرت عليه مويه)
قال : من انت ؟
قلت له : ااننا االلي ططللعتتك مممن البببرييق(قلبت بيجر )
قال : وماالذي احضرك الى هنا ؟(اخس يتكلم لغة عربية)
قلت : حسيت بشي يجرني الى هنا علشان انقذك(ابي الفكه)
وقتها ابتسم وحط ايده على كتفي وهداني وعطاني سن توب ..وقال اشكرك على الخدمة.
وقال ..لاتخف من صورتك في مرآة روحك .. ماانا الا شخصك الخيالي الذي تصل به مالاتستطيع ان تصله بشخصك الحقيقي .
بعدها تحرك الدم بعروقي بعد ماكان بيجف .. واجلس واحط رجل على رجل واخذلي جغمة من السن توب همن قلتله عرفني على نفسك اكثر (ابي اكمل السن توب)
قال:حسنا انا جزء منك ونحن وجهين لعملة وحده (دولار طبعا)هي الابداع ومن فقدني بقي متذوق لللإبداع فقط ..ومن وجدني شاركني انتاج الاعمال الابداعيه ..نحن الطهاة ..وهم الآكلون!
قلت له مافهمت؟ (اصلا فاهم بس السن توب رهييب خفت يهون وياخذه)
قال: ياابن ادم..انا الذي تسمونني قرين-من قصر فهمكم بكينونتي (اخس ياقريني ماعنده لعب كينونتي) وما انا الا مثل ماذكرت.
قلت::هلا هلا بسيد الشعر والادب والفن ...هلا والله باللي طال انتظاره ..قم امش معي لعالمنا الخارجي اقهويك واعشيك ..
قال: شكرا على كرمك.. ولكني لااستطيع الخروج الى عالمكم ..ان مناخه لايروق لي ..اخرج انت ان اردت ..اما انا فإني مرتاح في هذا الجو الأثيري (اسمع ياياسين ترى حتى قريني يحكي لغة عربيه صح )ولااستطيع ان استغني عنه ولو لحظات ..ولكن لاتنساني وقت ضيقك فأناكالاناالذي تصب به عرق ذهنك فأشكله لك تشكيلا ابداعيارائع..ثم تخرج به بعد ذلك الى الملأوتتباهى به امامهم ..لكن حذار ..حذار من الغرور باعمالك ..فكم اهلكت قبلك من مبدعين ..وتاكد ان هذا اقل مايمكن ان اقدمه لك جزاء اخراجك لي من الابريق الذي كدت ان اقضي به العمر كله ...

قلت له ..مافهمت عملية التشكيل ..ممكن توضح؟
قال..نعم ..انا لدي قدرة ابداعيه بإمكانك التعبير بها حسب اتجاهك في حياتك .. ان شئت بالفن وان شئت في الادب ..وان شئت بالشعر..ولكن في اي اتجاة تريدني؟لابد ان تكون لديك الثقافة الكافية حتى اتمكن من اتقان عملي وبالتالي نحصل سويا على مانريد ..
_ وقتها فهمت كينونته ووظيفته وقعدت اقوله عن كل شي اعرفه من الاداب والمعارف وهو منصت لي _
قال ماذا تريد ان تكتب الان؟
قلتله وانا رافع خشمي :نكتب قصيده واذا اسعفتنا افكارنا نكتب قصة يمكن تكون بداية لعمل روائي كبير ننافس فيه الطيب الصالح في هجرته الشمالية وغازي القصيبي في العصفورية ..ومااخفي عليك عفروتي (خلاص صرنا اصدقاء) ودي ارسم لوحه تخلي اللي يشوفها يتسمر عندها(احمم يتسمر).
سكت المارد شوي....بعدين حياني بروحي الطموحة في منافسة الكبار ومجاراتهم ..لكن ابدى معارضته على محاولتي تنويع انتاجي لان ابداعي في مجال بيجي على حساب مجال ثاني ..وقال التخصص افضل لانه اساس النجاح ..وقال يجب اولا ان تعرف اين تجد نفسك؟في الشعر ام في القصة او الرواية او الرسم ..لابد قبل كل شيءان تعرف ذلك حتى تركز على الجانب الذي تحس انه يجذبك اكثر من غيره وباستطاعتك الابداع به الى ابعد حد ..ولامانع بعد ذلك ان تاخذ من غيره ماتيسر لك ولكن لن تجاري به نبوغك الرئيسي ومهما بلغت سيظل انتاجك به فرع من اصل...
==============================================

(يتبع غدا)