بسم الله الرحمن الرحيم
السلام عليكم ورحمة الله وبركاته
من بعض المفارقات المضحكة في منتدياتنا العربية التي عشتها وشاهدتها في بعض تلك المنتديات
1/ تحصل أسماء بنات بصراحة تتخيل من حلاوة اسمها انك جالس قدام وحدة شعرها يسحب معها في الأرض والجمال تقدر تقول تشبه الفنانة القديرة ( باسكال بنت عم مشعلاني ) صاحبة أحلى طلة وأجمل براطم بعد الأخ القدير ياسر بن عرفات ( فك الله اسرة )
وملكة جمال لبنان يا دوب تشتغل عندها شيالة شنطة ( شغالة )
وفي الأخير يطلع ما شاء الله من ها الشباب إلي شنبة كأنة دريكسون سيكل لا ومشخص في حلقة الخضار ويبيع فجل وكزبرة وبقدونس وفي الليل يدرس يبي يا خذ سادسة كأنة يحضر دكتوراه عشان يقدم في العسكرية يا مخبر أو سواق دورية مرور
2/ فيه مواضيع لبعض الشباب و من الجنسين وبكل أمانة روعة في الأسلوب وفي السرد والطرح والتنقل بين السطور وبكل حرفنه ونحصل عدد القراء ( 2 ) عدد الردود ( 0 ) ويمكن يجاملك واحد طفشان 0
وفية واحد فاضي في نفس الصفحة والوقت يكتب موضوع اتفه منة ما شفت وكلام ما تعرف اولة من اخرة ولا يهدف لشيء أو ممكن نستخلص منة أي فايدة والغريب في الأمر عدد القراء ( 500 ) عدد الردود (480) وحاجة غريبة ( يمكن عنده واسطة ) احتمال
3/ فيه أعضاء ما شاء الله عليهم هواية عنده نسخ المواضيع يعني كل يوم في ها القوايل
( الظهاري ) لمن يبداء أعضاء المنتديات يقيلون ويرتاحون تحصله هو ومقصه يختخت بين المنتديات مرة طاب من صور المنتدى مرة كاسر شباك المنتدى ألين يدخل ويقوم يفتش في ها الصفحات ويتنقى الحبيب كأنة في سوبر ماركت يملي كيسة من المواضيع حقت الناس وعلى اولة للمنتدى إلي هو مشارك فيه ويبداء (قص + لصق ) وإذا عاتبته على تصرفه بكل دلاخة ((والله لقيتها في بريدي أرسلها لي القروبات البريدية )) 000
4/ مساكين بعض الأعضاء الشباب وخاصة من خريجي الثانوية إلي الكليات والجامعات ما أعطتهم وجه وأنا ادري ان بعضهم مجموعة فوق 90% بس ويش السوات راقد ألين بعد الظهر وفي العصاري من قهوة إلى قهوة قاله عقلة خلني أتتسلى وأسجل في المنتديات يجيك هو وسنونة إلي كأنها حبوب كيرم كل وحدة في جهة ويسجل ( مشترك جديد هل أجد وجهة يعبرنا )
عدد القراء ( 2 ) عدد الردود ( 1 ) طبعا مشرف الصفحة ما غيرة أحد
وفي نفس الصفحة تجي وحدة من ها البنات حاطه في فمها علكة وشايلة شنطتها على كتفها وما تكتب غير سطر واحد (( عضوه جديدة مين يا شطار يرحب فيه ))
عدد القراء (1804) عدد الردود (5000)
5/ فيه مجموعة من الأعضاء بنات وشباب ودك تتوطى فوق بطنه بدباب من ردودهم على بعض المواضيع لا يعرف يرد ولا هم يحزنون لا ومسوي فيها فيلسوف يكون موضوعك في الشرق ويرد عليك في الغرب وليتها تتم على كذة إلا بعد الحبيب مسوي ناقد وخفيف دم ينكت يعني يدردب عليك كلام والله مثل وجهة إلي كله حب شباب تقول فقع ما هو حب شباب لا ويزعل إذا ما رديت علية ( وهذا اقله يا زينك وأنت ساكت )
6/ فيه شويه شباب مسوين فيها سياسيين قراء له كم جريدة عند حلاق حارتهم وحفظ اسم كم واحد من ها السياسيين وجالك يشارك بموضوع سياسي مثل وجهة ما نعرف ويش هي وجهة نظر الحبيب غير كلام فوق بعضة أهم شيء انه يسب عشان يسير موضوعة سياسي من الدرجة الأولى ومطابق للمواصفات والمعايير العربية السياسية
7/ شلة الأنس تتكون من بعض الأعضاء الي مسوين فيها شركة متحدة ما يشاركون الا في مواضيع اصدقائهم من اعضاء مجلس ادارة الشركة المتحدة ويا ويل أي عضو ينتقد موضوع واحد فيهم ما تشوف الا المشاعيب والسكاكين ( عرابجة ) ومضاربات ورفس وكل حركات المصارعة الحرة بيطبقونها على الضعيف
والغريب ان بعض المشرفين يسكتون عنهم ما دري يمكن مدعومين
( جائز )
عنترنيت