يرضيكم هالشي

[دين_البدو]

بســم الله الرحمن الرحيم

· ملاحظة هامة:- قبل كل شي أحب اني أوضح بعض النقاط ..

1- المواضيع إللى أطرحها من بنانه أفكاري يعني مب مقتبسه من أي مكان.
2- المواضيع اللي أطرحها تعبر عن رأيي الشخصي
3- استقبل أي رأي سواء معارض أو مؤيد وهذا الهدف من طرح المواضيع وصراحه اتمنى انكم تشاركون و تردون على مواضيعي الي معظمها رح تكون عن اشياء فدولتنا
4- أتحمل شخصيا كافة المسؤولية في المواضيع اللي أشارك فيها
5- لا أضع نفسي مفتي او داعية اسلامي او مصلح اجتماعي ولكن السبب الي يخليني اطرح مثل هالمواضيع هو حبي لبلادي ومصلحة كل فرد فدولتي هو مسؤوليه نتحملها جميعا
6- رح تلاحظون انه معظم مواضيعي باللغه العاميه عشان تكون قريبه منكم
7- ممكن بعد تلاحظون اني مارد على كل واحد يشارك فمواضيعي لاني بصراحه ماحب الردود الي الواحد يجامل فيها مثل مشكور موضوعك وايد حلو وووو ... الخ بالعكس اتمنى انكم صدق تستفيدون من الموضوع وتحاولون تردون براي او اعتراض.
· والحين أتركم مع موضوعي الاول:-


السنه الهجريه :-

أول شي اهنيكم بالسنة الهجرية والله يعودها علينا وعلى أمة الإسلام وهي في عزتها .. إخواني وخواتي شو تعنيلنا السنه الهجرية ...يمكن ليش انه الأجانب عندهم كرس مس ونحن ما عندنا ... وإلا أجازه الواحد يا خذها والله زينه يوم الكرسمس أجازه ويوم راس السنه الهجرية والاسراء والمعراج أجازه ويوم عرفه أجازه ووو ... الصراحه السبب ألي خلاني اطرح هالموضوع اني اليوم الصبح وأنا طالع من البيت فتحت أذاعه الاف ام طبعا فترة الاهداءات كان اسمع اول متصل يقول احب اباركلكم بالسنه والهجريه وبهالمناسبه ...(( خطين تحت هالمناسبه )) اهديكم اغنية خالد عبدالرحمن ........ اتخيلو هاليوم الي هاجر فيه الرسول _ صلى الله عليه وسلم _ اليوم الي فيه علي كرم الله وجهه فدا الرسول بنفسه وكانو بيقتلونه اليوم الي طلع فيه الرسول لغار ثور وكان ما باقي شي عن يشوفونه الكفار لو ماكان الله وياه وانقذه هاليوم الي ابوبكر الصديق دخل الغار قبل الرسول عشان يتاكد انه مافيه افاعي او عقارب و حط صبع ريله فاحد الفتحات وانلدغ بعقرب وتم مستحمل الويع عشان ما يوعي الرسول صلى الله عليه وسلم .. اليوم الي فيه بداية النور وبدايه فتره قويه للمسلمين في المدينه المنوره هناك يهدون الرسول صلى الله عليه وسلم طلع البدر علينا .. هاليوم اخونا يهدي فيه بمناسبة راس السنه الهجريه اغنية خالد عبدالرحمن لمستمعين الاف ام والعاملين فيها .. اعتقد اني لحد هنيه و بسكت وبخلي باقي التعليقات عليكم