مذكرات عزوبي مغترب مواقف و طرائف

[وليد الظهران]

كأي مغترب .. وده ياخذ شهادته و يرجع لاميمته تفلي راسه من القمل .. عشان اذا راح يخطب تكون قبيلة القمل اللي في راسه معزّله .. سافرت أحمل احلامي و طموحاتي في صندوقي الاخضر اللي طيرته من ابوي يوم قلت له ان نخلتنا ولدت !! ( طبعا نسيت اعلمكم اني ارفل من يومي صغير .. اسمعهم يقولون النخله حملت و احسب ان التمر هو بيض النخله !! كنت مأساه الله يصبر الارض علي ) .. و طبعا ابوي يدري اني خبل و ما يشره علي .. فيوم قلت له ان النخله تولد ظن اني اقصد البقره حقتنا .. و راح يشرف على عملية الولاده و لا يدري باللي صاير .. و طيرت صندوق ابوي و على المطار بسرعة مليون !!

( و الله اني انسان مكافح .. ما ودعت ابوي و انا مسافر .. ابوها من شنطة !! )

*.*.*.*.*

عاد يوم وصلنا .. انواع المسلسلات .. بس ماله داعي نشر الغسيل ..

يااا كثر ما كلنا خنزير بالغلط .. الله يحوم تسبد العدو .. مره انا و واحد من الشباب قاعدين ناكل في بيتزا هت .. و طالبين سوبر سوبريم اللي فيها سلامي .. عاد حنا قلنا نبي بيف سلامي "يعني لحم بقر" .. قومي يا النادله "تتعبون مع هالكلمه" و جابت لنا الطلب .. بيني و بينكم طعم البيتزا كان متغير علينا .. موب نفس اللي عندنا في السعودية .. قلت لخويي : ياخي احس ان فيها خنزير .. الطعم غريب علي ..

قام خويي و طلع شريحة سلامي من البيتزا و قام يدلدلها قدامي و هو يناظرني .. و كلها و قام يتطعمها .. و في الاخير قال : يابن الحلال ماهيب خنزير هذا لحم بقر ( منتاب عاقل يا الخبره !!)

قلت له يابن الحلال و الله لحم البقر ماهوب هذا طعمه .. قال تكفى يا الدنماركي !! انت و هالبقره اللي عند ابوك .. اشوى ان الارانب تتناحش عنها تحسبها سلقة من هزالٍ فيها .!

عاد يوم ذب علي ذا الذبه عصبت .. و قلت كلش الا بقرة ابوي .. و الله لو تذوق بيضها تسان ما قلت هالكلام ( حالتي صعبة و الله ادري )

و ناديت المضيفة مدري النادله .. و قلت لها هالسلامي هذا وش مصنوع منه ؟؟ قالت لي ابد يا طويل العمر .. مصنوع من خنزير على شوي بقر مخبوط في بعض !! يوم حامت تسبدي و هاوشتها من زود ضيقة الصدر .. عاد في الاخير جابوا لنا نفس الطلب بس بدون سلامي .. و ضربناه زي العسل على قلوبنا ..

بس المشكلة اني قعدت ثلاث ليالي احلم ان خويي اللي كان معي حمار .. و يقعد يقطع من لحم يده و ينطلها في المقلى و يلقمني .. و انا حايمة تسبدي و اقول : لا لا لا لا .. تكفى الله يرحم والديك تراك هريتني بلحم الكتف .. عطني من الظهر شوي

*.*.*.*.*

هذا موقف صاير قريب .. كنت انا و العيال سهرانين يوم ويكند .. و دخل وقت الفجر و جينا نبي نصلي .. عاد الامام حقنا ما شاء الله عليه حافظ القرآن .. و انا و خويي اللي معي حدنا آية الكرسي و عشر ايات من الكهف .. و السور الصغار

اقمنا للصلاة و تقدم هو يصلي بنا بصفته احفظنا مع اني اكبر منه ( يحلفون اني اتهاوش انا و اياه دايم على هالنقطه ) .. و يوم خلص قراية الفاتحه قام يقرا علينا سورة آل عمران الظاهر .. و ما شاء الله عليه قرا حول العشرين آيه .. بعدين وقّف !!!

حنا قلنا بيركع مثلا .. الا و الله الموضوع اكبر من كذا بكثير .. طلع ناسي الايه اللي عقبها .. و انا و خويي نقلب روسنا ..

هذا شكل الامام و هو يحترينا نذكره


و هذي اشكالنا و حنا فاقين اثامينا


و قعدنا على هالحالة عشر ثواني تقريبا .. صمت مطبق مالح ( لا تشرهون رابي مع زيود و قاري مجلة ماجد مرتين )

يوم شاف الامام ان اللي وراه الله بالخير .. عاد الآية مره ثانية كود يتذكر .. لكن نفس الحالة صارت .. مع تغير اشكالنا الى --->

عسى الله لا يعاقبنا .. انا و اللي معي كاتمين الضحكة من ثوارتنا .. و نسمع انفاس بعض و لا نقدر نسكت .. و ما غير : استغر الله .. استغفر الله .. اعوذ بالله من الشيطان .. لكن ما فيه فايدة .. الوضع كان حرج جدا ..

كنا في الركعه الثانية .. و ما كان ودي اكمل صلاتي و هي كذا لاني حسيت انها بطلت .. قمت قطعت صلاتي و كبرت مره ثانيه يوم ركع الامام بعد ما شاف انه لاهوب اللي بيتذكر .. و لا اللي وراه ينشد بهم الظهر ..

اثر الامام يوم قال الله اكبر و ركع كان كاتم الضحكة على دباشتنا .. و الضعيّف ما قوى حتى يقول سمع الله لمن حمده .. صارت الدعوى الله اكبر تعقبها الله اكبر .. اثره قام من الركوع و سجد و حنا تونا راكعين .. عاد انا بصراحه في هالمواقف ما امسك نفسي .. قعدت فاق اثمي كذا بدون ما اطلع صوت .. الين في التشهد الاخير ماااا قوييييت .. احاول يمين يسار ما فيه فايده .. و اللي جمبي الله يهديه ما قدر يمسك نفسه بعد .. بس يضحك بدون صوت ..

في النهاية .. و بدون اي سابق انذار .. سويت كذا :

اممممخخخخ .. احم احم .. امممخخخخ هاهاهاهاهاها .. الله لا يلومني .. اللي جمبي ما قوى يمسك نفسه .. و الامام قدامنا قاعد يتنافض من الضحك .. و كان الحل الوحيد انا نقطع الصلاة و نعيدها كلنا مره ثانيه ..

*.*.*.*.*

مره كنا عازمين شباب عندنا في الشقه .. طبعا كلنا عزوبيه .. و سويت نفسي بطل و قلت الا لازم اطبخ لهم .. مع اني ما طبخت قبلها الا خمس مرات .. و مره وحده ضبطت لان امي كانت معي على المسنجر عن طريق اخوي .. هو يسألها و يرسل لي جوابها ..

و عزمنا الشباب و توهقنا .. قلنا لهم بنسوي لكم كبسه ( الشي الوحيد اللي نعرف نسويه) .. و يوم جوا و طبخت لهم و كلش .. نكبنا الغدا .. و هنا كانت الطامة الكبرى .. ابو بطح نسى يحط ملح !! و ما دريت الا يوم ذقت اول لقمة .. قمت و بحركة انتحاريه قلت : اووه معليش يا شباب نسيت اجيب لكم الملاحه .. حنا في العاده ما نحط ملح في الاكل عشان فلان (واحد من اخويانا) فيه ضغط الله يساعده .. قام خويي خزني بطرف عين ( كل هذا طرف عين ؟؟) و مشاها لي عقب ما سويت حركة لحسة اللسان و علامة زائد في الحلق اني ما عاد اتعودها

عاد يوم دريت اني مطقوق مطقوق الله لا يعوق بشر .. قمت كل شوي اقول : و الله المفروض اننا طابخين لك بلحالك يا فلان .. الشباب مساكين ملوا و هم ما غير يحطون في هالملح .. و الرجال يقلب راسه .. يقول بس : متى يذلفون ؟!!

و الله ياهو بعير .. و و الله ياهو طقني طق



هههههههههههههههههههههههه عشان ما تنامون نحيس فيني عرق ؟؟؟؟؟؟؟؟؟؟؟؟؟؟؟ الباقي تعرفوته




صوره حقيقيه حقت جني بس يشبه واحد في المنتدى صح الخالق الناطق ثقيل على قلبي هههه