كيف أنساك ؟؟؟؟

السيد عبد الرازق · #1 24-03-2007, 02:21 PM

كيف أنساك
وعيناك
لي شاطئ ومرسي وبرّ
كيف أنسي ماضيك
وهو شريط الذكريات
وهو حيل عمري
وهو قارورة رشفتي
وهو منديل صبحي
وهو أوراق حلمي
كيف أنساك ياعمري
وكل الذي بنيته منك
خيوط من حرير
حينما أشدّها نحوي
لاتتمزق
بل تعود أقوي من الحديد
ربما أنساك يوما
حينما أنسي المدينة
التي عاشت فينا
ومعنا أحلي الخطوات
ريما أنسي شارع الذكريات
أو حارة الأغنيات
أو زقاق المواويل
سأنساك يوما
حينما أنسي التاريخ
وأمحو من ذاكرتي
خرائط الوجدان
وحسابات العودة
سأنساك في شواطئ الرحيل
في القبر ربما أو في النخيل
في روضة القرب
أو عند الأصيل
سأنساك حتما وقهرا وقسرا .
في ساحات الوصول .
==================
تحياتي

السيد عبد الرازق · #2 24-03-2007, 02:32 PM

النهر ماتغيرش اسمه ( مسعود شومان ) شاعر مصري
هنا

تحت تمثال بدر شاكر

كانو واقفين العساكر

وبيّاعين اللمون

ماكو شىء غير ريحه نتنه

ودود بيلعب ع الجثث

ماكو شىء

غير إيدين مقطوعه بتلاغى السما

الضلام سايق دلاله

واحنا ساحبنا العما

كل شىء واضح وعادى

إنما

كان فيه جبال من وهم خايفه

رعشة صبية مات حبيبها

أيده لسه فى إيدها دافيه

تحت تمثال بدر شاكر

اختفت كل الملايكه

الجواهرى والبياتى

حتى نازك الملايكه

روحها طايره ومربوطه بشاش

حلم كل خيوطه تايكه

الحليب فيه عرق دم

والنخيل بينز هم

والرقع زادت فى قلبى

كل شىء عادى وواضح

بس فيه شىء كان مستخبى

التراب عمّال بينهج

تحته كان فيه حلم نايم

والخوف محاوط راس بتنزل ع السلالم

واقفه على طرف الشفايف كلمه خرسه

والقهر ما تغيرش اسمه

اسمه زى ماهو لسه

بيبص ع البصره بعين مجروحه لسه

وقلب متكفن وِمَحْنِى

بس كل مشاعره حاسه

بالبيان .. بالورق وهو طاير

بين محطات الوجع راجعه التذاكر

شايله حلم هربان م الحريقه

كان لسه قاعد فى الوسع بيذاكر

والموت بيتعكز على وهم الحقيقه

بيلمّ فى وشوش الصبايا والعيال

مع اعقاب السجاير

ماكو شىء

غير صوت بيصرخ

تقدر تسمى صرخته صمت القبور

تحت تمثال بدر شاكر.

السيد عبد الرازق · #3 24-03-2007, 02:36 PM

البرد - سلامة عيسي - شاعر مصري

مدخل :

البرد امبارح زاد

كفنى من غير زاد

لفلفنى قبل رقاد

محروسة عنين الحلم الساقط من إفلاس الضحك

الخارج من تفريعة كاس

فوق شجرة جميز مزروعه من تحويشة لبلاب

اتمليت بمشاهدة فيلم ...

كانت فيه البطله عريانه ... ونايمه

سكرت فيه الكاميرا .. عملت مارش رخام

قبل ما انام

كان فوق البرش الشايب

مفروشه حاجات

متورمه عينى .. ومخوفنى

تلافيف الضوء النازف م الشباك

فنعاس الحيط .. لوحة أباريق

بيشف نعاسها الشمسى .. ويشربنى من دم سكات

فى ثبوت الرؤية .. وف مشهد سوء الحاله

التور الشايل بقرونه الكوره الأرضيه

فوق ايده اللى ماهيش ايده .. شايل عكاز

مع آخر قطرة ف حلمى

الراجل اللى اتخطفت روحه ف بلاد السند ..

وياه ناسى

فاتحين الشاره على جيوبهم

بعد ما فضوا الحلم .. يرموها ع الأبواب

فالحلم اللى ما هوش حلمى

تنكب دواية همس قديم

تلسعنى .

السيد عبد الرازق · #4 24-03-2007, 02:40 PM

حدوتة قديمة جدا _ محمود الحلواني _

1 - على الهواء مباشرة

دلوقتى تقدر تكوّش ع الهوا

وتذيع «لايف»

شبكة إذاعات الغرام والهيام

دلوقتى تقدر

تزرع الأثير نغم

وتزرع العشب من لغم

تصطاد بكيفها اليمام اللى رايح جى

وتحب على روحها

دلوقتى تقدر تدلدل السَّبَتْ

من أى ركنٍ تشاء

من غير ما يتخبط على حبال الغسيل

أو يحوشه هَدَدْ

ترسل وتستقبل رسايل

من كتاب الأغانى

وتمد خيط المحبه على آخره

وتوشوش الدَكَر

ما هو ده المكان الجهنمى الوحيد

إلى هيساع م الحبايب ألف

طبعاً..

هاتمسك فى الهوا

بإيديها واسنانها

دلوقتى

بعد مازحزحت عواميد

وطلقت بالتلاته ركن العيله

واشترت موبايل !

2 -طعم الملبّس

«طعم الملبس فى بُقّى»

«المذيع الداخلى بيعلن ..»

«طعم الملبس فى بقى»

«البحر والريح والمطر نازلين صَفير»

«الكشّافات مجنونه ع الأسفلت»

«إيديّا فى جيوبى

والرصيف غرقان»

«طعم الملبس ..»

«قوس قزح ..»

«صافيه ..

مع إنها بتشتى ! »

«إيديا على قورتى

والدم ع المنديل»

«طب إيه تفيد البصمه

وبجسمك كمان !؟»

«الوحل دافى

وقوس قزح بينقل ع الهوا»

«طعم الملبس ...

السيد عبد الرازق · #5 24-03-2007, 02:44 PM

وجع في كف الرجل لعصام حجاج
يدخلني الدوار م البالطو الأبيض

جواب وزير الصحة ليك يا با

ف الأميري أبو البالطو الأبيض

بيـكــتب روايــــة

يسلط قلمه ع الورق

ويسلط الإبرة ف رقابتك

أبــــص لتحت

حمار سايب البرسيم

بيشم ف الأرض

ف التأمين من حقك تزعق م الوجع

يجري أبو بالطو أبيض يضحك لك

وممرضة الأميري قرفانه منك

بشتكى ليه من رجليك ؟

مفروض الوجع م القلب

يصرخ أبويا ف التأمين

تضحك أم بالطو أبيض

تمد إيديها تمسح له عرقه

يبص وزير الصحة علي هيكله العظمي

يوافق يتعالج علي حساب الدولة

ف الأميري تشخط فيك أم البالطو الأبيض

تعلن أنها الست الممرضة

تسيبك نايم معوج

تقوم تبوس إيد أمي ورجليها تخرجك

والحمار بيرجعوه للبرسيم

يرفع ودانه لفوق يرفضه

من حق دكتور الأميري ياخد الماجستير

والجايزة الأولي في القصة

يتني ف عروقك إبرة الجلوكوز

يعلن انه الأعلى

ما يعرفش إنك كنت بتلم عضمك

تقوم بعد نُص الليل

تركب عربية كبيرة تدخلها السقعة

تقول توكلت علي الله

يابا الأميري الناس طيبين

أم البالطو الأبيض

ما شفتكش وأنت قاعد تدعي

تلم العيش المتكسر

تغمس بالملح

ف الأميري :

الحمار لسه بيرمرم ف الأرض

يابا مع السلامة

نام بدقنك البيضا وسنينك السبعين

السيد عبد الرازق · #6 24-03-2007, 02:48 PM

مرايات ومساكن للروح لمحمد علي عزب

ابعد ايدك

سيب الورقة البيضا

ايوة

ده بعدك

مش سايبك

تاخد منى الساتر

تحتل الحصن

اللي بيحمينى

من كل اللي بيجروا ورايا

بالطوب

ويسمونى بأسماء

باكرهها

شيل ايدك

بطل لعب فى صورتى

أيوة

باقول لك

دى الورقة البيضا

مليانة

مرايات

كل ما ابص لنفسى

فيها

أتأكد

من ان الروح

بتقاوح

مابتتاثرش ولا بتتهز

من علامات الشيخوخة

اللي

تماثيل ميادينكم

ويفط شوارعكم والاشارات

بتبخها على جسمي

تزرعها فى جلدي ولحمي

من طراطيف طراطيف رجليا

لآخر شعره فى راسي

باقول لك

شيل ايدك

مش عاوز اتعلم

جغرافية ايه؟

وطبيعة ايه ؟

حسابات ايه ؟

دي الورقة البيضا

بلد

لأ

دي دنيا بحالها ومحتالها

من غير أي تاريخ مضحك

باقابل فيها حبيبتي

واغني

ب"لغة" مواليد الزمن الجاي

امشى ف شوارعها براحتى

اعمل كل اللي ف نفسي

من غير ما اتلفت حوالية

وادخل ف جداول ضرب

ما هي اصلا

مفيهاش

مستشفى مجانين

ولا فبها كلبشات

ولا نعش

ولا نار

بتخلى البنى آدم

يبقي

شيكارة بلاستيك متعبية

رماد

وحاجات مطحونة

السيد عبد الرازق · #7 24-03-2007, 02:51 PM

رحلات آخر سندباد لمدحت امام

(4)

دخلت مقام الوصل

قلعت لبس الدروشه

حطيت على كفوفك علامه

على سدرك سجاده ولهه

نزلت قصايدي حروف قديمه معشقه

سكرت عينيك في حضرة رضا

خشيتى الديوان وتعطرت

رعشة عشق جواك

ملامحنا بطعم البخور الحي

لحظه ونفنى ف بعض

وتتكسر علي لسانّا الحروف

أنجذب فيكي تشهقيني

وأرمى الذنب من تحت العتب

تتحللى

ميت شمعه قدامى

يضرب النور المقام

مدد ........ مدد ياسيدة الديوان

أنا آخر ولى ف السلسله

نظرة تجلي وبسمله

( 5 )

ف العادة كنا ساخطين ع الكلام

نهار نفند القواميس

بالليل يجافينا الكلام

الشعر لعنه ومعيره

قررت اعتزال

اضرب ودع

أجمع تخاريفي في شنطة سفر

عديت على آخر نخلة مطرحه

هزيت جريدها م العشم

ماعدش عندي المقدره

قلت أجرب شجرة النبق القديمه

أحلب لها كاس الحياة

الحزن عاده ف الشجر

الكلمه يمحيها المطر

وعروسة البحر تملك وحدها الحلم والكوابيس

وأنا عدو لأول نهار

من نقطه وحرف

من آخر دقة زار

تعافر جوايا

جنيه تراود حلمي النافق بعد نوبة قلق

وبعطل دقات القلب اللي ما يقدرش على السكات

لا يوم فات

ولايوم حايقوى ع الممات

تغريبة يا لغة الكلام

نوبة غرق

( 6 )

اتوجعى على قد ما تقدرى

الطلقه بين الأولى والتانيه براح

ف التالته سرسبتى الحليب

طفلي اللي دايب ف حشاك ليل ونهار

طالع صراخ

فارد جناح

رابط صرته بحبل الحياة

منقوش على ضلوعه طرطشات الليل

باكي على وجعي الطويل

راضع من اللبن الحليب مواويل

اتوجعي ع الآخر

ما تكونيش على طول المدى عاقر

لساكي راضيه بالقليل

لساكي بتحلي الضفاير عالكتاف

وأنا اللي كبرت روحي على فعل القطاف

دانا لسه راجع من تغريبة وجع

محتاج لحلم يبدد عتمة الكوابيس

مصلوب على باب المدينة من تلاتين سنة البحر رافض ينشق بعصايتي الورق

اعصرى فروع الشجر

يحن النبق

يروي عروقك الخايفين

ماأنتى اللي شلتي العمر بكفوفك

وعديتي على جسر النواميس

جايين

ناسيين سنين

برك الجواد في غربته

ياست الحسن

عضمه بقى دقيق للحزانى المحرومين

عرقه ملا مقام السيده

لفى على سدرك ياحلوه الغصن

حاولي تكونى الأرض الطيبة

وانسى تفاصيل كابوسي المستديم

(7)

الليل سكن

الموت سكن

والليل طريق الموت

وأنا عشقي لليل بداية سكتى

رصيت أول طوبه قطعت القوت

عودتنى عالعتمة سنين

وقريت كتابي ميت مره

مش فارق معايا تحديد اللقاء

لا طمعان ف جنه ولاتستهوينى النار

سيبنى لتصريف الفعل جوايا

أفك تفاعيل البحور

أنسج عوالم فى قصايد معجزات

مانيش نبي ولا كنت أول ولي صابه الحلول

أنا طير غبي يادوب بريش مبلول

أنا لو أموت ... بحقيقى

يموت النور!!.

السيد عبد الرازق · #8 24-03-2007, 02:59 PM

امضاء لرجب الأغر

عفواً جداً ..

هاسكت خالص

بس ما تنسوش تقروا الفاتحة

وانتو بتقفو دقيقة حداد

على أرواحكم ..

إمبارح بس

افتكرتك

وأنت بتحلم لى باليوم

اللى تشوفنى زيك

آسف جداً

برفض حلمك

واستسلامك المعتاد

حاول تبقى مش تقليدى

هاتكون هايل

لما تحدد كل محاورك

ومقاطعاتك

اللى ما بينك

أنت وأمك ..

عفواً جداً ..

لما نويت أدخل فى دماغك

عمرى ما كنت أقصد تكسيره

لكن أنت اللى اضطرتنى

انى أفوت من تحت قصايدك

ما نحنيش
============================================

اغزلي فجر من ضيك لمرفت عبد الجيد محمود

معرفش ليه ؟

خايف تكون عاشق

تجدل حروف الحلم بالأيام

وتفيض عيونك بالحنين

تغسل دموع النهنهات

معرفش ليه ؟

فاتح كتاب الذكريات

ناقش على جبينك .. كل اللى فات

لو بتسمى العشق جنون

راح أقر وأوقع .. أن أنا مجنونة

وح اعلن .. على كل الدنيا جنونى

ابدر سنين عمرى عمرى فى سماك

قناديل .. وألم الخوف اللى معشش

فى ضلوع الليل .. أحطه فى قمقم

وأرميه فى سابع قرار

يمكن تمد ايديك

تفك خيط الشمس المتكعبل

قدام شباكى .. ترسم به ..

طريق للضى ف عيونى

ح يغزل فجر بيندى

على كفى .. صباح مشتاق

لضحكة قلبك الصافى

وغنوة لطير حيران

ما بين كفك .. وبين شباك

ساكن ف قلبه هناك

قمرايه .. بتحضنها عيدان لبلاب

وسهرانة .. بتكتب .. كل ليلة كتاب
======================================
كومبارس لابراهيم رفاعي

أدى كارت محادثة

مع المساطيل

في مسلسل

من دم ولحم

النفس الأول ...........

على صدر اليوم

متشعطت ف جبين الدهر

متسلب بحبال الروح

جوه حيطان القصر العيني

على حد السكين مدبوح

دم عيني

تبل ترابه

وتشكل بنى آدميين تانيين

ف حشاهم

بيمر طريق

يرقص ويزقطط

ويبل الريق

يرسم بيت

على وش الحيط

ودولاب فبه حبة هلاهيل

علشان م الكومبارس

يبدأ التصوير

نصب

ف سرقة

ف ملاعيب شيحه

أما بطلنا

جمهور الشاشة

هيبيع كل ما يملك

ويحط كمان من جيبه ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍!!

النفس التانى .........

في الزحمة وسط اللمه

ووشوش أهاليها مسالمة

تحس بحضن أمك

وعيونها تاخدك وتضمك

وتطبطب على ضهرك

روق يا ضنايا

يا صغير يا رضيع

يا بن ربيع العام الماضى

النفس التالت.............

لسة ف إحساسك

شئ مش عارفة

بيبص

من تحت لفوق

وبيلبس نفس الطوق

نفس الدمعه

ونفس الحزن

اللى فى آخر شمعه

شافتها عنيك

وانت محبوس

جوة تابوتها الملكي

بتقاوم حلمك ليموت

النفس الرابع..........

على كف الكلمة الحبلانة

من نفسى

ونفس الإنسانة

لسة جروح الكام حرب

اللي شافتهم عينك

محفورة ف ضهرك

وانت بتصرخ وتهاتى

حرة.. وغرة في جبينها

دبحونى

وان بدفع دينها

النفس الخامس..........

كام يافطة

وكام عنوان

يتفالوا عنك

وأنا ولهان

متوضى بدمى

وغلبي وهمي

وكام حسرة

كان قلبي واقف

مستني النصرة

يترجى كلاب وديابة

تفاهم كل غابات الدنيا

زقاهم

يغتالوا الورد البلدي

ويفضوا بكارة أيامنا

علشان ما نعيش مساطيل

ف مسلسل

من دم ولحم .

====================================
تخاريف نوبة حلم لمحمد أحمد عبد العال

غمض عنيه

فرد الغطا

على ألف جرح

وكام وجع

وطريق بيخنق

ذكرياته ف شكل تانى

وابتدا

إحساس مخيف

أصوات غريبة

مش طبيعى

إنه يبدأ يندفع

آخر ملامح للطريق

شافها اختفت

دلوقتى كان

ممكن يشوفها بتندهه

أسفلت غرقان فى الضباب

ومشاهد اللحظة الأخيرة

اتكررت

هو الوحيد

فى السكة واقف

رغم إحساسه بوجود

ناس مختفية فى الزمن

كان يجرى إيه

لو فكرت لحظة شعوره بالانهيار

فجأة ابتدا

يدخل مكان مليان صور

كسور فى نفسه اتيتمت

متلفحة

بالجرح خوف

وصدى لشكوك

الوقت مهمل

والمسافة بتنقطع

الشكل ده

مرمى ف بقايا ذكرياتك

مش غريبة

انك تقابله ف سكتك

طب وانت فين

كل الملامح

ع المدى بتخوفك

تظهر بسرعة وتختفى

وحوار بصوت عالى

ودقات انهيار

حالة تانية بتخرجك

بصمات لفكرة بتتبنى

وبيبان كتير متقفلة

وحيطان مقاربة ع الوقوع

بس روحك مش بعادة

فى انتظار

مستحيل نفسك تخون

لما بالصدفة تقابلها

تترعش

تكسرك

ترميك فى آخر سكة

ممكن تعرفك

فتحس بخروج الزمن

وباب قفل

وسجل مليان بالصور

تفتح عنيك

طلع النهار

ليالي الشتاء · #9 25-03-2007, 09:51 PM

ما شدني هو العنوان
وعند مروري هنا احترت
هل هي ملحمة زكريات
ام قصة حب مات
ام هي مجرد سطور لتملئ فراغ البيت العتيق
اخي السيد عبد الرزاق
عزرا لااول مرة لم افهم شيئا
اخي في يوم ستنتهي الدنيا وبعدها تبتدي الحياة
لك احترامي

السيد عبد الرازق · #10 27-03-2007, 09:48 AM

شكرا أختنا ليالي الشتاء
مروركم طيب وأسعدنا
ربما هي ذكريات
ربما هي آثار الماضي غير البعيد .
ربما هي ملحمة الحب أو اللا حب
ربما هي قصة التوق النفسي لمن كان يهوي ويحب.
وكل شئ سيمضي وننتهي في ساحات الوصول .
وحينئذ لايذكر الإنسان إلا محبوبه الحقيقي .
تقبلي تحياتي وتقديري .
والسلام عليكم ورحمة الله وبركاته