الأطـــــــــــــــــلال....!!!!

[على رسلك]

باقي من الذكـرى رسـوم للاطـلال
هوج الريـاح العاتيـة مـا محتهـا

اظنهـا تبقـى علـى مـر الاجيـال
تفيـد عـن قـدرة يـديـن بنتـهـا

ارض نشا فيها مـن الخلـق نـزال
وشخص عشقته عاش فـي ناحيتهـا

ان غبت عنها شفت من ضيقة البـال
مـا يلحـق النفـس العليـة عنتهـا

وان جيتها عقب التباطـي والامهـال
فرجلي تسير اليـن تاصـل جهتهـا

واقف عليها وارسل الطـرف يجتـال
والرجـل ماكـن البسيطـة تحتـهـا

تموج كنـي واقـف فـوق زلـزال
وعينـي تضيـق بعبـرة حابستهـا

اخاف يـدري بـي حسـود وعـذال
حيث العيون دموعهـا هـي لغتهـا

يا شيخ واقلبي عليـه الصبـر طـال
وراحـت مسراتـه سريـع فوتـهـا

يا شيخ كلن قدر مـا يحتمـل شـال
وانا حمولـي كيـف نفسـي قوتهـا

نفسي لها عـن لـذة العيـش سـلال
تتـوق لاخبـار القـديـم وسنتـهـا

ولا الغـرام بعشقتـي طقـه الجـال
واصبـح جنـازه والسنيـن اقبرتهـا

ولاعاد لي ملحوظ في الواو والـدال
فلت يدي صفحة والاخـرى طوتهـا

واصبحت من عقب المخاطر والاهوال
اجنـب الحيـة واعـاف شجرتـهـا

يا مير بينـت السبـب لـك ولا زال
في النفس حاجة وانكفت مـا قضتهـا

يا مير شخصٍ ياصل الحبـل بحبـال
وشخصٍ يسـره يـوم يقطـع بتتهـا

وانت العديم معـرب الجـد والخـال
ونفسـك مراقيـب الشهامـة علتهـا

خذها شهـادة واحـد مـا بعـد قـال
كلمـة نفـاق يرتـجـي منفعتـهـا

والناس يابو زيد من كـل الاشكـال
من شاف عثـرة عاثـر مـا غمتهـا

الا الـذي ماللـردا فيـه مـدخـال
هـذاك ابـو نفـس يحصـل بختهـا

وقت مضى له حال واليوم لـه حـال
وارجي من المولى حسـن خاتمتهـا