لقاء مذهل وثري بالكثير من المعلومات ..

[يتيم الشعر]

د. عبد الباسط محمد سيد: تدخل شيء جديد، ولذلك نهى، بعد العصر حضرتك رسول الله من الغريب بقى كان يأكل جزرة حمراء اللي كانت موجودة في الجزيرة العربية.

أحمد منصور: تحديداً.

د. عبد الباسط محمد سيد: تحديداً.

أحمد منصور: دي برضو بتطلع في مصر دي الحمرة.

د. عبد الباسط محمد سيد: أيوه الجزرة الحمرة.

أحمد منصور: ولا اللي هي الأصفر؟

د. عبد الباسط محمد سيد: لأ، الأصفر اللي عندنا في مصر كويس، إنما في مصر برضو فيه جزر أحمر، لكن ثبت اللي كان موجود في الجزيرة العربية هو الجزر الأحمر، وعود بقدونس وعود شبت، يعني كان دايماً رواة الحديث عن هذا يعني حضرتك خش في طب الإمام الذهبي والإمام الألوسي وابن القيم تجد إن رسول الله داوم على هذا، وكان ينصح أصحابه.

أحمد منصور: شبت؟

د. عبد الباسط محمد سيد: شبت وبقدونس.

أحمد منصور: وبقدونس وجزر.

د. عبد الباسط محمد سيد: والجزر، الجزر دلوقتي البحوث اللي موجودة فيه (Antioxidant).. مضادات الأكسدة.

أحمد منصور: أوه سرطان والدنيا كلها.

د. عبد الباسط محمد سيد: مضادات الأكسدة، أهم حاجة إن الأكسدة بتؤدي إلى الشيخوخة فلذلك..، وبعدين بيعطل ظهور العوامل الوراثية، يعني واحد عنده عامل وراثي بتاع سكر في جسمه.

أحمد منصور: ما يوصلش لولاده.

د. عبد الباسط محمد سيد: لأ، يوصل لولاده بس يتعطل ظهوره.

أحمد منصور: آه.

د. عبد الباسط محمد سيد: يعني لو كان هيظهر في سن الأربعين يبدأ مثلاً يظهر في سن الخمسين، يعني يعطِّل ظهور العوامل الوراثية، ودي دلوقتي البحوث الأميركية يمكن من سنة 1998 للآن، وهي كل سنة فيها بحوث عن (الأنتي أوكسيدنت)، وبالذات الجزر.

أحمد منصور: كل من يعالج بالسرطان -ربنا يعفينا- وأمراض كثيرة جداً ينصح بمشروب الجزر يومياً.

د. عبد الباسط محمد سيد: أيوه، وحضرتك الحاجة الغريبة إن الجزر فيه مادتين الكاروتين والليكوبين، والاثنين دول أقوى مضادات الأكسدة في العالم، يعني يقوا الأكسدة، ويقوا تدمير الحامض النووي المسؤول عن الوراثة في الجسم.

أحمد منصور: عجيب!!

د. عبد الباسط محمد سيد: إنه بيشيل كل الشوارد الحرة، الشوارد الحرة اللي هي مركبات أوكسجينية بتدمر أو تؤكسد الخلايا، لأن الأكسدة هدم فيمنع الهدم.

أحمد منصور: دكتور، هل يُفضَّل شربه أم أكله أيضاً؟

د. عبد الباسط محمد سيد: والله هو دايماً المواد الألياف اللي موجودة.

أحمد منصور: اللي هي العصير بـ..

د. عبد الباسط محمد سيد: بيشيل الألياف.

أحمد منصور: نعم.

د. عبد الباسط محمد سيد: إنما الألياف دي لها فايدة كبيرة جداً، إنه لها علاقة برضو بالحركة الدودية للأمعاء.

أحمد منصور: يعني يفضل الإنسان يأكل..

د. عبد الباسط محمد سيد: آه، إذا كانت سنانه سليمة، إذا كان لابد يبقى نستخدمه عصير.

أحمد منصور: الشبت.

د. عبد الباسط محمد سيد: الشبت ثبت إن هو يقي ترسيب أي حصوة في المرارة.

أحمد منصور: عجيب!!

د. عبد الباسط محمد سيد: بمعنى إن حصوة المرارة زي الكولسترول، فلو مع زيت الزيتون مع الشبت مش ممكن تتكون حصوة في المرارة، البقدونس له علاقة بتكوين حصوات في المسالك البولية.

أحمد منصور: سبحان الله!!

د. عبد الباسط محمد سيد: ويذيب الأوجزلات، ويذيب حصوة اليوريك أسيد ليه بقى؟

أحمد منصور: يعني كل ده لو اتخلط في طبق سلطة يبقى رائع.

د. عبد الباسط محمد سيد: بس هو ده، ولذلك الأميركان دلوقتي بيأكلوا في الأسبوع من 3 إلى 5 كيلو خضروات في الأسبوع.

أحمد منصور: بعدما كانوا بيأكلوا 10 كيلو لحمة في اليوم.

د. عبد الباسط محمد سيد: بالضبط، ابتدت الأمور تنقلب بعد البحوث إلى هذه الأمور، ومن الغريب إن برضو أندريا ويل يرجع ثاني يقول لك: ده إحنا خذنا كل هذا الكلام من التراث العربي، لكن إحنا دايماً العادات الغذائية السيئة بتاعتنا بنعتبر إن كل ما زادت كمية اللحوم كلما أيه ازداد الأمر يعني.

أحمد منصور: اسمح لي بس آخد مشاهد من سوريا على الخط من زمان.

د. عبد الباسط محمد سيد: ماشي.

أحمد منصور: محمد غازي من سوريا أخ محمد.

محمد غازي: السلام عليكم.

أحمد منصور: عليكم السلام، نعتذر عن التأخر إليك، اتفضل.

محمد غازي: بارك الله فيك حياكم الله.

أحمد منصور: شكراً.

محمد غازي: كل عام وأنتم بخير.

أحمد منصور: وأنت بالصحة والعافية.

محمد غازي: نحنا نفتخر بالدكتور عبد الرزاق السيد على البرنامج القيم.

أحمد منصور: دكتور عبد الباسط.

محمد غازي: بارك الله فيه، بس نحنا إلنا مداخلة بسيطة على موضوع الخل إنه خير إدامكم الخل كما روي النبي صلى الله عليه وسلم.

أحمد منصور: عليه الصلاة والسلام.

محمد غازي: بمعنى إنه الخل.. الخل التفاح وخل العنب بالمفارقات اللي نحنا جربنا.. جربناها بأبحاثنا بالأعشاب، وجدنا إنه خل التفاح إله فايده كبيرة مع العسل في تخسيس الوزن أو تنزيل وزن الإنسان بحرق الكربوهيدرات ومساعدة على الهضم وتنظيم القولون، وأيضاً عم نحكي كمان على الشبت أو السنُّوت اللي هو عليكم..

أحمد منصور: السماعة الداخلية يا شباب في الأستوديو.

محمد غازي: عفواً.

أحمد منصور: عفواً أنا بأكلم الشباب هنا، اتفضل.. اتفضل.

محمد غازي: آلو.

أحمد منصور: أنا أسمعك اتفضل.

محمد غازي: نعم.. نعم فيه عندنا.

أحمد منصور: أنت باحث في الأعشاب؟

محمد غازي: نعم؟

أحمد منصور: أنت باحث في الأعشاب؟

محمد غازي: أنا باحث ومستشار في الأعشاب، وخبير بالأعشاب من جدة عم أكلمك أنا، ففي حديث عن سنن ابن ماجة عن النبي -صلى الله عليه وسلم- مذكور فيه: "عليكم بالسنا والسنوت فإن فيهما شفاء من كل داء إلا السام قيل ما.. يا رسول الله، ما السام؟ قال: الموت" فوجدنا نحنا أبحاث كثيرة عن السنا وعن السنوت بالذات اللي هو الشمر أو الشومر بعلاج مرض السكر وفتح السدد عن الجسم بكل معانيه بتقوية النظر والعصب البصري وشبكية العين وتقوية القلب والقولونج أيضاً اللي هو القولون العصبي والقولون الغازي، فأشياء كثيرة وجدنا في أبحاث الشمر فوائد كثيرة عاوزين إنه ننصحها لكل أمراض السكر يستعملوه بدراية وبحكمة وبمعرفة حيث جُرب كثير.

[يتيم الشعر]

أحمد منصور: أشكرك كثير، لأن حتى أوجز للدكتور، لأن يبدو هنا خلل بسيط في.. في سماعة الأستوديو، هو يقول أن.. هو باحث في الأعشاب أيضاً، يقول: إن ثبت إن استخدام الخل مع العسل بيبقى له أثر كبير جداً في عملية تخسيس الوزن من خلال أبحاثهم، وذكر حديث السنا والسنوت.

د. عبد الباسط محمد سيد: أيوه، ما هو لسه إحنا جايين للسنا والسنوت.

أحمد منصور: نعم.. نعم.

د. عبد الباسط محمد سيد: هو معلش الخل والعسل، يعني فيه ناس كثيرة جداً بتتكلم عن عملية التخسيس اللي بتبقى موجودة فيه، لكن أنا بأتكلم دلوقتي عن ما ورد في التراث، يعني إذا كانت فيه شيء من التوليفات..

أحمد منصور: هو بيضيف شيء من عنده عشان إحنا نستمر في..

د. عبد الباسط محمد سيد: ماشي.. نستمر في..، وبعدين الأمر الثاني يعني هو أنا لو كان هو بادئ كده ما نأخذ حاجة من التراث مضمونة، لأنه الخل والعسل يعني برضو هل طعمهم هيبقى مقبول لكل إنسان؟ لأن كيف تضيف الخل مع العسل؟ الشيء هو يعني الشيء.

أحمد منصور: هو الآن حضرتك الآن وضحت إن كل حاجة لها وقت بتؤخذ فيه.

د. عبد الباسط محمد سيد: وقت نعم.

أحمد منصور: ولو الإنسان حرص إن هو يتناول الحاجات في أوقاتها بالجرعات المحددة هيبقى هو يمشي يضبط أموره..

د. عبد الباسط محمد سيد: آه، يعني حضرتك بعد كده رسول الله كان..

أحمد منصور: هي كميات الطعام هي سبب بلاء أشياء كثيرة.

د. عبد الباسط محمد سيد: طبعاً.. طبعاً.

أحمد منصور: وزي ما حضرتك أشرت إدخال الطعام على الطعام، ومثل هذه الأمور كلها من الأشياء اللي بتفسد هذه الأشياء.

أهمية وجبة العشاء في ظل هدي السنة النبوية

د. عبد الباسط محمد سيد: يعني رسول الله -صلى الله عليه وسلم- قال بعد كده: "من ترك طعام العشاء فقد وهن جسده".

أحمد منصور: من؟

د. عبد الباسط محمد سيد: ترك طعام العشاء، يعني قال لنا: لازم تتعشوا.

أحمد منصور: معنى كده إن العشا هو الوجبة الأساسية؟

د. عبد الباسط محمد سيد: لأ، الوجبة الأساسية كان رسول الله بيأكل اللبن الرايب اللي هو اللبن الروب.

أحمد منصور: يعني العشا بيعتبر الوجبة الأساسية هنا.

د. عبد الباسط محمد سيد: آه.. يعني ما تعتبرش الوجبة الأساسية عند رسول الله، بيأكل الروب وكسرة خبز برضو من الشعير.

أحمد منصور: ما هو الوجبات بتاع الرسول واضح إنها كلها كده، لكن عليكم بالعشاء فقد وهن جسده.

د. عبد الباسط محمد سيد: آه يعني من ترك.

أحمد منصور: "من ترك العشاء -عفواً- فقد وهن جسده" دليل على أن العشاء يعتبر وجبة أساسية.

د. عبد الباسط محمد سيد: وجبة أساسية طبعاً، مهمة آه،.. تقصدها بالناحية دي.

أحمد منصور: أنا أقصدها من الناحية دي.

[فاصل إعلاني]

أحمد منصور: دكتور كنا وصلنا إلى العشاء.

د. عبد الباسط محمد سيد: أيوه حضرتك إحنا قلنا من ترك طعام العشاء فقد وهن جسده، لكن أي عشاء، يعني العشاء دائماً كان رسول الله -صلى الله عليه وسلم- يأكل اللبن الرايب اللي هو الروب، مقدار الكوب مع كسرة خبز من الشعير.

أحمد منصور: ودا له أهمية كبيرة وردت.

د. عبد الباسط محمد سيد: آه طبعاً لأسباب لأنه ده بيعمل عملية تخمير للمصران الغليظ الكميات اللي موجودة في فضلات المصران الغليظ، ودا بيمدنا بكل أفراد الفيتامينات...

أحمد منصور: عشان كده الناس اللي بتأخذ زبدية قبل النوم أو لبن رايب أو الغذاء كذا..

د. عبد الباسط محمد سيد: ولذلك فعلاً جنوب شرق آسيا من طشقند وسمرقند وبخارى والكلام دا تجد من..

أحمد منصور: دول وسط آسيا.

د. عبد الباسط محمد سيد: دائماً وسط آسيا بيتصبحوا بالعسل النحل الصبح والزبادي بالليل.

أحمد منصور: عشان كده الشباب عندهم 90 سنة.

د. عبد الباسط محمد سيد: أيوه والخل دايماً يتحط على الأكل هناك بصفة مستديمة، ولذلك ما تجدش أي تصلب شرايين، تجد عملية الشباب سِنَّه 90 سنة اللي إحنا بنشوفهم في الحج تلقى 91 سنة وأحسن مننا قوة.

فوائد التين في الوقاية من النقرس وعلاج البواسير

أحمد منصور: أسامة منصور مراد -رجل أعمال من أسبانيا وصيدلي- يقول: توجد في التين مادة مضادة لمرض الزهايمر وهي موجودة في الزيتون وتركيزها في التين 7 مرات أكبر في التين والزيتون، ذكر 7 مرات في القرآن بينما التين ذكر مرة واحدة، التين إحنا اتكلمنا عن فوائد الزيتون، أيه فوائد التين؟

د. عبد الباسط محمد سيد: أيوه للتين حضرتك رسول الله -صلى الله عليه وسلم- بيقول "لو قلت أن فاكهة من الجنة لقلت أنها التين" لأن فاكهة الجنة بلا عجم.

أحمد منصور: يعني مافيهاش بذر.

د. عبد الباسط محمد سيد: مافيهاش بذر آه، و"كلوا التين فإنه يرفع البواسير ويذهب داء الملوك".

أحمد منصور: يا سلام.

د. عبد الباسط محمد سيد: أيوه.

أحمد منصور: اللي هو..

د. عبد الباسط محمد سيد: النقرس.

أحمد منصور: النقرس آه.

د. عبد الباسط محمد سيد: وهو فعلاً ثبت إنه هو ليه علاقة بالإنزيم الخاص بتحويل الزانسين إلى اليوريك أسيد.

أحمد منصور: يعني بسَّط.. على ما.

د. عبد الباسط محمد سيد: يعني هو حضرتك زي ما بيحول يعني بيرسب اليوريك أسيد فالإنزيم بدل ما بيخليه يمشي في اتجاه واحد، يمشي في اتجاهين فيعمل الاتزان، ولذلك إحنا الأدوية بنثبط هذا الإنزيم، اللي بنديها من بره، لكن بنثبطه جزئياً، لكن التين ينظم يعني شوف حضرتك النقرس هو عبارة عن خطأ في التمثيل الغذائي، وعشان كده بقى نقدر نقول أيه يا أستاذ أحمد، الأدوية الكيميائية كما ذكرت حضرتك شفت عرض ولم تشفِ مرض؟

أحمد منصور: يا سلام، فبيبقى المرض لكن عرضه بيزول.

د. عبد الباسط محمد سيد: عرضه بيزول، فالمرض يتحول إلى مرض مزمن.

أحمد منصور: لكن هنا ا لهدف هو إزالة المرض نفسه.

د. عبد الباسط محمد سيد: المرض نفسه السبب.

أحمد منصور: وليس العرض.

[يتيم الشعر]

د. عبد الباسط محمد سيد: بالضبط كده، فالتمثيل.

أحمد منصور: إزالة أسباب يعني لا نزيل الصداع وإنما أسباب الصداع.

د. عبد الباسط محمد سيد: بالضبط.

أحمد منصور: بحيث لا يأتي مرة ثانية.

د. عبد الباسط محمد سيد: هذا هو طب رسول الله يتركز في النقطة دي.

أحمد منصور: واللي الطب الحديث كله بيركز عليه.

د. عبد الباسط محمد سيد: بيركز عليه لأسباب.

أحمد منصور: أصبح حوالي 50% من الألمان يعتمدوا على هذا، الأوروبيين أصبحوا يتوجهوا بشكل كبير إلى هذا، حتى الأميركان.

د. عبد الباسط محمد سيد: الأميركان بياخذوا الأدوية بتاع رسول الله بتاعتنا وبيقننوها، يعني بيحطوه في تقنين علمي، ودا المطلوب مننا إحنا، فلذلك شوف حضرتك النقرس عبارة عن خطأ في التمثيل الغذائي، التين يصلح الخطأ في التمثيل الغذائي فبتعود.

أحمد منصور: كمية التين أيه اللي الإنسان يحتاجها؟

د. عبد الباسط محمد سيد: هو رسول الله حددها ثلاثة في اليوم.

أحمد منصور: ثلاث تينات.

د. عبد الباسط محمد سيد: ثلاثة لمدة -شوف حاجة غريبة جداً- لمدة أسبوع.

أحمد منصور: في الحديث جت كده.

د. عبد الباسط محمد سيد: آه في الحديث جاءت في تفسير الحديث.

أحمد منصور: في تفسير الحديث.

د. عبد الباسط محمد سيد: يعني مثلاً اللي ذكر هذا الحديث حضرتك ذكره أبو نعيم في الطب النبوي ولما ذكر إن رسول الله طب التين هل اللي موجود على طول أو حتى التين المحفوظ.

أحمد منصور: المجفف.

د. عبد الباسط محمد سيد: المجفف، يتحط في المية عشان يتشال السكر منه ويتاكل، واخد بال سيادتك، لسبع مرات.. يعني لمدة أسبوع كل يوم ثلاث تينات، وبعدين شوف التمثيل مش.. تصحح من التمثيل الغذائي.

أحمد منصور: حتى البواسير.. حتى..

أحمد منصور: بترفع البواسير لأسباب لأنها ما فيها مادة قابضة، وبعدين الأخ اللي بيقول لك إن ليها علاقة بمادة الزهايمر اللي موجودة هي المواد الملينة والمواد المطهرة اللي موجودة في التين ومضادات الأكسدة اللي موجودة في الألوان فعلاً البحوث دلوقتي بتتجه إليها، يعني حضرتك.. ولذلك حضرتك ... "لو قلت إن فاكهة الجنة لقلت إنها التين".

العلاج الحديث واستخلاصه من السنة النبوية والقرآن

أحمد منصور: عندي عبد الرحيم أحمد عبد الله -مهندس مصري- بيقول: ذهبت إلى عيادتكم في مسجد الدكتور مصطفى محمود وأخذت العلاج اللازم لفيروس C الذي تتحدثون عنه، واستعملت العلاج كما قيل، ولم يذهب الفيروس، فهل لديك بديل؟

د. عبد الباسط محمد سيد: لأ مش لدي بديل، هو حضرتك معلش أصل الناس في مصر هنا لما بتيجي تتعالج بتتعالج إزاي؟ هو بيتعالج out Patient يعني مريض خارجي، فالمريض الخارجي في مصر هنا يأخذ الدواء فترة ويسيبه فترة، لكن إحنا عندنا 147 ألف حالة شفاء لمن.

أحمد منصور: هنا في مصر.

د. عبد الباسط محمد سيد: آه في مصر اللي هم استمروا.

أحمد منصور: من خلال هذا الاختراع.

د. عبد الباسط محمد سيد: أيوه من خلال هذه النقط بتاعة الفيروس.

أحمد منصور: وبيعالجوا من خلال المسجد أيضاً بأجر رمزي.

د. عبد الباسط محمد سيد: بأجر رمزي، فحضرتك الأمور كلها.

أحمد منصور: حضرتك ما لقيتش شركة أدوية هنا..؟

د. عبد الباسط محمد سيد: والله فيه (فيتا فيجور) الأميركية بتتعاقد دلوقتي على اعتبار البحوث.. تكمل لأسباب، وإن شاء الله هيطرح في السوق قريباً يعني.

أحمد منصور: يعني.

د. عبد الباسط محمد سيد: بس لما هينزل هينزل ببرنيطة الخواجة فالناس هتقبله.

أحمد منصور: لكن يعني رغم إنك أنت مخترعه هنا ما فيش أي شركة عربية أو..

د. عبد الباسط محمد سيد: لا لا لا ما فيش.

أحمد منصور: حاولت إنها تأخذه.

د. عبد الباسط محمد سيد: لأ هو حتى.

أحمد منصور: رغم إن هنا في مصر بيعانوا بنسب عالية جداً من.. من الكبد الفيروس.

د. عبد الباسط محمد سيد: والله الأمور ابتدت يعني الناس ابتدت يبقى وعيها يزيد، فالكلام اللي اتقال يعني هي كانت مرتبط بالبلهارسيا بحقن البلهارسيا اللي كانت بتنتقل من إيد لإيد قبل الحقن اللي... البلاستيكية.

أحمد منصور: البلاستيك.

د. عبد الباسط محمد سيد: آه اللي هي بتستخدم لفرد واحد ثم إيه يقوم يتخلص منها، فأيام البلهارسيا كانت الحقنة بتنتقل من إيد لإيد فيعتقد إنه انتقل في ذلك الوقت.

أحمد منصور: اختراعك الآخر يا دكتور الخاص بالقطرة الخاصة بالـ..

د. عبد الباسط محمد سيد: والله إحنا خذناها من.. من كانت ليها قصة غريبة جداً إن إحنا قولنا إن طبعاً معجزة سيدنا يوسف هي معجزة (اذْهَبُوا بِقَمِيصِي هَذَا فَأَلْقُوهُ عَلَى وَجْهِ أَبِي يَأْتِ بَصِيراً وَأْتُونِي بِأَهْلِكُمْ أَجْمَعِينَ)، فحضرتك بمجرد ما هتلقي القميص هيأتي بصيراً، دي معجزة نبي، مش كده ولا أيه؟

أحمد منصور: طبعاً.

د. عبد الباسط محمد سيد: لكن الأمر هنا (وَلَمَّا فَصَلَتِ العِيرُ قَالَ أَبُوَهُمْ إِنِّي لأَجِدُ رِيحَ يُوسُفَ) الله! يعني الأمر هنا فإحنا حللنا العرق لقيناه مكون من 52 مادة.

د. عبد الباسط محمد سيد: عرق الإنسان.

د. عبد الباسط محمد سيد: أي إنسان، حتى الناس بتختلف بيقول أيه طب ما عرق دا مش عارف ليه ريحة ودا عرق، لأ هو عرق.. وكل واحد زي الثاني.

أحمد منصور: حتى لو مالوش ريحة.

د. عبد الباسط محمد سيد: آه بس دا بكتريا بتنمو على العرق فبتسبب ريحة، وبكتريا ما بتنموش على العرق ما تسببش إنما كل إنسان...

أحمد منصور: لكن الأصلي نفسه أصل العرق 52 مادة.

د. عبد الباسط محمد سيد: 52 مادة، حللناهم، وجبنا العدسة اللي فيها عتامة اللي مأخوذة بعمليات جراحية تقليدية وحطيناها في أطباق وجبنا كل مادة ونحط على العدسة لقينا مادة منهم بتحول العدسة المعتمة إلى عدسة شفافة.

أحمد منصور: من الـ 52 مادة دول.

د. عبد الباسط محمد سيد: من الـ 52 مادة، خذناها واتعرفنا على تركيبها وابتدينا نصنعها.

أحمد منصور: سبحان الله!

د. عبد الباسط محمد سيد: فإذن أنا بأقول...

أحمد منصور: وسجلت هذه البراءة.

د. عبد الباسط محمد سيد: سجلت هذه البراءة في أميركا وفي أوروبا سنة 93 و95، 93 في أميركا، و95.

أحمد منصور: والآن بتنتج هذه المادة؟

د. عبد الباسط محمد سيد: الآن (سيبا جايجي) هتنزل انتاجها يمكن ابتداءً من أول السنة الجديدة من 2003.

أحمد منصور: هذه مجرد قطرة لهذه المياه البيضاء.

د. عبد الباسط محمد سيد: بدل العملية الجراحية.

أحمد منصور: اللي كانوا بيعملوا فيها عملية جراحية، تزيل المياه البيضاء.

د. عبد الباسط محمد سيد: ومأخوذة من إشارات قرآنية نحن.. نحن أيه؟ لا ننفي إن كثير جداً من الناس يقول لك أيه؟ دي معجزة نبي، طب ما إحنا ما نمشيش.. ما إحنا دلوقتي كنا بتتكلم عن المياه اللي شُفي بها سيدنا.

أحمد منصور: أيوب نعم.

د. عبد الباسط محمد سيد: أيوب، يعني طب ما هو دلوقتي فيه علاج بالماء، وأهوه إشارات قرآنية موجودة إحنا معجزة سيدنا يوسف لا ننفيها، لكن إشارات قرآنية هي اللي دلتنا، وثبت صحتها، دا غير كده بقى إن وجدوا إن فيه بياض في القرنية يعني القرنية السوداء أو الخضراء لبعض الناس أو الزرقاء عند بعض الناس، هذه القرنية أحياناً يحصل فيها بياض القطرة صالحة لهذا.

أحمد منصور: يا سلام!

د. عبد الباسط محمد سيد: تزيل بياض القرنية.

أحمد منصور: وكل هذه الأبحاث العلمية كلما انتهت والآن ستطرح في الأسواق قريباً.

د. عبد الباسط محمد سيد: إن شاء الله القطرة هتطرح في الأسواق، أما بالنسبة لفيروس C فهتاخذه فيتا فيجور وحضرتك إحنا عندنا 146 ألف حالة شفاء في مسجد محمود فقط في المهندسين.

أحمد منصور: عندي أحمد.. أحمد عادل بيقول: لو تدلونا على مصادر يعني من بعض المصادر يقول فتحتم شهيتنا إلى العلم.

و.. أحمد عبد العزيز من القاهرة يقول: هل هناك مصادر يمكن أن نرجع إليها للتعرف على هذه الأشياء؟

د. عبد الباسط محمد سيد: أنا موجودة الكتب في مصر بس الناس لا تقرأ، كتابي..

أحمد منصور: آه كتبك أنت..

د. عبد الباسط محمد سيد: كتابي "التداوي بالأعشاب والطب النبوي" أنا استعرضت فيه كل هذه الأمور وبأسلوب ديني وعلمي، يعني وضحت الجانب الديني وفسرت جنبه الجانب العلمي ليس من وجهة نظري..

أحمد منصور: فيه مواقع على الإنترنت؟

د. عبد الباسط محمد سيد: فيه موقع لي على الإنترنت بس الحقيقة أنا مش فاكره، لو ممكن يعني يتصلوا بتليفوني.

أحمد منصور: أنا الحقيقة برضو عندي بعض المصادر ممكن أقول لمشاهدينا عليها الدكتور حسان شمس باشا له مجموعة من الكتب، "قبسات من الطب النبوي والأدلة العلمية الحديثة"، "زيت الزيتون من الطب والقرآن"، "الأسرار الطبية الحديثة في الثوم والبصل"، "الشفاء بالحبة السوداء"، والدكتور محيي الدين عمر لبنية أيضاً له كتابين ممتازين عن العلاج الغذائي للأمراض والتوابل وفوائدها العلاجية، وهناك موقع على الإنترنت أيضاً:http://www.khayma.com/chamsipashaa

أيضاً عليه معلومات كثيرة جداً متاح لكل الناس لمن أراد أن يحصل على هذه الأشياء المتعلقة بالجوانب العلمية متطابقة مع أحاديث رسول الله -صلى الله عليه وسلم- والقرآن الكريم، دكتور للأسف الوقت خذنا وإحنا ماعملناش 10% من اللي احنا متفقين عليه.

د. عبد الباسط محمد سيد: لأن الموضوع في الحقيقة..

أحمد منصور: لأن يعني أنا اكتشفت أنك كنز كبير جداً.

د. عبد الباسط محمد سيد: لأ العفو يا سيدي العفو.

أحمد منصور: وللأسف مهمل من وسائل الإعلام وغير ملتفتة إليك رغم جهدك العلمي الضخم.

د. عبد الباسط محمد سيد: الله يخليك.

أحمد منصور: والكبير وإنك يعني تكاد تكون متبحر في العلم الديني والعلم..

د. عبد الباسط محمد سيد: الحمد لله.

أحمد منصور: الجوانب العلمية بشكل يعني ربنا فاتح عليك ربنا يديم عليك النعمة يعني.

د. عبد الباسط محمد سيد: الله يعافيك.

[يتيم الشعر]

أحمد منصور: باقي آخذ منك شيء مهم يتعلق بالرمان، (فِيهِمَا فَاكِهَةٌ وَنَخْلٌ وَرُمَّانٌ) وسيدنا.. روي عن علي -رضي الله عنه- فيما رواه أحمد: "كلوا الرمان بشحمه فإنه دباغ للمعدة"، ما هي فوائد الرمان باختصار؟ وهو كيف يكون..

د. عبد الباسط محمد سيد: هو الرمان يا أفندم فيه حديث لرسول الله -صلى الله عليه وسلم- بيقول "ما من رمانة إلا ولقحت من رمان الجنة، وما رمانة إلا فيها حبة من رمان الجنة".

أحمد منصور: عجيب!! الرمان اللي في إيدينا دا اللي بناكله؟

د. عبد الباسط محمد سيد: اللي في إيدينا، ولذلك سيدنا علي كان يحرص إنه ياخذ كل الفصوص الموجودة في الرمان حتى أصيب فص رمانة الجنة.

أحمد منصور: الفص بالكامل يعني.

د. عبد الباسط محمد سيد: أيوه، أما عن "كلوا الرمان بشحمه فإنه دباغ للمعدة"، أولاً القلف الأبيض اللي جوه اللي هي الطبقة البيضاء اللي بين الفصوص دي بتحتوي على مادة قابضة ومضادة للحموضة، وثبت إنها بتعمل شفاء لقرحة المعدة وقرحة الإثنى عشر، والبحوث بتقول إنهم بياخدوا المستخلص المائي أو المعلق منها، يعني يعملوها معلق، ويخشوا بالمناظير يحقنوا قرحة المعدة وقرحة الإثنى عشر فتبرأ في الحال.

أحمد منصور: يا سلام!

د. عبد الباسط محمد سيد: ولذلك شوف رسول الله "كلوا الرمان بشحمه فإنه دباغ للمعدة".

أحمد منصور: يعني بقلبها كلما..

د. عبد الباسط محمد سيد: بقلبها.. بالقلب الأبيض اللي هو..

أحمد منصور: بس بتشيل القشر من بره.

د. عبد الباسط محمد سيد: من بره، ولذلك حضرتك الجزء اللي جوه حضرتك أخذته وجففته وجت عندك أي كمية حموضة وأنت المجفف دا خدته بلسم، بمجرد ما تاخده يضيع الحموضة تماماً.

أحمد منصور: حتى يمكن للإنسان اللي بيعاني من القرحة، أو كذا أن يتناول الرمان بهذه الطريقة؟

د. عبد الباسط محمد سيد: بهذه الطريقة ويتناول ويجفف الجزء الأبيض اللي من جوه وياخذه القرحة والجروح بتاعة المعدة هتنتهي تماماً.

أحمد منصور: هتلتئم لوحدها.

د. عبد الباسط محمد سيد: تماماً.

أحمد منصور: وثبت علمياً هذا الأمر.

د. عبد الباسط محمد سيد: ثبت علمياً بتجارب المنظار.

أحمد منصور: يعني الآن بيحقنوا فعلاً بدأوا يعملوا عمليات.

د. عبد الباسط محمد سيد: آه في هذا الكلام.

أحمد منصور: قرحة المعدة بحقن المنظار بهذه المادة.

د. عبد الباسط محمد سيد: كميات كبيرة جداً في وسط أوروبا وبهذه الكيفية وللأسف إنهم واخدينها برضو من هذا التراث.

أحمد منصور: لازال أمامنا عشرات الأسئلة والمحاور، انتهى الوقت للأسف، لكن أنا أعد المشاهدين اللي أرسلوا كثير من الأسئلة سواء عبر البريد الإلكتروني أو عبر الفاكس في أن نسعى -إن شاء الله- إلى أن نحاول أن نستكمل هذا الجانب الهام الذي يمكن أن يقي الإنسان، لأن إحنا جانب الوقاية لم نتحدث عنه مطلقاً كيف يستطيع الإنسان أن يقي نفسه كثير من الأمراض باتباعه أسلوب غذائي سليم نابع من وحي الرسول -صلى الله عليه وسلم- ومن وحي القرآن الذي أخذه كثير من العلماء الغربيين مثل هذا العالم ووضعوا به أنظمة غذائية يتبعها عشرات الملايين من الناس في هذا الكون.

في الختام أشكر ضيفي هنا في الأستوديو الدكتور عبد الباسط سيد (رئيس قسم الكيمياء الحيوية في المركز القومي للبحوث في مصر).

كما أشكركم مشاهدينا الكرام على حسن متابعتكم، في الختام أنقل لكم تحيات فريقي البرنامج من القاهرة والدوحة، وهذا أحمد منصور يحييكم (بلا حدود) من القاهرة، والسلام عليكم ورحمة الله وبركاته

[دكتور/ شريف الباجوري]

الاخ الفاضل يتيم الشعر
السلام عليكم ورحمه الله و بركاته
موضوع مهم جدا لاستاذ فاضل و مجهود عظيم منك لنقل هذا الموضوع و كتابته هنا ليستفيد به كل الاخوه
اولا:
عن نفسي لا احب استخدام الادويه الا في اضيق الحدود واستعمل الاعشاب والمواد الطبيعيه فمثلا حين اصاب بالبرد استخدم البصل و عصير الليمون الدافئ المحلي بعسل النحل و كذلك زيت حبه البركه
ثانيا:
الاعشاب و المواد الطبيعيه ليس لها اي اثار ضاره اذا استخدمت بطريقه صحيحه و بمقادير دقيقه لانها اذا ذادت انقلبت الي شئ يضر و لا ينفع
ثالثا:
من عيوب العلاج بلاعشاب انها لا تؤتي نتيجه فوريه ولكن تستمر حوالي اسبوع او اكثر لكي تعطي نتيجه شافيه ولكن يمكن استخدامها كوقايه مسبقه ضد الامراض
اما العلاج بالكيماويات و هي ايضا تعتبرمواد مستخرجه من الطبيعه ولكن يعيبها الاضرار الجانبيه التي في بعض الاحيان خطيره ولكن من مميزاتها انها سريعه في تأثيرها و خاصه في امراض لا نسطيع فيها الانتظار مثل مرض(asthma) حساسيه الصدر حين تأتي له ازمه شديده في التنفس فيجب هنا التدخل بالادويه و انصح العلاج بألاعشاب علي المدي الطويل حتي نتجنب الازمات و بالتالي تجنب العلاج بالادويه

الخلاصه هنا اننا نحتاج العلاج بالادويه الي جانب العلاج بالاعشاب و المواد الطبيعيه جنبا الي جنب لان كل منهما مكملا للاخر مع مراعه الاقلال من الادويه في الحالات التي لا تستدعي التدخل السريع
مره اخري موضوع ممتاز جدا بل اهم موضوع كتب في هذه الخيمه منذ انشائها
اخوك
دكتور شريف

[يتيم الشعر]

أخي الدكتور شريف

تحية طيبة وبعد ..

أشكرك على تعقيبك المفيد والقيم ..

حقيقةً أعرف أن الموضوع طويل جداً لأنها مقابلة تلفزيونية لكنني أحببت أن يطلع عليها كل المهتمين بالأمر ..

وشكراً جزيلاً