خذوك لحم, ردوك عظم

[الكويت-أمانة]

13 سنة وآنا كل يوم أدعي الله أنى أشوفك
13 سنة وآنا كل يوم أفكر فيك نايم ولا صاحي, جوعان ولا شبعان, دافي ولا بردان لكن اللي ما فكرت فيه عايش ولا ميت"لأن الأمل كان دايما موجود"
13 سنة وآنا كل يوم أمني نفسي و عيالك انه بيجي اليوم اللي بتلمنا فيه وتحضنا وساعتها بترد كل سنيني وراء 13 سنة.
13 سنة وانا كل يوم عندي أمل أن اكحل عيوني بشوفك
13 سنة وآنا كل يوم أشم ملابسك و أتعطر بعطرك وأحتفل كل يوم بعمرك
13 سنة وآنا كل يوم ارتب دارك وانفض الغبار منها
13 سنة ودموعي ما انشفت من خدي
13 سنة وآنا كل يوم قلبي ينبض باسمك ,أذني ما تسمع إلا صوتك, وعيني ما تشوف إلا صورتك, وجلدي ما يحس إلا بلمسة يدك
13 سنة وآنا كل يوم أكتب بالساعة والدقيقة اللي يصير بحياتنا عشان لما ترجع وتقراها وتحس انك ما بعدت عنا دقيقة
في هال 13 سنة أبوك مات واهو فاتح عيونه ولسانه ينطق بعد الشهادتين باسمك
في هال 13 سنة امك انشلت وما عادت تتكلم أو تتحرك , ما أشوف بعيونها الا الحزن والدموع وأحس بلسانها ينطق باسمك كل ما رن التيليفون أو جرس الباب
في هال 13 سنة ربيت عيالك على حبك وأمل شوفتك بعيونهم وأحس انهم ما يحلمون الا فيك
في هال 13 سنة عيالك صاروا بطولك وأصغر واحد فيهم عمره 13 سنة.
بعد هذا كله , بعد 13 سنة أمل وألم وانتظار ....
جاني خبر استشهادك يا لغالي...
جابولي عظامك الطاهر..عظام حضنته , وبدل أنى أرد 13 سنة قبل , كبرت ضعفه وأكثر
قتلوك الأنجاس, البعثيين العراقيين والتهمة انك كويتي
التهمة انك كويتي.... تحب الكويت....
آنا ما عندي اعتراض .. ما عندي اعتراض ... قدر الله وما شاء فعل
آنا أحتسبك عند الله شهيد بإذنه تعالى"آمين"
لكن اللي قاهرني اللي مو امخليني أرتاح ...
طريقة موتك ودفنتك.
قاتلك ما هو مسلم .. أكيد قاتلك ما هو مسلم...دمك ملطخ أياديهم ليوم الدين...أبدا ما راح أسامح أبدا.
حسبي الله ونعم الوكيل... حسبي الله ونعم الوكيل... حسبي الله ونعم الوكيل