دامك خوي لي فلاني بربحان && ودامك خوي لي فأنا حظي أقشر!

*اليشمـــك* · #1 22-05-2003, 05:49 PM

السلام عليكم

الشاعر سلطان على العتيبي يحاور حظه

الشاعر:

دامك خوي لي فلاني بربحان && ودامك خوي لي فأنا حظي أقشر

عزالله أني كان أسمّيك نومان && ياحظي اللي عن ردا الحظ يقصر

الحظ:

يالله صباح خير وشفيك زعلان && وراك لا صبحتني قمت تزمر؟

النوم كانك ماتعرفه للأبدان && راحة وأنا عن لذّة النوم ماأصبـر

الشاعر:

قم قمّك الله لامتى وانت كسلان && تشرق وتغرب شمسها وأنت تشخر

كل نهض حظه قبل وقت الأذّان && وأنت بمكانك لك زمانين وأكثر

الحظ:

بدري مقامي توّ للحين ماحان && نطرت واجد تقدر شـوي تنطـر

مافيه فيما فات لك غير نقصان && صبرك تراني ودّي أغنم لك أكثر

الشاعر:

يامال فرقأالعين مكذبك خيبان && عليك كم لي صابر أسنين وأشهر
كم فرصة ضيّعتها يا عميّان && ماهوب ماودّك بها منـت تقـدر

الحظ:

تبي الصراحة يابن الأجواد عجزان && من وين ما مشّيت رجلي تعثّر
أنا تراي وقلّت الحيلة أخوان && لوني لحالي ساعة الفرصة أخسـر

الشاعر:

وأنا وشنهو ذنبي أتبعك فقران && وانته عن حظـوظ العبـاد متأخّـر

في ماي أبيك تشيلني صرت ورطان && عوّدت أشيلك تقل أشيل متكسّر

الحظ:

قاعد على قلبك على طول الأزمان && وش عاد لو ما قلت لي يوم تشكـر

ولو مت يالصاحب وأنا أشوف ضميان && ماأسقيك لوهي فوق يمناي تمطر

الشاعر:

المغني الله ماأنتظر منك الاحسان && هو الذي في حالة اعباده أخبـر
والا أنت بوم من قنص فيك خسران && عن كل صيده بارد الوجه تدبر
تحياتي

همس الأحاسيس · #2 22-05-2003, 06:07 PM

عاد تصدقين يا اليشمك إنو هالحظ أعرفه

لايكون أخذه هالشاعر من عندي

شوفي هالبيت أعجبني بالحيل لأن حظي بصراحه دايم يقول لي نفس الكلام

إقتباس:

بدري مقامي توّ للحين ماحان && نطرت واجد تقدر شـوي تنطـر
مافيه فيما فات لك غير نقصان && صبرك تراني ودّي أغنم لك أكثر

بااااي

*اليشمـــك* · #3 23-05-2003, 05:59 PM

نسيت أقول انو القصيدة إهداء خاص للعزيزة ريم

بالذات البيتين:

قاعدعلىقلبكعلىطولالأزمان&&وشعادلوماقلتلييومتشكـر
ولومتيالصاحبوأناأشوفضميان&&ماأسقيكلوهيفوقيمنايتمطر

والله ونا اكتبها تذكرتك

سبحان الله

كنها مكتوبة علشانك!

تحياتي لاصحاب الحظ المقرود

همس الأحاسيس · #4 25-05-2003, 07:03 AM

أختي اليشمك

من جد أبي أدبغك والله

بس تعرفين تذكرت أبيات لي من زمان قلتها
ومنها
الذيب قبلي ما نفعه الهريفي *** صبره على جوع وصبري على نار
ياذيب هيّا نعتلي بالمنيفي *** أبدي لك أسرار وتبدي لي اسرار
حظي وحظك في القراده صفيفي *** أحتار تفكيرك .. وتفكيري احتار

ومن جد حظي مقرود

بس إنتي تمونين عيوني
كل اللي يجي منك حلو

بس

لا تكررينها

باااي

*اليشمـــك* · #5 25-05-2003, 03:20 PM

انتي أصلا حظك حلو عارفة ليش

لأنك عرفتيني

لما شفت الحريقة اللي اشعلتيها في بداية الرد

قلت الله يستر شكلنا عكينا

آسفين وإن شاء الله ما راح اكررها

تحياتي لأصحاب الحظ المقرود فقط