السالفه سالفتي ..بكيفي مالي مزاج اكتب لها موضوع ...(((:

المنشق · #1 26-06-2000, 02:41 AM

قمت من النوم وغسلت وسويت لي ريفرش وافطرت وعينت من الله خير ..وحبيت راس الوالده ..مع انها حاطه حنا ..
.وطنت براسي اروح اتقضى من العقاريه .. لسببين
1- اني ماني بحب الزحمه حقت الليل.
2- علشان افتك من اللي انتم خابرين وتعهداتهم اللي مايدري الواحد ليه .

ولبست ثوبي وشماغي.. واركب سييريتي وادحدر للعقاريه ...
والله وادخل للعقاريه الا والله المحلات توها مابعد فتحت كلها ... واروح اتكي بالمطعم اتقهوى لين مايفتحون .. والله وانا جالس وتمر هك البنت اللي ودك تناظر فيها بس .. ووراها 8.. قلت ياولد قم رح وراهم وشف وش بيصير .لين تفتح المحلات. (والله ماكان لي أي نيه بشي) المهم وتجلس تسحب فيهم شوي ..ماشبهتهم الا على البساس اللي يلحقن امهن سرا .. وتطلع البنت من السوق وتوقف بالشارع واوقف عند الباب بشوف وش بيصير ..ومن اللي بيرقمها ولا ....
والله وانا واقف وتقزن هك القزه من ورى البرقع اللي خلت ركبي تصافق ..وتأشرلي بيده (يعني تعال) انا مااستوعبت الاشاره صراحه .. لانه ماكنت اتوقع ان فيه خبله بتشرلي..
اشرت مره ثانيه عاد تاكدت انه تبين .. والله وانقز له .. واول كلمه قالتها ..وين سيارتك؟ قلت سيارتي تحت بالمواقف ... قالت رح جبها وانا بنتظرك هنا لاتبطي ...(يلعن ابو الجرأه)
بيني وبينكم بقدرة قادر ثانيه وحده ولاني عندها انا والسياره(خفت ابطي عليها وتطير)
اول ماشافتني وتجي وتركب والله كنها تعرفني من عشر سنين....
... مشيت ماسك شارع العليا ومتوجه لاشارة العروبه ...لاومشغل ابونوره ..(ياليل ياجامع)يعني اني مادرت اني يوم اطلع من المواقف طلعت شريط مزعل وحطيت محمد عبده .
المهم وانا ماشي وتفتح شنطتها وتطلع عطر ... (اترنتي رجالي!!) افااااا
انا من شفتها تعطر بعطر رجالي دخلتني المويه .... لاوهذا وانا ماقلتلكم يوم تسالني وين السياره وشلون صوتها ..(والله ماشبهته الا على القلابي اللي واقف ويكب حصى من خشنه)
لا والمشكله توني مابعد شفت وجهها ...(ياوالله البلشه )
..........قلتلها وش وضعك الحين .. متى تبيني انزلك ؟ قالت تونا وتو خير ... (مع ان البوادر ماتبشر بخير لكن وناااسه..مأمل على الوجه)
لفيت يمين مع اشارة العروبه .. واحاول فيها تفتش عيت بنت اللذين .. قلت مالتس حق والله جالس مع وحده مدري وشلون قايل شكله هي غزال ولا عنز..اكشفي بس بلا دلع ..يالله عاد..
اشوى رحمتن وفتشت ...... فتشت ياناس وليته مافتشت..يليته مارحمتن
..... اول ماشالت البرقع وحياتكم ماشفت الاالبراطم ..ياربيييييييه (بحلي ياعتاب) صدق من قال تحت البراقع صواقع(اثر بنينا يلبسون البراقع علشان يغطون شنباتهم)
واطالع في وجهها من غير نفس .... الا والله وش اشوف متروس ميك أب .. يعني لو تشيل بكريك عبيت زبيل ....صراحه انا ضاق صدري من جد .. وابلش بعمري وشلون بصرف هالشينه .. ماش اخلاقي ماتسمحلي اني اشوته مع الدريشه .. ولا ودي والله .... قمت طلعت شريط محمد عبده ورجعت مزعل (قلت بضيق صدرها) ...يوم قامت تغني معه .. ياوالله البلشه...
صراحه انا قفلت معي من جد .. ووقفت عند ماي وي اللي بالعروبه .. وناديت الفلبيني ..
قلتله (هات واحد كبتشينو) ولا شاورتها .... ابيها تفهمها ...قالت لالالامابي شبكتينو شكرا... قلت هذا لي ماهو لتس ..... قالت اشوى ..(يلعن ام البجاحه) ...المهم والله وتطن براسي فكره لتصريفتها ... قلتلها
(وانا موجه للعقاريه) ...صراحه يابنت الناس انا من اشرلتيلي ..وانا احسب انك تعرفيني او تعرفين احد من خوياي ..وتبينن افكتس من الشباب ... بس الحين تاكدت اني مالي أي علاقه فيتس ولا لتس علاقه بخوياي .. وانا يابنت الناس عندي محل بالعقاريه ..والمفتاح معي ..والعمال اكيد منلطعين عند الباب ..(داري ان عذري مثل وجهي ومكفوش .. بس مالقيت غيره) .... قالت لالالا عادي .. طيب عطني رقمك ...وودني لمقيبره!!!!! ..
واعطيها رقم والله مدري لمن (داري انه قام يدعي علي ..بس وش اسوي)....اشوى اللي ماقالتلي عد الرقم مره ثانيه؟ ولا كان ورطت....
والله وارجعها للعقاريه .. ولنفس الباب .(ولاكني سمعت مقيبره ابد).. وبالصدفة كان بعض الشباب اللي كانوا يلحقونها واقفين يسولفون ( داري انهم لاعنين الطيب فيني)
واوقف وانزلها ... ومسيكينه فيه واحد من هالشباب لسانه يلوط اذانه ... ميت من الضحك ويقول ...نزلتس يالشينه وعععع يالقبيحه وراه رجعك...طلعتي مقلب... بهاللحظات وقف جمس فيه 2 شباب رقابهم مشصبه من الرسامه .(جان احساس ان لو اللي يسوق قال للراكب شف البنت اللي علي يسارك ..يمدي البنت وصلت بيتهم ونامت. وهو توه مابعد كمل التفاتته ).المهم تو اللي راكب بيفتح الشباك علشان يكلمها .. وافتحي باب ورى وانقزي معهم ....
عقبها لو تشر لي ملكة جمال السعوديه ..قلتلها افتشي قبل....(اخس يا منشق مارتن)
............................
ترى امزح لاتقعدون تصدقون ....

DAYEM · #2 26-06-2000, 03:06 AM

المنشق..والله هالسالفة ماهي صاحية..موتتني من الضحك..روعة من جد..
بس ياخويي الظاهر خبرتك في الغزل أي كلام..(تكفى يالحبيب)كخخخخخخخخخخخخ..وبعدين تعال مالقيت الا العقارية تروح لها..هناك البنات شايفات نفسهن بالحيل..واذا عطتك وحدة وجه..فاكيد راح تكون من نفس طينة بطلة السالفة..يعني بلوة من البلاوي..كخخخخخخ
احمد ربك على العافية واستح على وجهك..توك معرس من يومين ورايح ترقم..كخخخخخ
الظاهر انك اعرست على تمساح ماهو بنت..كخخخخخخخخ
تصبح على خير..
تحياتي DAYEM.

المنشق · #3 26-06-2000, 03:33 AM

ومن قالك يادايم اني اغازل ....

انا مرة امشي مع الوالد بالشارع وشفت بنت لابسه عبايه قلت لابوي يبه وشي هذي؟؟؟

بعدين حنّا يالزيون دايم تواجهنا مثل هالمواقف .. تدري يومني صغير وش يقولون .. يقولون راح الحلوو نام الحلووو وين الحلوو

انت خلّك بسوق مكه وابن دايل .. وان شفت وحده تشّر لك لاتحسب انها معجبه فيك لالالالالا تراها تبيك توصلها بونيتك بسسسسسس ...

ههههههههههههههه ياحبيلك ... بس لاتمشي معي هههههههههه

DAYEM · #4 26-06-2000, 03:56 AM

الله يقطع سوالفك يالمنشق..كخخخخخخخخخخ
ياخي هالحلوين مشكلتهم مشكلة..لالبنات يعطونهم وجه لانهم مايملون عيونهن..ولاهم يمشون مع الشباب..خايفين على انفسهم.. كخخخخخخخخ
يعني ضايعين في الطوشة..الواحد منهم يقول ياليتني شين..بس.
ياحليلك وياحليل سوالف يالمنشق..كخخخخخخخخ
DAYEM.