حكايتى مع خبر " اعدام صــدام "
صحيت فى يوم العيد كالعادة *** صحيت البيت والعيال والمرة
قلت ياام العيال ، فين الجلابية *** والشال والطاقية المعطرة
بدى الحق صلاة العيد *** مع الجماعة فى الخلا برة
لبست ثيابى وحطيت شوية *** مسك وهميت للسرى
سمعت صوت فى الراديو *** بيقول خبر ماصدقتوش بالمرة
**********
اعدام صدام فى يوم العيد *** يادى العار والشنار والهوان
يوم العيد ياظلمة ؟ ايه البشاعة *** دى وفين الدين والايمان
بنتى الصغيرة قالت لى يابوى *** ذبحوا الرجل زى الخرفان
رجولى اتخدرت وانهارت قوتى *** واترنحت واقع كما السكران
قعدت على حيلى وكأن حجر *** اتحط فوق قلبى المرهق التعبان
مقدرتش اصلى العيد , عيد ايه *** بعد اللى جرى واللى كان
ماهى حكومة عميلة بتنفذ *** كل طلبات اسيادهم الامريكان
************
وبوش ابن اللئيمة من واشنطن *** قاعد يصدر التعليمات
اعدموه فى يوم الاضحى مايهمكوا *** المسلمين كلهم اضحيات
ومحاكمة ظالمة ومهزلة والقضاة *** مليانة جيوبهم بالدولارات
وصدام اسير حرب يعنى قتله *** محرم فى كل المعاهدات
وان كان صدام قتل الفين عشرة *** ماهم بيقتلوا كل يوم آلافات
ليه نار الحقد تطغى على العقل *** وتخلى البشر كما الحيوانات
يعنى جات على صدام اللى خانوه *** صحابه وتاريخنا مليان خيانات
وبلادنا العربية بيموت فيها الاف *** فى الاقبية والسجون والمعتقلات
واللى اتنفى واللى اتسحل واللى *** اتجنن واللى من القهر مات
لعنة الله والتاريخ عليهم الفجار *** اللى عقولهم مليانه كنادر وتفاهات
وقلوبهم غطى عليها الحقد الاعمى *** وخرجوا من النور لاظلم الظلمات
عسى ربى يتقبلك ياصدام شهيد *** بعملتهم الغبية كفروا عنك السيئات
==========================
الحزين على حال الامة -