أنا ونورة وصديقي سعيدان..الجزء الثاني

[DAYEM]

للحلووووين اللي ماشافوا الجزء الاول اضغط هنا..
http://hewar.khayma.com/Forum1/HTML/001234.html
************************************************** *
وين وصلنا بالسالفة..
ايوة..بعد ماصحيت من حلمي وقطعت براطم سعيدان..رحت للبيت ونمت على فراشي..وبديت أكلم نفسي..
قلت ياولد يادااايم..معقولةحبيت البنت..معقولة حبيتها من أول نظرة..طيب وشلون وانت ماشفت الا عيونها (هذا بلا ابوك ياعقاب..مثل صيني !! ) ..طيب معقولة هي حبتك.. ويوم طالعت.. كانت تناظر فيني ولا في سعيدان (صحيح ان سعيدان شين..بس ترا سنونه حلوة !!)بصراحة أسئلة كثيرة كانت تبترم في مخيخي..وانا قاعد أفكر حسيت بقرقعة في صدري وبديت أسمع أصوات تفحيط وونانات.... وبدا الغبار يطلع من فمي (موكب القلب وصل !!).... نزل قلبي وقال ..انت الظاهر انك خبل..البنت تحبك وانتبه لاتفوتك.. ولا ترا ابي اشيل عفشي (دقاته ) وعيالي (البطين الايمن واخوانه)واشوفلي صدر ثاني غير صدرك انثبر فيه (مهب صاحي قلبي..دايم متهور!!)...
وفي هالحظة تذكرت قصيدة جدي (شاعر العائلة) اللي كتبها في حبه العذري.. جدتي واللي يقول مطلعها:
ياونتي ونة الي ون ثم ون...ويوم خلصت وناته قعد يون
(يضرب الحب شو بي زل !!)..
تذكرتها وبدا الدمع يدحدر من عيوني ومادريت بنفسي الا وانا في عاشر نومة الا ثلاث نومات..
(يعني سابع نوومة<-------للاذكياء فقط )
..في الصبح مريت الحمام كالعادة ومريت شقحا وقعد احبحبها شوي وطيرتها..( شقحا احسن حمامة عندي و مسميها كذا.. خايف عليها من العين ).. ومن كثر مااحبيت نووورة غيرت اسمها من شقحا الى نووورة ..المهم رحت للمدرسة ورجعت وأول ماوصلت للبيت تغديت ونمت شوي وفي العصر رحت على طول لعشة الحمام اللي في سطحنا (اخر رومانسية..هههه) ..وبديت اطالع في الحمام واقول ياليتني حمامة علشان اطير واسكن في سطحهم..(واصير فرخ نعمة..على وزن ولد نعمة )..وكل يوم تجي نووورة وتحبحبني..وتحاول تطيرني وانا مااطير(اصلا انا بكون منتف جنحاني تنتيف..علشان ماافارقها ابد )..
وفي لحظة من اللحظات النادرة اللي أحس فيها ان معي عقل .. فكرت وقلت .. وش يضمن لي ان البنت ما تطلع غبية وتحذفني من السطح..وبديت أتخيل الموقف..
نووورة ماسكتني برقبتي وقاعدة تحبحبني ورجعت خمسة متر ورا وحذفتني من السطح (تبيني اطير بالقوة..ماتدري اني منتف جنحاني !!)وتقول..طر ياداااايم.. طر..طر.. وجيت محول على راسي ..وتناقزت عيوووووني ورحت فيها ..مثل ماراحت فيها حمامتي شقحااا...كخخخخخ..بيني وبينكم .. ارتعت وقلت ياولد خلك على الارض احسن ..
اووووووووووه صح.. نسيت أقولكم سالفة حمامتي شقحاا..هذا سلمكم الله بعد ماسميت شقحا نووورة ورجعت من المدرسة لقيت بسة سعيدان (اللي ساكنة في بيتهم ) لقيتها طابتن على نووورة وبالعتها ..
وطبعا هالبسة تم اغتيالها في اليوم الثاني انتقاما لمقتل نووورة الحمامة .. بعد مطاردة عنيفة بيني وبينها على الجدران وأول مانزلت للشارع دعسها سعيدان بسيارته .
المهم نرجع للسالفة..
نزلت للبيت..ودورت على امي ولقيتها كالعادة في المطبخ..يمة يمة..وشتبي..يمة متى تعزمين جيرانا اللي في القصر الجديد للقهوة..رفعت راسها امي وصارت عيونها حمر وكشرت عن انيابها(متأكد انها امك؟؟) واخذت اكبر قدر في المطبخ ..وبدت تعايرعلي..وقالت بسم الله والله أكبر (الظاهر ترمي ضب وانا مدري ) وحذفتني ..جاني القدر طاير وهو يمشي مليوووون كيلو متر في الثانية (الحمد لله ماكان يمشي طبلونه كله )....ومادريت الا وانا منبطح على الأرض..قرقعووووووووا..قرقعوووووووواا..ضرب القدر في باب المطبخ..والحمد لله جات سليمة..رفعت راسي واستلمت هالمسج منها ..الى ابني العزيز المدعو داااايم.. كم مرة اقولك ياقليل الحيا مالك شغل في سوالف الحريم هااااااااااااااااه ..نزلت راسي في الأرض ودفنت اصبعي الصغير بين براطمي (البراائة ) وبكل أدب قلت.. يايمة انت معودتنا على الكرم وكل ماينزل جار جديد عندنا تروحين على طول وتعزمين حريمهم للقهوة..( انتفخ راس امي وصار الهوا فيه اربعين ) وقالت...ايه ياولدي الكرم هذا انا وارثته من جدك الله يرحمه..وانا ابي اعزمهم بس الناس توهم نازلين وابيهم يرتاحون شوي قبل العزيمة..قلت كويس يارب تجي نوورة مع امها لبيتنا..
مرت الايام..وصار تفكيري كله في نوورة..وشلون اشوفها مرة ثانية وابعبر لها عن حبي ..كل الكتب حقتي صرت اكتب عليها..نوووورة وداااايم وبينهم قلب رايح فيها ومكتوب داخله الحب عذاب ..وراسم سعيدان وهو ماسك ذاك السهم وقاعد يطعن في القلب اللي بينا .. (مدري وش دخل سعيدان بالموضوع!!لا تستعجلون بتجيكم سالفته بعدين )....وصرت اصلي في المسجد (!!) و كل مااروح للمسجد امر من الشارع اللي جنب بيتهم مع ان مسافته أبعد..واتمنى ينسون بابهم فاتح علشان أقز نووورة..بس بابهم دايم مقفول ..حاولت أشوفها وهي راجعة من المدرسة..بس المشكلة انها تطلع قبلي..وانا مقدر أغيب عن المدرسة حتى لو درجة حرارتي مليوووووون لازم أروح للمدرسة ....كل شي الا الغياب عند ابوي..وفي مرة من المرات نويت اني أطنش الحصة الاخيرة علشان ألحق عليها وأشوفها قبل تدخل بيتهم..وأول ماحطيت ايديني على جدار المدرسة (أبي أنقز)..الا والفراش أبو محمد معي..على وين ياحبيبي (مدري ليش كل مايشوفني يقول ياحبيبي..الظاهر مشبه علي !!) جرني باذني ووداني للمدير..وسين وجيم على كم عصى..وقالي لاتجي بكرة الا وأبوك معك..وفي اليوم الثاني جاهم ابوي لحاله (انا كنت في المستشفى من كثر جرعات الحب والحنان اللي أخذتها من الوالد الله يجزاه خير )..ومن يومها وانا محرم أطلع من المدرسة..
بدا سعيدان يلاحظ التغيرات الي صابتني..وقالي يادااايم انت وش فيك الايام ذي منت خويي اللي اعرفه متغير وحالتك حالة..تنهدت وقلت..اسكت ياسعيدان انا بديت احب..ضحك وقال بالله.. قل والله...ياحظك حظاه..تصدق انا ماعمري عرفت الحب الا في مسلسل المصاريه اللي يجي بعد الأخبار .. لاتكون نووورة بس..قلت أي والله نووورة.. من يوم سكنوا عندنا وهي ماخذتني قلبي وعقلي معها بس مدري هي حبتني مثل ماانا حبيتها ولا لا..طيب وليش ماتحاول تكلمها بالتلفون مثل الشباب كلهم..قلت بس انا مااعرف تلفونهم ياسعيدان..قال بسيطة نروح لسواقهم الهندي ونعطيه كم ريال وهو يقولنا..اعجبتني الفكرة..
تقاطينا انا وسعيدان وكل واحد دفع ريالين وضحينا بفلوس فسحتنا بكرة ..ورحنا للسواق ولقيناه يغسل السيارة..سلام صديق..وأليكم سلام..تقربت من الهندي وحطيت الاربعة ريال في مخباه (رشوة !!)..وقلت صديق كم تلفون هزا بيت؟..طالع فينا الهندي بنص عين وطلع من جيبه مية ريال..وعطاني خمسين وعطا سعيدان خمسين (هندي مطنطخ.. هههه)..وقال روووووه الئب بئيد أما يئميك أنت وياه ..لقطت وجهي انا وسعيدان..ومشينا..
في الطريق اكتشفت اني اخذت خشم سعيدان بالغلط !!..
المهم ..فكرت انتظر لين الوالدة تعزمهم..بس مافيني صبر ابي اشوفها باي طريقة..
قاللي سعيدان تذكر يادااايم الفيلم الامريكي اللي شفناه في بيتنا.. (ياحظهم عندهم فيديو !!) اللي فيه البطل ينقز من فوق السطح ويدخل البيت ويلقا حبيبته معلقة في المروحة حقت الغرفة..وجالسين جنبها عصابة خطيرة كل واحد فيهم لابس نظارة سودا ومعاهم سكاكين.قلت ايه تذكرته (اصلا هذا هو الفيلم الوحيد اللي انا شفته بحياتي )..وحتى كان واحد منهم يقول للثاني ..حندبحها امتا يامعلم..والمعلم يقول.. اصبر علي ياحسنين لين اكمل هالشوط (يلعبون بلاي ستيشن ).. وطب عليهم البطل..وانحاشوا.. وهو يطمر ويقطع الحبل وياخذ حبيبته وينحاش فيها.. وش طراه عليك ياسعيدان..قعد سعيدان يفكر ويفكر وقال..وش رايك نسوي مثل البطل و نخطف نووورة!!
رفعت يدي للسما وقلت..يالله.. يالله لك الحمد على العقل ....والله منت بصاحي..يازينك ساكت بس...

بعد ايام راحت الوالدة الله يطول بعمرها وسيرت عليهم (ياليتني كنت طفل صغيرووون علشان تاخذني معها وتصير امي وامها يسولفون مع بعض وتجي نورة وتلاعبني بلووووت واذا جا معي اربعمية والله مااذكرها علشان اخليها تفوز
علي ..ماني بسيط أعرف ألعب بلوووووت !!)
المهم راحت الوالدة وتقهوت عندهم وعزمتهم ..وقالت ام نووورة ان شالله نبي نجيكم بكرة العصر..
جت الوالدة للبيت وقابلت الشغالة في الحوش (كانت تنظف الحوش)..وقالت لها جهزي القهوة بكرة بيجون الحريم عندنا..وانا كنت عند الباب..واول ماسمعت هالكلام..جيت مفحط (ابي احب راس امي من الفرحة )..وانا داخل دعست على صابوون الشغالة..? لقيت نفسي بدل ماامشي صرت اطير..ومريت امي وانا طاير وجيت اوقف عندها وماقدرت..يمة يمة..وشوي الا الدنيا انقلبت سودا وصارت العصافير تلعب الصحن الدوار فوق راسي ( متأثر بالرسوم المتحركة )..
مسحت دموعي ..وقلت اخيرا ابي اشوفك يانووورة..وصرت انتظر بكرة وبكرة عيا يجي مرت الساعات مثل الايام..وحاولت انام في الليل وماقدرت..بس افكر فيها..
في اليوم الثاني..
رجعت من المدرسة..ولقيت بيتنا منظف ومزبط واخر روعة..
وعلى طوول أنطلقت للسطح وجلست مرابط فيه الى العصر (أنتظر نووورة تجي مع أمها علشان اقزها من السطح)..وشوي وشوي..وأنتظر وأنتظر..واخيرا أنفتح باب بيتهم..ويطلع منه بنتين..ويمشون لمنا..دسيت راسي وصرت أنتظرهم يطقون بابنا علشان اطل عليهم من فوق..وبعد شوي سمعت الباب يطق..بديت اتنافض..وحول قلبي بين رجولي ....وسمعت الوالدة وهي تهلي وترحب..رفعت راسي وقلت هذي فرصتك يادااايم علشان تشوف وجه حبيبة القلب وهي تسلم على أمك..سلمت امي على أمها..وجا دور نووورة بالسلام..وصرت أنتظر أشوف القمر في وجهها وأنتظر أشوف الورد بخدودها وأنتظر أشوف العسل بعيونها وأنتظر أشوف العنب في براطمها وأنتظر أغسل غمص عيووووووني بشوفتها..بديت أرفع راسي شوي شوي وأول ماقزيتها دورت وجهها ومالقيته ودورت عيونها ومالقيتها ودورت براطمها ومالقيتها..وصار كل اللي أشوفه ماغير خشم ممغط من الأذن الى الأذن ..واكتشفت الحقيقة المرة..
اكتشفت
-
-
-
-
-
-
-
-
-
-
-
-
-
-
اكتشفت ان البنت الثانية هي شغالتهم الاندونيسية الله ياخذ عمرها ....
بصراحة جاني احباط غير طبيعي ومرتين بغيت أحذف نفسي من السطح وأنتحر..بس حسيت ان نوووورة تناديني بصوتها الدافي وتقوووووووولي..لالا تكفى ياديوووومي.. لاتنتحر.. حراااااااااااااااام عليك انا أنتظرك من زمااااااااااااااان لاتخليني بهالدنيا لحالي ..انا من بعدك اتووووووووووه (وش جاب احلام في الموضوع ؟؟)..ماقدرت أقول لا.. وهونت ..
بعد يومين..
جالس انا وسعيدان عند بابنا..ونشرب عصير وناكل بسكوت ونتجاذب أطراف الحديث..
ومادرينا الا بابهم ينفتح وتطلع معه نووورة ومعاها قطعة قماش تبي توديها للخياط..وبدت تمشي لمنا..فتحت فمي وطاح عصيري ودخلت البسكوت في خشمي بالغلط ..وجت اللحظة اللي انتظرتها من زمااااااااااااان..وش اسوووي الحيييييييييييييين..؟؟؟؟؟

.................................................. ..........
تشاهدون في الجزء الثالث..
هل تم اللقاء بين دايم ونورة؟؟
لماذا نقل دايم الى المستشفى وهل زارته نورة هناك (اكيد..لا..كخخخ)؟؟
مالدور الذي لعبه سعيدان في الاحداث الاخيرة (الخبيث سعيدان..ههه)؟؟
مالنهاية التي الت اليها الأحداث؟؟
انتظروا الجزء الثالث..
.................................................. ..........
تحياتي DAYEM.

[حرق-المهيني]

حبيبي دايم ادامك الله لنا
اقسم بانك امتعتني بهذه القصه
اكمل ولا تتوقف حتي تصل الي نوره
رح وحنا معاك

[المد]

عزيزي دايم مساء الخير ما اروع هذه
القصه اللي اتموت من الضحك الله يحنن قلب نوره
لدايم** على نار انتضر ما بقي من احداث بصراحه
قدره ابداعيه لسرد احداث القصه الفكاهيه من اروع ما يمكن..
تحياتي لك دايم والسلام*****احمد

[فجر]

[DAYEM]

اخوي حرق واخوي احمد..
مشكوووووووورين..واحلى شي في القصة انها ادخلت الابتسامة لكم..
وصدقوني كلامكم هو اللي راح يشجعني اكتب الجزء الثالث والرابع بعد.. من القصة..
.................................................. ..........
فجر..
الله يبارك بعمرك ياغالية..
ابي اكتب مليون قصة..بسبب هالكلام الحلووووو منك.
.................................................. ..........
تحياتي DAYEM.

<----- اقري يابنت الجيران

[همسه]

مرحبا ..اخي دايم
فصه رائعه..وطريقه تشويق ..جميله..
همسه*

[هنووووود]

اهلااااااااااااا عمو دايم كيفك
لحظة برد بعديين لاني ماقريتها كخخخ
هنوودة

[مهند]

هاهاهاهاهاهاهاهاها

دايم ماشالله عليك مبدع
ومسكينة هالشغالة راحت فيهالكن خذت عقوبتك تفكر تضرب الناس وما يحوشك شي.عشان جذي انت تزحلقت بالصابون.
لكن الحقيقة ونستنا سالفة التفحيط بس ما قلت لنا كم كانت سرعتك
.
.
.
مهند في انتظار الجزء الثالث

[...etc]

اخوي دايم:

انا بصراحه-الكذب خيبه و حبله قصير-

عشان كذا اسمع:

انا اول ما شفت السالفه ايش طولها ؟؟؟؟

طارت عيوني و تعيجزت اقراها

بس اذا اعجبت فجر و احمد و حرق وهمسه ة هنوووود ومهند

اكيييييد انها حلوه لا تطول عليهم اكمل؟؟؟

[هنووووود]

اللللللللللله ياعييينييي عالتاليف بس (مو احسن مني كخخخخ) الا قلي كم كنت تاخذ في الانشا اكييد كانت مادتك المفضلة خصوصا اذا كان الموضوع ماذا فعلت في العطلة الصيفية
بس تعرف ايش لذيذة مرررة القصة وحلوووة خففت من القهر اللي كان فيني ميرسييييي
بعديين على بالي هذا اخر جزء اتاريه في اجزاء ولا مسلسل رافت الهجان وعععع وش المسلسل بالنسبة لتاليفك ولا شي
بس يكفيك ينتفخ راسك الحين ولا نعرف نتفاهم معاك كخخخخ
هنوودة