أحداث عصيبة لأبو البرادع .... يوم الزحف الكبير

[الوافـــــي]

أحداث عصيبة لأبو البرادع .... يوم الزحف الكبير


مامي: أنت هالحين ليش متبطح عندي بالصالة .. ورا ما تقوم تروح للمسجد تصلي الظهر, وتروح تبسط بالتمر اللي جابه لك ولد اخوي(راشد) من الحوطة ؟؟ أنت وراك ما تدور العيشة جعلك الماحي؟؟


البردعي: ما اقدر يا يمه .. أنت ما سمعتي الأخبار؟



مامي: لا .. ما سمعت الأخبار.... لا يكون أمريكا هجمت على سوريا.



البردعي: لا .. أمريكا ما هجمت على سوريا .. المشكلة عندنا بالرياض.



مامي: وش اللي صاير؟



البردعي: يقولون يا يمه شوارع الرياض وجدة مليانه عساكر



مامي: افاااا .. ليش؟



البردعي: الشيخ سعد الفقيه مسوي مظاهرات في الرياض وجدة .. ونادوي يقلب الحكم. ويصير الملك



مامي: هوووووووو (( لفظة تعني "يا للهول" )) ..



البردعي: إيه والله يا يمه .. حتى انه ناوي يسجن كل الناس اللي تحب ال سعود



مامي: الحمد لله .. أنت تتكلم من جدك والا تتريق .



البردعي: والله أكلمك من جد يا يمه .... الشيخ سعد (بايعها اليوم) .. وكل اللي معه يقولون (( عليهم عليهم .. عليهم عليهم)).



مامي: طيب الحكومة وش مسوية؟



البردعي: يقول الفقيه أن الحكومة جابت رجاجيل من الأردن عشان يحقطون المتظاهرين



مامي: رجاجيل من الأردن ؟؟؟ وش هالحكي.... وين راحوا الرجاجيل السعوديين.



البردعي: يقول الفقيه إن كل السعوديين رفضوا (يقمعون) المظاهرة .. وإنهم يحبونه وما يحبون ال سعود .. والحكومة ورطة.



مامي: طيب مشينا نروح نشوف سعد وش يسوي



البردعي: والله ما اطلع ... أنا خبل اطلع هالوقت .. ما فيه أمل... الواحد ما له إلا سلامته ... يوم زقطوني ذيك المرة ما فزعتي لي... وبعدين سعد الفقيه في لندن وما هو حاضر المظاهرة.



مامي: وشو



البردعي: ايه والله ... هو يقول للناس اللي بالسعودية .. أنت تظاهروا ...



مامي: وهو بيسوي مظاهرة بلندن؟



البردعي: لا والله .. ما طرا أي مظاهرة بلندن ... هو يقول للناس (( أنا اخطط لكم , وأنت تنفذون))



مامي: طيب رح جب خبز بر .... محمية لك على الغداء مرقة يحبها قلبك.



البردعي: أنت يا يمه ما تعرفين إلا المرق؟ ....أمس متغدين مرق, ومتعشين مرق... وقبل أمس مفطرين مرق...



مامي: وش أسوي؟؟ ... المرق حق الأسبوع الماضي ما خلص عشان أسوي لك شي جديد.



البردعي: الشكوى لله .. جيبي المرق خلينا نتمرمق.



مامي: طيب أنا بروح احميه .. وأنت جب خبز بر.



البردعي: ما فيه أمل ... أنا خبل اطلع من هالبيت ...



مامي: ليش ما تطلع؟


البردعي: يقول الفقيه إن السعودية جايبه رجاجيل من الهند عشان يسحرون اللي يطلع من بيتهم.



مامي: أقول تراك ذبحتنا بالفقيه حقك .. أنت بتطلع تجيب خبز بر... والا اتصلت على زيد يوديني لأخوي بالحلوة؟



البردعي: هع هع .. ما تقدرين يا يمه.. يقول الفقيه إن الحكومة السعودية صكت شوارع الرياض كلها ...



مامي: صكتك بقعاء.... أنت مصدق كلام هالفقيه حقك؟



وبالفعل, جاء ولد خالي زيد .. وأنا ودعت أمي بالصالة .. وخفت اطلع أسلم على ولد خالي زيد .. خفت يشوفني أردني طالع من بيتنا هم يزقطني.



فتحت قناة الجزيرة ... وقرأت خبر نشرته الوكالة الفرنسية (اعتقال ستة في مدينة جدة بسبب مظاهرة نادت لها المعارضة السعودية بالخارج)... أنا احسبهم يقولون (( اعتقال ستة ملايين . أو ستمائة ألف)) .. ولم يطرأ على بالي أن تكون (( الستة مجردة مما يضاف إليه)) ... ستة ؟؟؟ بس ستة ؟؟





بعدها, أعلنت الجزيرة خبر من المعارضة السعودية تقول (( اعتقال الآلاف من المتظاهرين في مدينة جدة ... وسقوط العشرات من المتظاهرين جراء إطلاق أعيرة نارية من قبل رجال الأمن)) .. وهنا دخلني قلق على سلامة والدتي ...



وبعدها, اتصلت قناة الجزيرة على الشيخ محسن العواجي .. وسألته عن أخبار المظاهرات ... فقال (( أنا توجهت للموقع المحدد للمظاهرة . ولم أشاهد إلا رجال الأمن ... حركة المرور انسيابية)) ..



هنا دخلني الشك .. فهل يعقل أن لا تقوم المظاهرات التي نادى بها الفقيه منذ مبطي؟؟



بعدها جاء اتصال من شاهد عيان في مدينة جدة .. وقال (( الأمن أطلق النار .. والإصلاحيين لم يردوا عليهم ... وقد توجه الكثير منهم إلى مقبرة أمنا حواء.. وتم اعتقال ثلاثة آلاف حتى الآن . ومازالت المطاردة مستمرة)).



هنا زاد قلقي على والدتي العزيزة ... فاتصلت عليها بالجوال ... (( يمه .. يقولون المظاهرات في جدة وش كبرها ... وان الحكومة اعتقلت ثلاثة ألاف رجال ... وإنهم طخوا العشرات))



مامي: ما شاء الله ... اعتقلوا ثلاثة الآلف .... لا اله إلا الله .... ومنهو اللي قدر يعد هالعدد؟؟



البردعي: هذولا الإصلاحيين .... فيهم ذكاء عجيب... يعدون بسرعة .... ولا يخافون احد ... ويعرفون أسرار الحكومة ... تف ما شاء الله عليهم.



مامي: ما شاء الله .. وهالاصلاحيين الأذكياء... ليش يسلمون عقولهم لواحد في الخارج ... هو يجلس في لنتن وهم يتظاهرون؟



البردعي: ما علينا منهم ... المهم يا يمه .. أنتي وين؟



مامي: أنا عند خالك ... ما شاء الله .. خير وأمطار .... وجو ... وش حلاته



البردعي: ما شاء الله .. عندكم أمطار؟



مامي: إيه والله .. ويمكن تسيل الشعبان.



البردعي: والله يا يمه انك حمستيني... ودي أجي



مامي: لا يا وليدي.... لا تجي.... أنت خبل تطلع من البيت؟



البردعي: إيه وش فيها . أنتي طلعتي ولا جاك شي.



مامي: لا ... أنا سمعت الفقيه في الرادوا يقول (( إن الأردنيين متوزين في منفوحة يدورون البردعي, وبيفقعون خشته)).


البردعي: والله ؟؟



مامي: بدون حلفان يا وليدي ... أنت لا تطلع من البيت .... الفقيه والإصلاحيين ما يلعبون ..... الله يخلف على حرمة بتاخذك.


البردعي: آمين ..... طيب يا يمه ... متى بتجين؟



مامي: بما انك مصدق الفقيه وحكيه ... ووسع صدرك بتغسيل المواعين.



بعد المكالمة ... دخلت على النت ... أتصفح هالمواقع عسا نشوف صور هالزجف الكبير .... فلا تبخلوا علينا





وش أخبار الإصلاحيين؟

ــــــــــــــــ

الكاتب ( البرادعي )

المصدر

[أوراق الخريف]

[الحـارق]

[الحـارق]

ونسيت ضحكة خامسة



هذا الفقيه يستاهل بو راشد...

[حفيدة الشيخ]

انا هذه اليومين كنت متنقلة مابين الطائف ومكه وما شفت اي شئ غير طبيعي لافوضى ولاشى كما هو يزعم حتى الناس في اعمالها موجودة لدرجة اشتريت جوال عشان اتصدى لرسائل اس ام اس صراحة احنا اعطينا اكبر من حجمة يعني فشيلة لكن من البداية قلنا انها حربه كلامية والفتنة لها دور كبير . العيار اللي مايصيب يدوش انا افضل الواحد يستعد للسنة الجديدة وكل عام وانتم بخير ياشعب السعودية .