مجلس حريم ..

[Code-Blue]

حياكن الله أخواتي ..

يا بنات اسمعوا قرأت موضوع الأخ بوفهد في الخيمة المفتوحة وكيف كانوا جالسين يحشون فينا وحنا ما ندري عنهم هالحين خلونا نفاجئهم بقصفهم بكلمات بس بشرط تكون بكل صدق وصراحة عن ما يضايقن في الرجال أباء و أخوان أو أزواج وأحباء وبعد زملاء عمل وحتى زملاء إنترنت ونحاول نتبادل الآراء والخبرات والتجارب الناجحة والجيدة فقط وإللي مافيها خراب بيوت طبعاً هي مواقف عشناها ومررنا بها وبالرغم أن الظروف لابد وتكون مختلفة بس راح نكون متفقين في المبدي الخاصة في طريقة التعامل مع هؤلاء المخلوقات اللي من الحق قول أننا من دونهم ولاشيء مو لأننا ضعفاء وبإرادتنا قدامهم بس وإلا من وين راح نلقى بعدين أحد يشعرنا بالقوة إذا حنا ما اعترفنا بالضعف وتدرون يا بنات أن قوة المرأة أمام الرجل تكمن في ضعفها أمامه وبيني وبينكم هم اخذين في أرواحهم مقالب جامدة وعشان كذا حنا نحاول نتغاضى عنهم من أجل تحقيق أهدافنا وهذا الشيء هو المهم بالنسبة لنا..صح؟! شفتوا كيف يكون المخ والتكتيك الجامد .. بس بشرط ما نكون قاسين عليهم اتفقنا .. طيب هيا نبدأ وأنا أول من يتخذا المبادرة بالحديث عنهم ..

لحظة .. لحظة كنه في أحد من خارج جنسنا الناعم يسترق النظر للموضوع .. كفشتكم
بس تدرون ماهي مشكله حلو تسمعون آراءنا فيكم وتحاولون تتجنبون الأخطاء وتشدون من حيلكم في المحافظة على الأشياء الكثيرة إللي تتميزون بها من أجلنا نحن أكيد .. سوى بناتكم و أخواتكم أو زوجاتكم وحبيباتكم أو زميلتكم ..
احم احم ..

احب في أبوي طولة باله علي وثقته الزائدة في وأنا كثير أحترم هذا الشيء له.. فمثلنا أقول له بعد أذنك يا أبوي أبخرج مشوار.. بعد وين وليش و أش المناسبة ومن معك ومتى ترجعين يصدر قرار بموافقته على خرجتي ولله الحمد لكن إذا رجعت للبيت يبدأ في تسميع الوجه الثاني من الشريط ليش تأخرتي وليش ماتصلتي وحنا نخاف عليكم ونبي مصلحتكم وانتبهي من رفيقات السوء وانتبهي من شباب هالأيام ولا تضيعين فلوسك أحب أبوي واحب كل تصرفاته وتقريباً أنا وهو شخصيه وحدة لكن أخواني يفسرون اتفاقنا أنا وإياه على أني دلوعته.. وأكره في تصرفاته لاحظوا مو في شخصه تأنيبه المستمر لي في طريقة صرفي لراتبي وتبذيري الشديد حسب ما يراه ويحكم به علي وينتقدني كيف أنا ما ادخر شيء لبكره.. بس أنا أقول له يا طويل العمر يا بعد حيي يا أبوي تراني ما أحب أحرم نفسي من شيء هي ودها فيه.. والواحد ما هو داري متي يفطس ويخليها مجمعه وراءه.. والطريق مسدود ليفهمني من هذه الناحية..
أكتفي بالحديث إلين هنا سأعطيكم المجال.. وارجع لكم مره ثانية أتكلم لكم عن أخواني الرجال…