بين "الإلهام".. و "اليأس"..

الشيخ عادل · #1 17-01-2007, 12:33 PM

]"عمرك في يوم حسيت انك فجأة سخنت و عاوز تعمل حاجة معينة و مش هاتستريح الا لما تعملها؟.. بتحس بحماس جارف عشان تعمل الحاجة دي..
وممكن لو ماعملتها في ساعتها.. حماسك ده ينطفي بعد شوية.. و ماتعملهاش..
و ممكن تبدأ فيها.. و انت شغال.. حماسك يقل شوية بشوية.. لغاية ماينطفي خالص.. و ماتكملش الحاجة اللي بدأتها..
الحماس ده بييجي منين؟؟

و هل يا ترى نقدر نتحكم فيه و نحمس أو نحفز نفسنا بنفسنا؟؟

ده اللي عاوزين نعرفه النهاردة

أهمّيّة التّحفيز

فيه حاجتين في الدنيا بيحفزوا الناس..

ايه هما؟؟

مش هاقولكم ..

لأ خلاص هاقول هاقول..

الحاجتين دول هما "الإلهام".. و "اليأس"..

ازاي يعني؟؟

تعالى نشوف أمثلة..

ازاي الإلهام ممكن يحفز واحد انه يعمل انجاز عظيم..

د. إدوين لاند.. اسم غالبا ماسمعتوش قبل كده.. لكن اكيد سمعت عن بولارويد.. أشهر ماركات كاميرات التصوير الفوري..
د. ادوين هو مخترع التصوير الوفري.. و هاتتعجب ازاي بدأت الحكاية دي..
بنته الصغيرة كانت كل ما يصورها تبقى عاوزة تشوف الصورة فورا.. مش مقتنعه انها لازم لسة تتحمض و تنطبع.. فكانت بتزعل قوي لما ال ما تشوفش الصور فورا..
ده اللي الهم ادوين لاند انه يحاول يدور على طريقة يخلي التحميض و الطباعة يتموا جوة الفيلم ذاته.. و فعلا قدر يحقق ده.. وكانت النتيجة شركة بولارويد العالمية ..

مثال تاني..
بيل جيتس و بول ألين اللي أنشأوا شركة مايكروسوفت.. ازاي بدأت الفكرة؟
شافوا اعلان في مجلة عن كمبيوتر شخصي.. كانت لسة حاجة جديدة .. حاجة زي الخيال العلمي..
لكن هما ماشافوهاش كده.. بل شافوا من خلالها مستقبل الكمبيوتر. و بدأوا يفكروا ايه اللي ممكن يعملوه..
و في ساعتها.. بيل جيتس اتصل بوالدته.. و قالها : " جايز ماتشوفينيش في خلال الـ 6 شهور الجايين لأني هابدأ اكتب برنامج للكمبيوتر عشان شركة IBM تشتريه مني"!..
البرنامج ده..MS-DOS .. أول واجهة حقيقية لكمبيوتر شخصي.. لأن الكمبيوترات قبل كده كانت للإستخدام المؤسسي فقط.. للشركات الكبرى.. لكن ان الواحد يبقى عنده جهاز كمبيوتر شخصي للإستخدام الشخصي.. فده ماكانش موجود..
شايف ازاي؟. الفكرة بدأت بإيه.. مرة بطلب من البنت الصغيرة.. و مرة بصورة شافها بيل جيتس..
ده "الإلهام"..

طيب ايه حكاية اليأس بقى؟..

ازاي اليأس ممكن يحفز واحد انه يتحرك و يعمل حاجة؟

أنتوني روبينز .. أحد أشهر الشخصيات في مجال تطوير الذات.. كان بيحكي قصته في احدى كتبه..
بيقول انه كان بيتشغل مندوب مبيعات لشركة مكانس كهربائية ..
أنتوني وقف مع نفسه وقفة في يوم من الأيام.. لقى انه مش راضي ابدا عن حياته..
عايش عازب في شقة صغيرة تعبانة.. بيغسل الأطباق في البانيو اللي بيستحمى فيه.. مش عارف كان بيستحمى في طشت والاايه ..
المهم.. وصل لحالة من الإحباط و اليأس.. قرر معاها انه لازم يغير حياته..لازم يعمل حاجة..
فبدأ ياخد كورسات و يطور نفسه و يدور على شغل احسن..
حاليا.. بعد ماكان بيغسل اطبقاه في البانيو..
انتوني عنده قصر.. و طيارة هليكوبتر خاصة.. و اسمه أحد أبرز الأسماء في جال الإستشارات و الإدارة و تطوير الذات ..

زي ماحنا شايفين.. نوعين من التحفيز..

نوع ايجابي.. الإلهام..

و نوع سلبي.. اليأس..

و كل واحد فينا لو تأمل في حياته هايلاقي تأثيرهم واضح فيها..

طيب..

ايه بقى اللي بيخلي الناس بيلاقوا صعوبة في انهم يحسوا بحماس لعمل شئ معين في اوقات معينة؟
الواحد أحيانا بيتخيل ان النجاح.. و الإنجاز.. و ان الواحد يحقق أحلامه .. كل دي حاجات كافية انها تسخن الواحد و تحفزه و تخليه يتحرك. و لكن الغريب انك بتلاقي ناس عارفين كل ده.. و برضه مش حاسين بأي حماس و ماعندهمش اي دافعية للحركة..
الطالب عارف كويس ان طريقه الوحيد للتفوق و انه يحقق حاجة في حياته هو المذاكرة.. و بالرغم ده.. مش الكل بيذاكر..
احنا كلنا عارفين طريق الجنة.. و طريق النار.. و لكن هل كلنا بنعمل بمقتضى المعرفة دي؟؟
كل اللي بيدخنوا عارفين كويس آخرة التدخين.. و عاوزين يبطلوا.. و لكن بالرغم من ده.. برضه مش الكل بياخد خطوة ايجابية تجاه الإقلاع عنالتدخين..

ايه السبب في ده؟

انهم مش متحمسين.. مافيش حاجة تحفزهم..

طب و الحماس و الدافعية دول نجيبهم منين؟.. اكيد مش من عند العطار!!

الحماس و الدافعية ماهم إلا اسلوب تفكير.. حاجات بتحصل جوة العقل.. و كل اللي احنا محتاجينه.. هو اننا نعرف ازاي نفكر صح.. عشان نوصل للحالة اللي احنا عاوزينها منالحماس.. و الدافعية..

طيب.. امتى بنحتاج نحس الإحساس ده.. الحماس.. الدافعية؟

أوقات بنبقى محتاجينه و عاوزينه فعلا.. و أوقات تانية.. بنبقى مش عاوزين نكون متحمسين أساسا..

ازاي؟ معقولة فيه اوقات المفروض نقلل فيها من حماسنا و دافعيتنا؟.. طب ليه؟
أكبر مثال في رمضان..

قاعد على ترابيزة السفرة قبل المغرب بدقيقتين و هاتلتهم دكر البط المحمر اللي قدامك بعينيك و بتتخيل نفسك بتعوم مسافات طويلة في سلطانية الشوربة و ...
اللهم اني صائم..

المهم. دي لحظة من اللحظات اللي محتاج تقلل فيها من حماسك.. محتاج تبرد شوية.. لأنك لو سبت نفسك كده..

هاتفترس دكر البط.. وتغطس في الشوربة..

و بعدها تسطو على صينية كنافة و طبق قطايف و دورق خشاف..
و النهاية...
غسيل معدة

لأ.. زي ماحنا محتاجين نعرف ازاي محفز نفسنا وقت ماحنا عاوزين.. محتاجين كمان نعرف ازاي "نثبط" و نقلل حماسنا وقت ماحنا عاوزين..
طيب امتى بنبقى محتاجين طريقة نحفز بيها نفسنا؟

لما نكون مش حاسين اننا عاوزين نعمل حاجة معينة.. في حين ان الحاجة دي لازم تتعمل أصلا..
زي ايه؟
حاجات محتاجين النتائج اللي هاتيجي من وراها.. لكن مش حاسين بحماس تجاهها قوي..
زي فمين غسيل الواحد عاوز ياخدهم مثلا..
الطالب اللي عليه واجب لازم يتعمل و هو عارف كويس لو ماعملوش انه هايتعاقب..
تنضيف الشقة اللي لو ما اتنضفتش الجحيران هايفتكروا ان فيها حد ميت..
الخ الخ..
كل دي حاجات.. غالبا الواحد مابيبقاش مستمتع بيها و هو بيعملها.. و لكنه في نفس الوقت لو ماعملهاش ممكن يحصل ضرر بسبب ده.. يعني هو محتاج يعمل الحاجات دي اصلا.. لازم تتعمل.. وبالرغم من ده.. هو مش عاوز..
لما الدكتور في الجامعة يطلب منك بحث لازم تخلصه في خلال يومين.. و موضوع البحث ممل جدا و رخم جدا.. و حاسس ان نفسك مقفولة تماما من ناحيته.. بس لو ماعملتوش هاتبقى مشكلة..
لما تبقى عارف انك لازم تلعب رياضة... لأنك مابقيتش لاقي هدوم مقاسك في السوق.. لكن مش عاوز بسبب انك شايل هم انك هاتتعب و تنهج وتعرق و ماعندكش وقت.. الخ..
اوقات كتير.. بنبقى مش عاوزين نعمل الحاجة نفسها.. و لكن في نفس الوقت محتاجين جدا النتائج اللي هاتيجي بسببها..
هي دي الأوقات اللي بنحتاج نحفز فيها نفسنا..

طيب...
ازاي نحفز نفسنا؟

محتاجين نعرف الأول ازاي عملية التحفيز دي بتحصل جوة المخ أصلا..
و..

بنيتي.. هذا أمر شرحه يطول... و أنا الليلة مشغول..
:إلى الغد إذن يا فيلسوف...

بنت الجزائر · #2 17-01-2007, 01:04 PM

حرام عليك يا فيلسوف حمستني و بعدين ............. المهم موضوع ممتاز انا فعلا تحمست له جدا.
و لكن انا عندي راي من الممكن الانسان يكون عنده حماس فعلا ان يعمل اشياء كثيرة و لكن هناك الكثير من العقبات التي تقيده، اتعتقد ان الانسان بحماسه قادر ان يقهر اصعب العقبات.

الشيخ عادل · #3 22-01-2007, 08:04 AM

إقتباس:

المشاركة الأصلية بواسطة بنت الجزائر

حرام عليك يا فيلسوف حمستني و بعدين ............. المهم موضوع ممتاز انا فعلا تحمست له جدا.
و لكن انا عندي راي من الممكن الانسان يكون عنده حماس فعلا ان يعمل اشياء كثيرة و لكن هناك الكثير من العقبات التي تقيده، اتعتقد ان الانسان بحماسه قادر ان يقهر اصعب العقبات.

اشكرك يابنت الجزائر ولكن هل انت من الجزائر؟

الشيخ عادل · #4 22-01-2007, 08:04 AM

إقتباس:

المشاركة الأصلية بواسطة بنت الجزائر

حرام عليك يا فيلسوف حمستني و بعدين ............. المهم موضوع ممتاز انا فعلا تحمست له جدا.
و لكن انا عندي راي من الممكن الانسان يكون عنده حماس فعلا ان يعمل اشياء كثيرة و لكن هناك الكثير من العقبات التي تقيده، اتعتقد ان الانسان بحماسه قادر ان يقهر اصعب العقبات.

اشكرك يابنت الجزائر ولكن هل انت من الجزائر؟