من شعر الملك عبدالعزيز رحمه الله

[الصمصام]

ورّدوهـن ( هـيت ) واخـطاه الدليله
والمـوارد غير هـيت مــقــضـّـباتي

روّحــن مثل القــطا صوب الثمـيله
ضـمّــرٍ تضفي عــليهـــن العــباتي

واهــنيّ الترف مــنســوع الجـــديله
ما ضـواه الليل عــند ( مـغـــرزّاتي )

آه مـن قــلبٍ عـلى حـامـي المـــليله
لا تذكــّرت العـــصور المـاضـياتي

عـــصـر مـن ينطح مـقــابيل الدبيله
لابتي لا جـــا نهـــار المــوجـــباتي

دون دين الله نتعـــــب كـــل أصـيله
نبذل المــجـهـود دون مـخـاشــياتي

من تعـــبّث بالفــرايض عـــزّتي له
تـقــعـده حـدب السـيوف المرهـفاتي

[همس الأحاسيس]

يعطيك العافية أخوي الصمصام
وهذي أول مرة أعرف إن الملك عبد العزيز شاعر
ومن جد هالشعر فيه القوة واضحه من بين كلماته وحروفه
وختام القصيدة يبين اللي أقصدة

من تعـــبّث بالفــرايض عـــزّتي له
تـقــعـده حـدب السـيوف المرهـفاتي

تسلم أخوي ويا ليت أو تزيدنا منها

بااااي

[الصمصام]

الله يعافيك أختي الفاضلة همس

وقولك صحيح فكلمات القصيدة جزلة وقوية


والملك عبدالعزيز لم يكن شاعرا بالمعنى المتعارف عليه وقصيدة وردوهن هيت من
نوادره القليلة
وفي الغالب كان يقول البيت والبيتين ويتوقف
وله بعض المحاورات والردود القليلة مع بعض خاصته
وأعتقد أن الكثير منها لم يدون
وأكثر ما سجل عنه أحدياته المرتجلة كعادة الفرسان في ساحة الحرب

ومن أحدياته المعروفة بعد فتح الرياض

مهبول ياقايل قضت
توه عمر دخانها
يطرد بها ورع صغير
وخيل بظهور حصانها

وله أيضا بعد انسحابه من الرياض بعد معركة الصريف
يادارنا لاترهبين
لابد ما نرجع عليك
أعطيك أنا العلم اليقين
لو ننتحي لازم نجيك

وله أيضا بعد معركة جراب

عيوا يطيعون النصايح
ونا عن البوق أتدرى
ياللي تريدون المدايح
ما خير إلا عقب شرا

وله في معركة روضة مهنا
عدوكم قدامكم
لابد من علم يصير
نمشي لصاحبنا قدا
واللي يحايلنا نحايله