مواقف في الحرم....

[الغيـورة]

السلام عليكم ورحمة الله وبركاته ...

أخواتي ...

إليكم هذه المواقف والتي حدثت لي البارحة أثناء أدائي لمناسك العمرة
((تقبل الله مني ومنكم ))

الموقف الأول ..
أثناء الطواف وبالتحديد عند (( الركن اليماني )) من الكعبة ..
طبعاً عارفين وشلون الزحمة هناك وأنه غالباً مايكون هناك (( عسكري )) واقف
بزعمهم يحد من الزحمة ..
والعسكري إلي كان موجود البارح ...الله بالخير ياأخلاقه المهم
أحد الأخوان لصق بالركن اليماني وقعد يبوس فيه ...
مادريت إلا العسكري يقوله ...
مسح مسح ..بس بوس بس بوس باسك أبليس...

الموقف الثاني...
أبحكيه على لسان ود .. وهي تحكي للأهل عنه
في أخر شوط للطواف .. ولومينا تناظر أسفل تبي تشوف الخط الأسود
(( علامة الحجر الأسود )) وهي مدنقه برأسها مادرت إلا بكوع واحد من الأخوان
وهو رافع يكبر صقعها((طررررخ )) صقعة محترمة ومعد صرت تشوف دربها...
طبعاً حنا متنا من الضحك عليها وكان واضح عليها أنها دايخة
حتى حنا معد صارت تدري عنا وصارت بس تمشي وتمشي لين
لقت مكان فاضي ورفعت رأسها عقب الدوخة...
وياله قدرنا نلحق عليها ... وإلا كنا بنضيع عن بعض

الموقف الثالث.
عقب ماخلصنا دعاء الطواف .. فيه ورأنا جالية مصرية
مادرينا إلا وحدة منهم تسأل .. (( إلا صحيح أمتى حنرمي الجمرات ))
بصراحة ماقدرت أمنع نفسي من الأبتسامة ..
ويوم أنتبهت لي .. قالت (( معلش أصل أحنا مانعرفش حاجة دي أول مرة ))
والله حنا بنعمة محنا حاسين فيها الحمد لله بس

الموقف الرابع ..
في المسعى ... أحد الأخوات المصريات ..تدف أمها بعربة ..وهي نازلة من الصفا
أنفلتت منها العربة وتدحدرت الأم بعربتها وصارت البنت تركض ورأها تبي تمسكها
وما وقفت العربة إلا بعد ماصقعت بواحد من الرجال .. الذي ظهر على وجهه الم الصقعة
بعد أنتهاء الموقف ... قعدت الأم وبنتها يضحكون

الموقف الخامس ...
طبعاًأول ماوصلنا خلعنا (( أحذيتنا )) الله يكرمكم ووضعناها بحقيبة عند أحد الأبواب
طبعاً أنا قلت لود .. ماراح نلقاها ... قالت لا إن شاء الله بنلقاها ..
قلت لها على العموم ..أنا لأبسة أقدم شيء عندي علشان ماأتحسف عليه
وبعد ماخلصنا ...
رجعنا ندور ... وندور ... كلهم مالقوا أحذيتهم إلا أنــــــــــا لقيته وكشخت فيه
ومشت ود حافية القدمين لين وصلت لأقرب محل وشرت الأحذية وجابتها
يوم شفتها ... قلت والله حلوة بعد (( ليتهم سرقوا جزمتي معكم ))