يوميات زوج معددّ .................................!!!!!!!!

المتأمل · #1 16-02-2002, 05:09 AM

.................................

مضى على زواجي من بنت الناس الطيبة حوالي عشر سنين , وما شفت نفسي إلاّ وأنا أبحثلي عن زوجة تانية .. طيب ليش يا ولد الناس ..؟؟ .. كدة قالت أمي الطيبة , يعني إيش سوت لك الآدمية الطيبة ..؟؟

- جميلة وتهتم بنفسها .. وأولاد وجابتلك كام واحد من كل جنس .. ولا هم ولا يحزنون .. إيش اللي تبغاه ياولدي .......؟؟

قلتلها :

- والله يا أمي الواحد نفسه يعدد .. ويغيّر الوجه اللي يشوفه كل يوم ..!! .. وبعدين الدين سمحلنا ناخذ راحتنا في هذا الموضوع .. والحلال يا أمي أحسن وأشرف من الحرام ..

ولما غلبت فيّ أمي قالت لي بكل وضوح :

- يا ولدي سوي اللي تبغاه .. بس ترى لا تدخلني في الموضوع , ولا تلومني بعدين .. ترى الحجر من الأرض والدم من رأسك ...!!

طبعا صاحبكم ما كذّب خبر ... حاولت أخطب عن طريق أخواتي , لكنهم عملوا رابطة معارضي الزواج الثاني .. ورحت والله فيها وطي .. طبعا كل واحدة منهن خايفة لا تسعى في الزواجة , على مبدأ أمشي في جنازة ولا تمشي في جوازة .. , وبكرة النهار زوجها يقتدي بأخوها .. لا يا أخويا , روح دبّر نفسك بنفسك .. ويا دار ما دخلك شر ..!! ... قلت في نفسي :

- طيب يا محترم إيش الحل ..؟؟

أخوكم بصراحة سمع عن البنات الشاميّات وكيف إنهم يقدسوا الحياة الزوجية .. قلت ما بدهاش .. الواحد اللي بدو يتزوج يتزوج قمر , واللي بدو يسرق يسرق جمل ..!! ..طبعا أنا أبغى أتزوج , ما أبغى أسرق .. يعني العملية سهلة ونتيجتها إنشاء الله للقفص الذهبي .. ماهو لقفص السجن لاقدر الله ..

طبعا قراري بالزواج من واحدة خارج البلد جاء بعد محاولات عديدة داخليا ... لكني كلما رحت أدوّر وأخطب قالوا لي :

- وووووي هو إنت متزوج ...؟؟؟؟

.. وعرفت وسمعت بكل صراحة إنه بناتنا السعوديات كل واحدة منهن حاطة عقلها في رأسها .. وما ترضى تتزوج واحد متزوج .. وإذا رضيت تكون عدت السن القانوني والصلاحية الزمنية للإستهلاك الزوجي ..

طيب علشان ما أطوّل عليكم اليوم .. أقول لكم مع السلامة , وراح نلتقي بإذن الله تعالى مع يومية أخرى توريكم إيش عملت بعد كدة . .... وإيش هببت ..؟؟

تحياتي لكم ولهن , ولكل راجل عينه على الزواج الثاني وماهو قادر عليه ...!!

المتأمل .

padr · #2 16-02-2002, 02:42 PM

السلام عليكم
مرحبا اخى المتامل
قال تعالى( فانكحوا ما طاب لكم من النساء مثنى وثلاث ورباع فان خفتم الا تعدلوا فواحدة او ما ملكت ايمانكم ذلك ادنى الا تعدلوا
وقال تعالى( ولن تستطيعوا ان تعدلوا بين النساء ولو حرصتم فلا تميلوا كل الميل فتذروها كالمعلقة )
وانتظر التعليق قريبا
padr

المتأمل · #3 17-02-2002, 02:50 AM

أخي الكريم بدر ..

شكرا لك على تفاعلك مع الموضوع ..

الآيتين الكريمتين اللي قلتهم أفهم منهم التالي :

1- الأصل في الزواج هو التعدد , لأنه قال عن المثنى والثلاث والرباع قبل الواحدة .. وهذا الكلام قالوا السلف الكرام ..

2- العدل المثالي غير موجود ولا مطلوب .. العدل المطلوب والشرعي وهو فيما يملكه الإنسان .. يعني في النفقة والمبيت .. أما القلب فأمره عند الله ..

تحياتي يالطيب .

المتأمل · #4 17-02-2002, 04:10 AM

................................................

( 2 )

القرار الصعب , والإختيار الأصعب

................................................

يتساءل بعض الأزواج اللي نفسهم في التعدد , كيف أقنعت المدام بالزواج عليها ..؟؟ .. وأقول لهم ببساطة بأني حطيتها أمام الأمر الواقع ... يعني في أحد عاقل يطلب من زوجته الموافقة على شريكة لها في حياته ..؟؟

لا .. والبعض يصدق الكلام اللي بدون معنى لزوجة قامت بتزويج زوجها بنفسها .. يا أخوانا هاذي الشغلات ما تصير إلاّ في الأحلام ... طيب هادي عائشة رضي الله عنها لما كان الرسول صلى الله عليه وسلم تأتيه إمرأة لتكلمه في شأن لها .. كانت السيدة عائشة تحاول توقف في وجهها علشان مايشوف الرسول شكلها ويعجب بها ويتزوجها ..!!

يعني المرأة هي المرأة في العصور القديمة ولاّ الجديدة .. هي فطرة الإنسان إنه ما يبغى أحد يشاركه في ممتلكاته ..!! والزوجة في إعتقادها إنها بدبلة وعقد الزواج حجزت هذا الراجل في قفصها الذهبي ( ساعات يكون خشبي ومهكع , وخشبي كثير عليه ) .. واحتكرته عن باقي الناس ..!!

وهادي بصراحة الشغلة هي أساس المشكلة ... كيف ؟؟

إحتكار السلعة منهي عنه في الإسلام .. ليش ..؟؟؟

- لأن التاجر المحتكر للسلعة راح يستفرد بالمستهلك ويقدمله خدمات كحيانة وبمقابل عالي .. ليش ..؟؟

- لأنه ما في غيره يقدم هادي الخدمة .. والدليل على هذا الأمر شركة الإتصالات , اللي مطلّعة عيون الناس هي وشركة الخطوط السعودية .. جيب لهم شريك منافس في تقديم الخدمة وشوف كيف يشتغلوا زي الحريقة ويقدموا الخدمات للناس وبأقل الأسعار ..

- وزي كدة الزوجة الواحدة مع زوجها المسكين ... متفردة بيه , ولما تمرض يمرض معاها , ولما ( .... ) يجلس ينتظر إلين ماربه يفرجها .. والأدهى لما تزعل منه أو تزعّله بدال ما يحاول يهجرها في المضجع , علشان ترجع لعقلها .... ما يقدر المسكين ماهو يادوبك بيلقاها فاضية ..

وبعكس الوضع الطبيعي , تلاقي الزوجة هيّ اللي بتتحكم في الراجل , وهيّ اللي بتأدبه بالهجران في المضجع .. وانقلبت الآية علينا نحن المساكين ..!! .. نستاهل لأننا تركنا الحل الشرعي .. وعلشان كدة - والله أعلم - تلاقي الشرع وسّع الباب للرجل .. والمسكين الرجل ضيّقه على نفسه ..

......................

المهم ما أطوّل عليكم , قررت إني أفك الإحتكار اللي وقعت فيه لعشرة سنين , وسميت بالله ورحت أبحث طبعا بالسر ... لأنه مافي داعي أحرق قلب الحرمة اللي كانت نايمة في العسل ...!!

أولى المحاولات كانت مع سعوديات .. بدأت بالصغيرات لأني كنت أطمح ألاقي واحدة قبل العشرين عام .. قال الوسيط :

- لا .. العملية صعبة وإنت متزوج وعندك عيال وأم عيال ..

طيب رفعنا السن وأتنازلت للعشرينات , مافيش فايدة , للثلاثينات , برضة بنت البلد ما في أحسن منها حتى لو كانت كبيرة ( بلاشي من العبارة البايخة اللي زعلت أختنا باونتي ) .. في النهاية لقيت نفسي قدام خيار صعب : واحدة في نهاية الثلاثينات وكمان بتشترط .. المهر ما ادري إيش .. والسكن ما ادري إيش .. والفرح نسويه ما ادري فين ..!!

قلت لهم ياعمي إنتو عزلتوا ونحن مبطلين ... سكرتيري كان شاب شامي لطيف .. طبعا سمع بعض محاولاتي في البحث .. ( ترى السكرتير أخطر واحد ممكن يتجسس عليك ..!! ) .. وفي دردشة لطيفة قال لي روح لعنّا بالشام ( ماراح أحدد الدولة , علشان ما ندخل في متاهات الله يعلم كيف نخرج منها .. ) .. وخذلك الصغيرة الجميلة .. وفي النهاية إنت إللي راح تشترط ...

- معقووووووووووولة .؟؟؟ هوة أنا في حلم ولاّ في علم ..

- لا يا سيدي في علم .. روح وشوف وما راح تكون خسران ..!!

أخوكم وضّب له رحلة عمل على هناك , بعد ما أرسل سكرتيره هوّ وأهله علشان يعملوا له لجنة إستقبال وتهيئة عائلية .. ومجرد ما وصلت على البلد ( برضة ماراح أقول إيش هي ّ ..!! ) .. كانت العائلات في إنتظار عريس الهنا .. إللي راح يزور كل يوم كام عائلة ويشوف ويناقش ويعاين بكل وضوح ...

طبعا ماهو زي عائلاتنا هنا .. الواحد فيهم إذا وافق يوريلك بنته خرجت لك تمشي بسرعة البرق .. وإنت وحظك تلحق تشوف ولا يفوت عليك القطار ..

طبعا في النهاية شفتلي واحدة صغنونة أخترتها بمزاجي .. عمرها يساوي نص عمري ... ماهو كدة الشغل المضبوط .. أجل تاخذ لك واحدة على قول واحد صاحبنا : من أول مشوار تخبّط عليك ..؟؟

كانت لي شروط إجتماعية أخرى غير السن والجمال والدين ( المعقول ...!! ) , كان يهمني إنه البنت تكون عايشة مع أبوها وأمها .. وإنه الأب هو إللي مسيطر على البيت .. ترى هاذي شغلة مهمة ممكن تودي الرجّال في ورطة ما يعلم بها إلا الله ..

وكدة نكون خلصنا من مشكلة إتخاذ القرار الصعب ... والإختيار الأصعب ..!!

في يومية ثالثة , إذا ربنا أعطانا عمر وعافية .. راح أتكلم عن بداية تجربة التواصل مع شعوب نختلف عنها في العادات والتقاليد .. وربنا يعين ويسهّل ..

أخوكم المحب المتأمل .

padr · #5 17-02-2002, 02:14 PM

السلام عليكم
انتظر اخى تعلقى على نفس الموضوع
علشان مخى الحين

ولكن الموضوع جد مهم
padr

اليمامة · #6 17-02-2002, 03:04 PM

الاخ المتأمل

هذا رائي

[لااعتراض لاحد على تعدد الزوجات فقد اباحه الاسلام السمح 00 ويسمح به 00 الا ان التشريع وضع العدل شرطا لمن يطمح في أكثر من زوجة 00 وأكثر من زيجة 00

(( فان خفتم الا تعدلوا فواحدة )) صدق الله العظيم 00
ومظهر العدل في الزواج لمن يبتغي التعدد ان لايظلم واحدة على حساب الاخرى 00 ان لايكون في سلوك الزوج وتعامله مع زوجاته جنوح مدمر 00 تسعد به واحدة 00 وتشقى الاخرى 00 وتصل نتائجة السلبية الى الابناء على هيءة خصام 00 وتناحر 00 وفجوة في العلاقات يصعب ردمها

اذا كان مظهر العدل شرطا أساسيا للزواج من ثانية وثالثة او رابعة 00 فان عامل القدرة ايضا على تحمل اعباء الزوجة امر مهم وضروري سواء أكان ذلك ماديا 00 او سلوكا حتى لاتتحول الحياة الى جحيم لايطاق 00

تعدد الزوجات يعني تكاثر الاولاد 00 يعني أن مسئولية الرعاية والعناية باتت تشكل عبئا ضخما 00 وحملا ثقيلا لايقوى عليه الا ذو حظ عظيم 00

من هنا تبعات المسئولية تتسع وتتشعب باتساع دائرة الانجاب 00 وكم هم كثيرون اولئك الذين تكاثروا 00 ملأوا حجرات بيوتهم نسلا وذرية 00 ولكنهم فشلوا في أن يصنعوا مناخا صالحا لأولادهم فتلقفهم الطريق وجرفهم في تيار احداثه 00

ومااحلى العدل 00مع أكثر من واحدة 00 والاحلى منه ان واحدة وكفاية00 والاحلى ان نكون قادرين على توجيه ابنائنا 00 وتنشئتهم النشأة الصالحة 00 ولن نكون قادرين مهما حاولنا اذا طفح الكيل 00 وتدفق الأناء بعد ان ضاق بما فيه 00 فلنلق الكيل الطفح 00 ولنلق الاناء النضح 00 ولنمد أرجلنا على قدر لحافنا كما يقول المثل 00

المتأمل · #7 17-02-2002, 03:28 PM

أخي الكريم بدر ..

سلامة مخك .. إنشاءالله يكون بخير دالحين .. وانا في إنتظار تعليقاتك ..

........................

أختي الكريمة اليمامة ..

كل ما ذكرتيه في مداخلتك الطيبة أتفق معك فيه .. ماعدا الفقرة الأخيرة , فلي تحفظ عليها ..

وهو أن التعدد هو فعل خير الناس من السلف الكرام ... وليس هناك ما يعيبه , ولا يجعلنا ندعو للإكتفاء بواحدة .. سوى التطبيق السيء لبعضهم ..

تحياتي الطيبة .

المر · #8 18-02-2002, 08:51 AM

أهلاً و مرحباً بك أخي المتأمل في الخيمة (و لو إنها متأخرة بعض الشيء

) ، و بانتظار نهاية اليوميات الطريفة قبل أي تعليق

padr · #9 18-02-2002, 01:08 PM

السلام عليكم
سلمك الله اخى مخى قبل العيد دايما بيكون كدة اسالك الدعاء
بس لا تفكر انة كدة علشان اللحمة
بس انا خايف قبل ان اكتب تعليقى تكون غيرت من يوميات زوج معدد الى يوميات زوج مهدد

المتأمل · #10 19-02-2002, 05:41 AM

.............................................

( 3 )

الخطبة , والفروقات الإجتماعية ..!!

.............................................

لمّا كنت حددت أسبوع واحد لرؤية البنات المرشحات للخطبة وإللي تنطبق عليهم شروطي ( !!! ) ... , وجدت الوقت بيمضي ولا قدرت أوصل لواحدة تناسبني وأناسبها ..

وفي آخر لحظة .. خطرت على بالي واحدة صغنونة شفتها في مناسبة هناك , قلت أروح أجرب حظي معاها ... تمت الأمور بسرعة غريبة وتوفيق أغرب ..!! .. وعجبتني بنت الناس الطيبة .. ذات الستة عشر ربيعا .. يعني .. وبحسبة بسيطة نلاقي إنه عمري بالضبط ضعف عمرها ..!! .. والغريب إني عجبتها ...

وبعد الرؤية والدردشة إللي طولت أكثر من اللازم .. قلنا نتوكل على الله ونتكّلم مع الرجال .. لقيت أخوانّا مشكلين لي مجلس كونسلتو ( إستشاري ) من الأب والأرحام والعدلاء علشان يقابلوا السعودي إللي جاء يخطب بنتهم .. وبدأت تمطرني الأسئلة إللي كنت خايف منها :

س - ليش بدك تتجوز على المدام .؟؟ . هي مريضة .. ؟؟ .. ماتجيب ولاد ..؟؟

ج - لا .. والله بنت الناس ماقصرت .. طيبة وبصحة وعافية , وجابت لي أربعة ولاد .. لكني عاوز أعدد ..

س - وين حاتسكّن البنت إذا صار نصيب .؟؟ .. لا يكون مع المدام ..؟؟

ج - البنت حاتسكن لوحدها وفي شقة خاصة بيها ..

س - .........؟؟؟

ج - ....................

واستمرت لجنة التحقيق والمساءلة إلين ما أقتنعوا بإنو العريس المحترم ماهو ناوي يودي بنتهم في داهية .. ودخلنا في المهر وما يطلبه المستمعون .. - عفوا قصدي المتسائلون - من أهل العروسة .. والحقيقة إنهم طلبوا مبلغ محترم للمقدم والمؤخر ... وشقة أشتريها لها هناك قريب من أهلها ..!!

وراح فكري في بنت الناس زوجتي السعودية , إللي أتجوزتها بدون ما نتكلم في المهر مع أهلها ..

- إللي تجيبوا , نحن بنشتري رجّال ..

طيب وبعدين ..؟؟؟ .. أخوكم حدد مهر معقول يساوي مهر السعودية وعليها تكاليف الزواج والذي منّه ..!! .. أما الشقة فلا يمكن أوافق ... هي حاتسكن عندي ولا عندكم ..؟؟؟ .. وبعد مفاوضات متعثرة .. وتشبث مني وتشبث منهم , جات في بالي فكرة غريبة وجريئة :

- قلت لهم : أستشيروا العروسة ... ( طبعا جاء في بالي إني إذا عجبتها لابد يكون موقفها مختلف ..!! )

راح والدها الطيب وسألها , وكانت المفاجأة إللي تقول إنو العروسة موافقة على إللي أقدمه .. كانت هي الخيرة ولله الحمد .. , تمت إجراءات الخطبة وعقد القران الصوري ( مايصير تعمل عقد قران رسمي بدون تصريح من الداخلية السعودية ) ..

والحقيقة أنا كنت حريص إني أعقد القران علشان آخذ راحتي من البداية , هوّ زواج ولاّ لعب عيال على قول أخونا المصريين ..

طبعا طلبت إن الحفلة البسيطة تكون ماهي مختلطة , ووافقوا على طول ... حفلة الرجال لازم نعمل مولد ... كدة قال أبو العروسة ..

- مولد إيه ياعم .. لا يسمعك المشايخ عندنا بعدين يزعلوا منك ..

أتضح إنو المولد إللي يقصدوه هو نوع من الأناشيد الدينية في مدح الرسول عليه الصلاة والسلام .. ومدح العروسين .. وشوية ذكر لطيف وماعليه غبار ... بعد التأكد قلت لهم أتكلوا على الله وربنا بجيب الطيب ...

الحقيقة .. وأنا في الحفل سرحت بعيد عنهم وعن العروسة .. في أفكار غريبة ..

- إيش الوضع دا إللي جيت بنفسك ليه ..؟؟ .. طيب إنت تقدر تتلائم مع عادات هادولا الناس إللي من أولها واضح بعد عاداتهم عنك وعن مجتمعك ...؟؟

- طيب وبنت الناس هادي إللي حاتدخل حياتك وهي لسة مغمضة , وماتعرف إيش إللي وراها وإللي قدامها كيف حاتخليها تحبك وتحافظ عليك زي ما إنت تحافظ عليها ..؟؟

تبغوا الصراحة , خفت من الفروقات الإجتماعية الكبيرة إللي شفتها للآن , وأكيد ماخفي كان أعظم ..!! .. لكني أتذكرت إن الأشياء إللي تجمعنا برضة كبيرة .. الإسلام وخاصة إنها كانت قريبة من الدين بشكل معقول ... تتحجب الحجاب العادي .. لدرجة إنها لما جيت أشوفها رفضت في البداية تخلعه وتوريني شعرها ... إلين ما أقنعتها إنو من حقي أشوف إللي يدفعني للزواج منها ..

وبرضة , أتذكرت الآية القرآنية الشريفة ( .. إنّا جعلناكم شعوبا وقبائل لتعارفوا .. ) .. والزواج أكيد من الأشياء إللي تخلي الناس يتقاربوا ويتعارفوا أكثر .. وهذا الرسول عليه الصلاة والسلام عقد على أم المؤمنين ماريا القبطية رغم إختلاف المكان والعادات واللغة ..

أخيرا صحيت من أفكاري الشاردة على صوت المأذون وهو يبدأ إجراءات العقد .. وقلت في نفسي الله يجعله خير علي وعلى حياتي القادمة ...

عزمت في نفسي إني أحط خطة لكسب قلب بنت الناس الشامية , لإن الحب هو أحسن طريق للتوفيق بين الزوجين .. وكانت أساسيات هذه الخطة إني أخطف رجلي كل كام أسبوع لعندهم علشان أقرب المسافة بيننا .. وكمان بصراحة علشان أنبسط أكثر وأكثر .. يعني على قول أهل مكة الطيبين ( حج وبيع سبح .. ) .

وسلامتكم , إنتو وكل واحد ناوي يعدد .. , وكل عام والجميع بألف خير .

المتأمل .