((( الزمـــــــــــــــن )))

[أسير الجرح]

((( الزمـــــــــــــــن )))

عندما تتغير الوجوه ويصبح الصاحب عدو ويظن فيمن كان

صديقه أسوأ الظن0 وعندما تتغير الوجوه الى ألوان متعدده

وعندما لايكون للصداقة معنى في زمن المهزله والمصالح عندها

سوف أقف شامخا رافعا صوتي وأهدي هذا الزمن أبياتي

وأهديها الى من غيره الزمن00000


بالله قلي يازمان المهزله يالمحترم 000 وش اللي بقى من عالمك قلي وأنا بستوعبه

علمتني كل الدروس وقلت لي كل الحكم 000 لكنك أخفيت الحقايق وأبتلعت الأجوبه

أما أنت كذاب وردي والا أنا ماأفتهم 000 واحد من الأثنين فينا ماوثق في صاحبه

لو تلتفت ياسيدي وتشوف تاريخ الأمم 000 ماقلت لي ان الزمن هذا جهاد وتجربه

هذا الزمن مايعشقه ويعيش فيه الا الصنم 000 ماتقدر تميز غثاه وبلبله من عقربه

فيه الحقايق كنها الأحلام للي ماحلم 000 تغريه لكنه توهق فيها من كثر الشبه

أختلطت الأوراق فيها وصار بالوادي قمم 000 حتى الصغير يازمن قام يتفاخر بشنبه

فيه الردي أصبح مهم ويحترق فيه الأهم 000 عالم من الكذب الرخيص وعالم من الأتربه

والوقت يلعب لعبته والذيب هاب من الغنم 000 معذور ذيبك يازمن لو جاه طفل وهيبه

بيت يهدده الضياع وتنشرى فيه الذمم 000 لاعاد تشره يازمن لو جاه ضيف وخربه

والظلم قل لي من بقى في هالزمان ماأنظلم 000 والا أنت خايف تظلم الظالم وتدخل مكتبه

الى متى نوخذ لحم ونرد مافينا لحم 000 ياللي بنيت من العظام البيض سلم وعتبه

لو فيك خير كان ماوزعت كلمة والنعم 000 وخليتها بين الخلايق تنعطى مثل الهبه

لاصار طيبك يازمن عن الردى ماينقسم 000 ليه نتعذب يازمن مع هالنفوس الطيبه

لو المراجل تنشرى وتباع في حبة خشم 000 ماشفت لك حر يصيد وعزته في مخلبه

لو بشتكي لك يازمن ماني بشاكي من ألم 000 لكني بنثر لك كلامي وأنت قوم ورتبه

لو كل من حده زمانه باع صوته وأنطرم 000 مابين الأبداع بالدنيا وشفنا الموهبه

كم خلد التاريخ من مبدع وكم خلد أسم 000 شيب براس العالمين وراح محد شيبه

للحين راسخ في جبين الذاكره مثل الهرم 000 ماتقدر الدنيا ولا التاريخ يقدر يشطبه

واليوم جاء من غير الأفكار في جرة قلم 000 يكتب ولكن للأسف مايفهم اللي يكتبه

يلهث ورى طرد السراب وعايش بدنيا الوهم 000 ويستغرب ان الناس هذي كلها تستغربه

يهدم بنايات الفكر ويرد يبني ماهدم 000 يرضي غروره ويتباهى في عيون المعجبه

عنيد مايرضى يطيع ويقتنع انه قزم 000 يصدق اللي صفقوله والصدوق يكذبه

عطيته اللقمه ولكن صار في قلبك عظم 000 غص وتفضل ماعصرته في يدينك واشربه

الى أنكسر قوس الحريب وش فايدة هذا السهم 000 والى أنكشف ستر العذارى وش تفيد الأحجبه

الليل يسري وأنت (ياساري) حزين ومنصدم 000 أسهرت عينك والدروب اللي تبيها متعبه

هيا أنسجم مع زمانك طيع شوري وأنسجم 000 واليا بغيت أعاتبه خليت القصيد يعاتبه

لو الزمن يسمع كلام الناس ماجار وظلم 000 لكنها من عصر أبونا آدم وهي متقلبه

الوقت هو الوقت والمحظوظ من ذل وسلم 000 كم واحد قبلك تحداه الزمان وغيبه

تحياتي

[منال درويش]

سلام الله عليك
ومرحبا بك في خيمتك للنثر والعامية

حقيقة مؤلمة تلك التى افرزتها قريحتك

لكنها نسجت بروعة وجمال وشجن رائق

اشكرك أخي على هذا الطرح وأتمنى من الله ان يوفقك دائما الي ما فيه خير الكلمة

مع أطيب المنى وارق التحية

[المد]

يسلمو اخوي على ما اوردة كلام جميل .

تحياتي

[أسير الجرح]

شكرا منال على ردك وان كان للقصيده من روعه

فروعتها بردك عليها0

( اذا كنت ذا رأى فكن ذا مشورة فاان فساد الرأى أن تتعجلا)


شكرا لك000

[أسير الجرح]

شكرا أخوي أحمد على ردك وترحيبك00