عابر سبيل ......!!

[منال درويش]

أخوتى الاحباء في خيمة النثر والعامية ،،

تحية غالية ،

اقدم لكم مساجلة قديمة بالعامية المصرية كانت بينى وبين الشاعر أحمد الخالدي وقد نشرت في ديوان الادب بأريبيا وها نحن نقدمها لكم تباعا في خيمتنا ...

نرجو أن تحوز رضاكم ونقدكم

عابر سبيـــل..!!

مفتتح
صفرت يا قطر محطاته
تعبت من كتر الجري وراه
وانا باستناه
الحلم الفارد درعاته
ومراهن ع الكون بحياته
قطع المشوار
ما بين النسمة اللي مسافرة
والقلب الحالم بنهار
لجل ما توصل للشموسه
السارحة ف حضن النوار
صفرت يا قطر محطاته
وأنا عابر و سبيلي آهاته
باتمني الضحكة فِ دمعاته
ومسافر يبحث عن ذاته
مشتاق للحضن الجواني
عابر ، و دنيتي واخداني
بأخرج من عالم للتاني
سواح في بلاد الله
والخلق خلايق يتعدوا
وفِ هم المسافات بيباعدوا
وان توهت فِ سكتي ح يساعدوا
دي عجايب خلق الله
صفرت يا قطر محطاته
وأنا عابر وسبيلي آهاته

[أحمد الخالدي]

عابِرْ سَبيلْ، في الْمُسْتَحيلْ
شَقِّ الطَّريق تاني !
آدي الطّريقْ، قُدَّامي ليلْ
قُدَّامي أحزاني !
قُدَّامي ناسْ، مَشْيي طَويلْ
وِكَأنِّي وَحْداني !
سامِعْ فَرَحْ، سامِعْ عَويلْ،
وِأغاني عَجْباني !
حَ اوْصَلْ لِفينْ يا دي السَّبيلْ؟!
حَ اوْصَلْ لإنساني ؟!
حَ ادْخُلْ مُدُنْ على ضَهْرِ خيلْ،
وِتْمِدِّ يا حْصاني ؟!
حَ اشْرَبْ أنا مِنْ سَلْسَبيلْ،
أشْرَبْ وِألْقاني ؟!
حَ ازْعَلْ كثير، حَ افْرَحْ قَليلْ،
ولا ديْ أشْجاني ؟!
الْحِلْم حِلْو والشوقْ جَميلْ،
والسِّكَةْ مَشْياني !!
… آدي الطَّريقْ، فين الدَّليلْ؟!
إرْشِدْني يا لْساني !!

[منال درويش]

المقطع الثالث :
***********
عابر سبيل ، مشوار طويل
والحلم متلفح بليل
والموت سكوت
و العتمة موت
والآهة تصرخ الف ويل
فين السبيل ؟؟!
من غربة الليل الطويل
دقيت علي كل البيبان
مشتاق يا حلمي
يا اللي كان !!!
محفور علي كل الحيطان
صورة و آذان
واتسرسبت مني السنين
موال حزين
ما دريت ولا أعرف
هوه فين ؟!
يمكن يكون ؟!
يمكن يهون؟!
يمكن ما تنزل دمعتين
تطهر الليل م الانين
لما اتخنق فيه الحنين
واتلجم القلم الفصيح
مبقاش يصيح !!!
واتبعترت كل السكك طواحين
يا شاعر الناي والربابة
يا عاشق الناس الغلابة
المحرومين م الحلم والتفاريح
اللي بيوتهم من قزاز وصفيح
متشوقين للنسمة وسط الريح
اللي ساكنهم الألم تباريح
اللي عاشقهم السكات تسابيح
يا شاعر الناي والربابة ……
متلجمة يا شمعة المصابيح

[أحمد الخالدي]

…عابِرْ سبيلْ يا دي الهوى،
والرحلةْ ف عينيَّةْ !
بامْشي وانا عكس الهوا،
بامشي على ايديَّةْ !
عابر سبيل لمّا نَوى،
سافْروا المراكْبيَّةْ !!

… الدَّرب ماكِرْ والْتَوى،
والسِّكَةْ مُشْ هِيَّةْ !
والقلب -لَوْ شاف وانْكَوى-
باقي على الغِيَّةْ !
الحِلْم بَشَّرْ واسْتَوى،
مين يُقْطُفَكْ لِيَّةْ ؟!!

...عابرْ سبيلْ، نُعْبُرْ سَوا
انتَ وانا والشوقْ !
نُعْبُرْ، وِلَوْ غيرْنا هَوى
إحنا نِمِدِّ لْفوقْ !
نُعْبُرْ على الخوف والنَّوى،
نِرْمي فْ غَرَقْنا الطوقْ !!
إنتَ وانا… إحنا الهوى
يا حِلْمي يا مَعْشوقْ !!!

[منال درويش]

المقطع الخامس
************
عابر سبيل،
فِ محراب الهوى عابد
و الضي مالي العنين
و بالأيدين فارد ،
أمل فِ بكرة اللي جاي
ولسكته معاند
صلب الحديد لو لان
يمكن ح يتهاود
تصفي الشموس أو تغيب
عمره ما كان جاحد
يا درب يا مستحيل
مين يطرقك غيري
لو كنت قلب الليل
صابر علي ويلي
النهر متلون بخوف !!
والمية مش هيه
تِحمي في قلب الجوف

والسكة مطوية !!
لو قلت عاشر وشوف !!
الدنيا مش هيه !!
لو قلت سامح ألوف
قلبك ماهوش ليه!!
يا درب يا مكتوف
العين و النية
المركبة تاهت
والرحلة منسية!!!
لو قلت جازف وعوم
و إنسي الأسى والهموم
راح ارتمي جواك
حرفين فٍ أغنية
تحيي أمل فيا
يا درب يا مكتوف
العين والنية!!

[أحمد الخالدي]

هذا هو المقطع السادس ولا زلنا بانتظار آرائكم وتعليقاتكم يا أصدقاء...


… يا حِلْوِ يا مَمْشوقْ،
يا حِلْوِ يا وَعْدي !
يا سِحْر مُشْ مَسْبوقْ،
وِقْمارْ على سُهْدي !
يا دُنْيِتي مَخْلوقْ
لِيَّا أنا لْوَحْدي !!

… يا أوِّلِ الأفراحْ،
جايّةْ على قَدّي !
وِتْفيضْ على الأرواحْ،
أسْقي النّدى شَهْدي !
يا جَنِّةِ التُّفَّاحْ،
يا فُلِّي، يا وَرْدي !!

… عابِرْ أنا في النَّاسْ
يا هَلْ تَرى وَحْدي ؟!
ولا انتَ دون النّاسْ
يَدَّكْ على يَدّي ؟!
طول ما انتَ في الإحساسْ
والقلبِ دةْ ودِّي،
ما اسْمَعْشِ لِلْوِسْواسْ
ولا اخَفْشِ مِنْ بُعْدي !!

… يا حلو يا مَمْشوقْ
يا عِشْقي يا سَعْدي
يا نَجْدِة المَخْنوقْ
إنجِدْني مِنْ ضِدّي !!
… يا سِحْر مشْ مَسْبوقْ
يا عِشْق يا مْنَدِّي،
إزَيِّ حالِ الشوقْ
والحُبِّ مِنْ بَعْدي ؟!!

[الصمصام]

الأخت منال والأخ أحمد:
جميل ما تسطرانه وكم هو رائع هذا العبور ولكنه ليس عبورا كعبور عابر السبيل بل إستقرار في قلوبنا
طبعا مداخلتي تأخرت وأعتقد معظم الإخوة كذلك بانتظار نهاية السجال
ولكي لا نقطع التسلسل في سجالكم
ولكي لا تعتقدوا أن الأمر إهمالا دخلت لكي يستمر هذا العبور العذب

بارك الله بكما

[منال درويش]

أود قبل أن ادخل المقطع السابع أن اشكر أخى الصمصام علي متابعته لهذا السجال القديم الجديد فهو قديم في توقيته جديد في خيمة النثر والعامية

تحياتى لك أيها الكريم والي الاخوة جميعا
*******************************************
عابر سبيل، ميل
ورد السلام
فِ ايدية سنابل هَنَا
والثانية برج الحمام
ناسي هناك الضنى
عايش هنا الأحلام
عشق النسيم طلعته
وبنوره عشت الغرام
عابر سبيل انت ولا
حدوته وسط الكلام!
عابر ودق الوتر
صحي الندي فِ العنين
غازل جبين القمر
داوى الجراح بالحنين
يا شوق قصايد الغزل
يا لهفة العاشقين
لو ضاع فِ يوم الامل
نلاقيه في ضي العين
النيل علي طلعته
ميل و بيمسي
والبدر من فرحته
غنى وقال نفسي
اسمع صدي غنوته
ساعدني يا حسي
لجلن ما أعيش دنيته
وانسي تعب أمسي
والعين قصايد شعر
والقلب ليك شمعة
لو تتحرق الف يوم
تصفي علي دمعة
تحي خضار القلوب
وشمسك الطالعة

[أحمد الخالدي]

اولا تحياتي للصمصام ونحن بانتظار تفاعل الجميع لكي نعرف هل وصل لهم الموضوع وأين أخفقنا واين قصرنا...

رأي الجمي مهم جدا بالطبع.. وهذا هو المقطع:

... سكة مَشاعْ
أو سكة مخصوصة لِنا ؟!
...قبل الوداعْ
السكة نادت ضِلَِّنا !
خوف الضّياعْ
جَمِّدْنا في الأوّل هِنا !

...خُفْنا نِسيرْ،
خُفْنا نِضيّعْ بَعْضِنا !
صوت الضميرْ
نادى علينا وشدِّنا:
مِشْوارْ خَطيرْ
والريحْ بتجري ضدِّنا !!

... لمّا بِنُعْبُرْ في السِّكَكْ يبقى (عُبورْ)
لما السكك تُعْبُرنا دة اسمه (الرحيلْ) !
لمّا بِنِوْقَفْ في السِّكك تجري الطيورْ
وكإننا فزّاعة من قش السبيلْ !!
لمّا بِنُعْبُرْ في السكك..موّال جَسورْ
بِينوّر العتمة لنا ويبقى الدّليلْ !!

...سكة مَشاعْ
أحلامْ مَشاعْ
أحلامنا يمكنْ مُشْ لِنا !!
فينا جِياعْ...
فينا ضِباعْ...
والكل عابرْ زيِّنا !!
آدي اللي باعْ
وآدي اللي ضاعْ
الكل عابرْ مِنْ هِنا
الكل عابر من هنا!!!

[masreya]

بالطبع لا املك من الموهبة ما يجعلنى انقد
ولكن رايى كقارئة مجرد قارئة
رائع ماتسطرون
اعلن اعجابى بكلا القلمين
نحن نتابع بشغف
ولكن لم نكن نريد مقاطعتكم
وفقكم الله
اجمل تحية