بيان هام ..... ( لاتصدقون ) :)

[بوفهد]

بيان من منظمه قابليني وا قابلك


لوحظ في الأعوام السابقة استخدام طرق بدائية ومتخلفة وهمجية من قبل شبابنا وشاباتنا في مجال المغازلة وانخفاض معدل الترقيم عن المستوى الطبيعي وانخفاض قيمة فواتير الهاتف عن ما كانت عليه في الميزانية للعام السابق كل هذه العوامل ادت إلى توجيه إنذار شديد اللهجة من (( منظمة قابليني وأقابلك المتحدة ))
يحتوى على تهديد بالشطب من لائحة الدول المتقدمة في هذا المجال .

ونتيجة لذلك عقدت مؤتمرات دوليه لمحاولة تفادي هذه المشكلة وإيجاد حلول ناجعة وسهله الدهن …
وتم استضافه عده شخصيات هامه (( من عرابجة وحنشل ))
وخبراء في مجال الدواره في الاسواق
ومتخصصين في اساليب الترقيم
وكذلك عدّائي المسافات الطويله للاستفاده من خبراتهم في مجال الهروب من هيئه الامر بالمعروف والنهي عن المنكر…وبعد اجتماعات مطوله وبدون تغطيه اعلاميه حيث وضعت مصائد خاصه للصحفيين للحيلوله دون وصولهم الى مقر الاجتماعات وبعد نقاشات حاميه تم اصدار البيان التالي:

أيها الشاب الداج …أيها الشاب المستدلخ الى متى وأنت تستخدم الأساليب القديمة …إلى متى؟؟
الى متى وانت مفشلنا قدام اوروبا والدول المتقدمة؟؟
آن الأوان الآن لكي تصبح شابا يواكب التطور التكنولوجي ويواكب الثورة المعلوماتية ..( يا ثور ).
.كل شئ تطور واصبح بطرق سريعه وديناميكية. والمغازلة وأساليبها تطورت أيضا (( مع الخيل يا شقراء ))..:ونظرا لتدني مستواك فقد قمنا بوضع بعض الخطوات لك تضعك على الطريق الصحيح لكي تصبح مغزلجيا محترفا ….عليك اتباعها حرفيا ولا تحيد عنها قيد أنمله .. (( ما طحت على كلمه أنمله إلا بعد الموت ))..وفي حاله مخالفتك للاوامر فكل تبن وانثبر وأترك غيرك يلقط رزقه . . .

*** ما يجب عليك فعله قبل ان تتوجة الى المقناص :

1/ تروح للحلاق…
مهوب أي حلاق من الهنود اللي يحلقونك بخمسه ريال…روح للحلاقين الغاليين ابو عشرين وخمسه وعشرين ريال من هاللبنانيين ولا الأتراك…
واول شئ خلهم يصنفرون وجهك بليفه مطبخ انت وحب الشاب اللي مالي وجهك

ثم يضبطون الشنب على شكل رقم ثمانيه,,,لامانع من بعض احمر البراطم الخفيف وبعض من المكياج (( تراها الموضه قسما بالله ))…
.واذا الدقن مهوب مضبوط خله يفغص لك سكسوكه باي شكل
2/ تلبس لك ثوب من هذا اللي يتعطف بسرعه …
والله مدري وش اسم القماش …..الظاهر اسمه تترون….!!
…ولا زم يكون ضيق شوي…يعني مرسوم على جسمك..
عقال مقاس 52 سنتيمتر مكعب .
.شماغ ملكي صابين عليه علبتين نشاء حق الكوي …علشان تضبط الكشخه وعندك خيارين يا ان الشماغ يكون بمرزام او بدون مرزام…اللي يصلح لك.(( ما يمديك تتصل بصديق ))
3/ شوف لا تكون قديم وتكتب اسمك في ورقه قاطعها من بكت دخان ولا فاتوره تلفون.وواكب العصر يالووح…
.روح واطبع لك كم كرت عليه صوره قلب احمر ولا منظر غروب الشمس…… عليه اسمك …(( اسمك الفني طبعا ))وجوالك (( شوف رقم جوالك مهوب رقم البيت…تراى علمتك ))..ولامانع من بيت شعر كذا على ذوقك (( يبين انك رومانسي ))

4/ صب على عمرك قاروره عطر…واذا كنت مستعجل ولا امداك تحط عطر…ملطف الجو يقضي بالغرض .

5/ علم واحد من اخوياك يدهرك اتصالات وانت في السوق ..يعني لزوم الكشخه والـvip .

6/ اياني واياك تروح للسوق على الكورلا حقتك…
انت تبي تفضحنا..؟؟.
.رح لواحد من اخوياك عيال النعمه وخذ سيارته وياحبذا لو تكون ..كامري ((واحد اقصى طموحة كامري ))
لالالا تصدق…. شف لك شبح ولا كابرس اللي لا يمكن ان نعيش بدونه.

**** ما يجب عليك فعلة وانت داخل محميّة الصيد (( السوق يعني )) :

1/ خلك ثقيل وبيّن للي حولك انك على نياتك …يعني سو فيها عبيط…لاتثير الشكوك حول نفسك تقعد تطالع في اللي رايحه واللي جايه ..اسفطهم كلهم .

2/ رح لاي محل يبيع حاجات رخيصه (( ادري انك مطفر )) واشتر لك شئ وحطه في كيس..يعننك تتقضى…لزوم الهيئه اذا طبوا عليك.

3/خلك ماسك الجوال في يدك ..بحيث يكون ظاهرا للعيان (( ذبحتنا هالمظاهر ))..واذا معك سماعه حطها في اذانك.واقعد بربس حتى لو ما فيه احد يكلمك.

4/اجلس وزع ابتسامات هنا وهناك . اللي تعرفه واللي ماتعرفه
وزع....... وزع...... لا تبخل على احد واذا شفت لك طفل امطخه على جبهته ببوسه (( هذا يدل على انك بركان من الحنان )). واذا مالقيت طفل من هالحمران اقرب طفل
5/اياني واياك تطفى زقارتك .
.ابي اشوف الدخنه في كل مكان ابي اجراس الحريق شغاله.
ولاهوب أي نوع من التتن فيه انواع رايقه مثل دنهل ولاّ دوفيدوف…
المارلبورو موضه قديمه وفيه انواع بالنعناع والقرفه (( الله يقرفك ))

6/ عندما تشاهد الفريسه انشب في حلقها..ولاتخليها تغيب عن عينك دقيقه واذا حسيت انك بتضيعها ركز على لون الشنطه او لون الجزمه .

7/ في حاله وجود وحوش مفترسه اخرى تزاحمك على الفريسه توجه الى اقرب سيكيورتي .

8/ اذا لم تعطيك الفريسه وجه , لا تستسلم استخدم جميع طرق قطه الوجه والملحجة حتى لو ضربتك بجزمتها على راسك فيجب عليك ان تعطيها خدك لكي تطبع عليه ماركه الجزمه.(( بهذه الطريقه تعرف الفريسه انك راعي نفس طوييل ولا منك فكّه ))

9/ اذا رفضت الفريسه ان تأخذ الرقم ما عليك إلا ان تحشر الرقم بين القراطيس اللي في يدها ثم اطلق ساقيك للريح .

**** ما يجب عليك فعلة بعد ان قمت بالجربعه (( يجربع يعني )) :

اخرج فورا من السوق بلا تردد او انتظار …وسنتر عند التلفون اربع وعشرين ساعه…(( يالوح أنا ماقلت لك لا ترقم بتلفون البيت…. قلت لك الجوال ))
***بيان موجه الى الشابات الداجات :..

ايتها الفتاه الداجه.
.عليك بوضع خمسه لتر من اقوى العطور ذات الروائح الشفّاطه (( من شفط ..يشفط……فهو شفاط ))
ولبس العباءه المخصره التي تبرز مفاتنك.
.ووضع خمار اسود شفاف جدا بحيث يستطيع من يطالع فيك ان يعرف العدسات اللي انتي مركبتها اخضر فاتح ولا غامق ..!!! (( يا كاثرين ريتا جونز )).. …
وضع كل ماتطاله يداك من المكياج على خشتك بأي لون اخضر …احمر… برتقالي…. طحلبي أي شئ..اهم شئ ماتكونين ابيض واسود

ننصحك بعلك ابو سهم وعليك بعلكه بطريقه تظهر صوتا ولا مانع من ان تنفخي لك نفيخه لكي تنفجر بصوت مسموع وذلك يعني (( نحن هنا….لاحظونا )).

.تمنع الشباشب والاحذيه الماسحه ..الكعب الكعب الكعب ..ولن ارضى بغير الكعب بديلا.

عليك بتسبيل عينيك (( جعلها العمى )) كل ماطالع فيك شاب داج مثلك .

..ثم اديري له ظهرك ..(( اشكل يعني ))…

وبين الفينه والفينه عطيه نظره خطافيه على السريع لكي يعلم انك معه على الخط …

ثم شحططيه وراك في جميع ارجاء السوق .

في حاله عدم اعجابك بمن يطاردونك

(( شوفي لك اقرب ليموزين وانقلعي لمحميه أخرى ))

[ســـراب]

يمه ياكثر نصائحك اعتقد نصائح عام 2003
بس بصراحه تظحك والشاطر الي يتبعها بس عندي
سوال الي ماعنده سوق وين يروح (بايعتها)
اختك...ســـــراب

[بوفهد]

سلالالالالالالالالالام

الأخت سراب ...

هههه نصايح 2003 ...عشان كذا استخدم الكود Y3K لبعض شغلاتي ( ولاتسأليني وشهي هالشغلات )

أقول ...اللي ماعندها ( أو ماتقدر تروح للسوق ) النت ماخلت شي ... ههه يالله من فضلك الحين الواحد يروح بره بس عشان مايقولون الناس انه معقد والا فيه شي ...والا كان مالقيتي أحد بالشوارع والا بالسوقه ( جمع تكسير للسوق ..وهذي من عند أمي )

بس تدرين وشلون ...أقول رجمي ( حذفي حصى ) على اللي جنبكم يمكن يكون أزيم من هالخشش اللي قريتي عنها ...

لاتقولين قلت .....ترى مالي شغل

والسلام ختام