حبيت قبلك

[محمد ت]

حبيت قبلك

إلى إ.

حبيت قبلك يا حلوتي كتير...وبفصول حبي بترخ سنيني

قلبي بتعرفيه فاق عا بكير...من خلقت بالحلوين ضانيني

ساعة عرفت الحب كنت زغير..وطفولتي بالحب مسكوني

وكبرت ما في بالقلب تغيير..دوم بعيون الحور شاقيني

متعود برفة رموش يطير...وما عاد يهدا ولا يهديني

السمر إلهن عالقلب تأمير..والشقر إلهن عالقلب موني

وما في حلو بهالمدى الكبير..إلا تمنيت سكنو جفوني

ولو ينزرع درب الحلو مسامير..ولو بتسكرو سيوف مسنوني

بمشي عادربو ما إلي تأخير..عيونو على دربو بيمشوني

حبيت قبلك يا حلوتي كتير..قبلك خمرة الحب سقيوني

وكل كاس وفي إلو تأثير...وكل حب بالصدر ياقوني

وإنتي الخمر مكرر التقطير..إنتي مواسم عمر مخزوني

انتي الرسم من قبل هالتحبير..انتي الربيع بعود تشريني

فكرة قبل ما يخلق التعبير....ونغمة ال بالأوتارمكنوني

حب اللي صار وحب عم بيصير ..وحب اللي راح بيصير يا عيوني

انتي اللي حبيتا زغير كبير.....ووين اللي كان الحب بتكوني