سياسة النجاح بالبرشام.......

[moataz]

فى الاول احب اسأل مين منكم ممرش بالظروف دى؟
اكيد الاغلبية مر بيها ولو فى اى مرحلة من التعليم
الحكاية ان تعليمنا نفسى اعرف اية الغلط فية ، احنا الاغبيا ولا الكتب اللى صعبة ، من واحنا صغيرين تلاقى الكتاب مليان فوق 100 ورقة وقال اية لازم تحفط عشان الامتحان
باختصار شديد جدا سياسة التعليم هنا تعتمد على انك تحفظ طول السنة وفى الامتحان تخرج كل اللى حفظتة مع انك مش فاهمة ، انا بشبة التعليم انة عامل زى ازازة المية اللى عمال تملاها فى مية لحد اخرها وتيجى بعد كدة تفضيها هل اصبح لها فايدة مظنش بقت فاضية يعنى خلاص انتهت ، ولازم تملاها تانى ودة زية زى تعليمنا كل سنة تتملى وتفضى وتتملى وتفضى وهكذا طول فترة التعليم ....
طيب سؤال وجية هنا لية المناهج متتطورش ؟
سؤالى هنا لانى اكتشفت ان الطلبة بيتعلموا لحد دلوقتى ان جو مصر حار جاف صيفاً دفئ ممطر شتاءاً
بذمتكو مش الجو اتغير ولا المسئولين مش حاسين عشان قاعدين فى التكيف..........ممكن
اقولكو على مهزلة تانية اكيد كتير منكم فى جامعات
لما كنا فى الكلية فى احد السكاشن واسمة سكشن الكيمياء الحيوية ، السكشن دة مليان معادلات ورموز ومخططات ومش عارف مين كان بيفهم الموضوع دة ، والله حتى المعيد اللى كان بيشرح كان بينقل من ورقة طول السكشن وفى الاخر يقول احفظو الكلام دة جاى فى الامتحان ....يا اخى انت بتنقل عايزنا احنا نحفظ ............حاجة غريبة ....
اليابانيين اول حاجة بيعملوها لتعليم الطفل انهم يعلموة الابتكار مش الحفظ زى الحمار ...وعشان كدة بيتقدموا
انا عرفت اية سبب التأخر اللى احنا فية ....مش الفول دة طلع التعليم وطريقتة اللى تهدم تفكير اى حد
هما من الاخر عايزينك تنجح بالبرشام وبس و بعد كدة تطلع بعد 15 سنة تعليم ابيض يا ورد