اضحك مع الشعر(^ّّ_^)

[على رسلك]

سواق تاكسي


حبيبتي تشرب علـى الريـق ببسـي

واليا تعشّت ماكلـت غيـر كتكـات

حبيبتي حطّت علـى العيـن ورْسـي

وماتلبس الا مـن جديـد الموديـلات

نحيفة(ن) عـن كـل عـذرا تنّسـي

في حسنهـا قـد كلْبشتْنـي كلبشـات

احبهـا بـس الـعـرب ماتحـسّـي

والله يعيـن المبتلـي بالطـويـلات

ياونتّـي ونّـات ســوّاق تكـسـي

زل النهار وماحصـل لـه ريـالات

والا مريض(ن) علّتـه شـي نفسـي

مافاد بـه كـي العـرب والقـراءات

لاشفتها كنّـي مصـاب(ن) ابمسّـي

مثل المهبّـل قمـت اقطّـع إشـارات

وليا حكت كنّي من النـاس خرسـي

أطرش .. خرس .. لو دوّسنّه تريلات

فيها حلا الأسبان وعطـر الفرنسـي

وفيها دلع لبنـان وعـز الإمـارات

حلوه مثل طعم الكـرز والجالكسـي

مخلوط بالسكّر معه خمـس تمـرات

لوما تزوج (عجرم) وجاب (نانسـي)

يحق لي أتـزوج ( أبـلا عطيّـات)

لاقلت : شكراً ، قالت البنت : مرسي

بنت الأفندي ناظرت لـي بغمـزات

يجلدني الاستـاذ لااهملـت درسـي

مايـدري أنـي واقـع(ن) بالبنيّـات

ابكي واقول ان البلا كـان ضرسـي

يااستـاذ تكفـى لاتنقّـص علامـات

انا وقعت اليوم مـن فـوق كرسـي

ولاحصل لي مـن حبيبـي زيـارات

قالت: أنا ليلى ، وبسمّيـك : قيسـي

عطني شعر واعطيك ضحكه وبسمات

قالت: تجي لابـوي ثـمّ(ن) تمسّـي

بس المهر تاقـف عليّـا خفـارات!

قلت: اسمحي لي واعلنـي بـالmbc

تلقيـن غيـري يابنيّـه حـثـالات

يشهد علـى ماقـول بيتـر وعبسـي

ونحّول ونامق بالرسـم والحراكـات

اليا حضرتوا يالربـع يـوم عرسـي

عانيّتـي منكـم كراتيـن كتـكـات