قصيدةٌ عراقيه..

[محمد العاني]

روحي من تسمع ضحكتج..
تنكسر وتفيض عيني
سامحيني،،
ومن احط راسي اعلا متنج
يسمع الميت ونيني
سامحيني
من يثور الهوى بكلبي
وينتفض يصرخ حنيني انا كل ايامي صعبه. .
انا دمعه..انا لوعه.. انا غربه
انا ياسمره عراقي
وحزني مكتوب بجبيني
سامحيني
سامحيني..
الدنيا من غيرك..ضياع وماكو ملفه
والثلج لو حصر عمري،،
بس اشوفك كلي ادفه.. والله ادفه،، سامحيني
جروح كلبي،، جروح كلفه
.. شما تلولين اعله روحي
تبقه عيني بعينك..وماترضه تغفه..
وشلون اغفه..وانا ذاك انا لغريب الماكعد وياه حظه..
ولاضحك وياه صدفه..
لاقطار يواسي صبره ..
ولامحطات التعرفه..
سامحيني ،،
من اذوب ابسمت،، لان روحي ترف
.سامحيني،، الشوك خلاني لخيالك..صاحب،،وظل وجدم
ومن يلف الليل رمشك امشي ازورك بالحلم ..
سامحيني...من اشوف اطفال شعبي الجوع ذابحها..انهظم
دموعهم تكتل ظحكتي شلون ترديني ابتسم
سامحيني من تروح الروح يمهم..
وابقه يمك بس جسم.. مااكلك شنهي طبعي
ولا اكلك شنهي دمعي،، بس اكللك..عراقي..وانتي
فسريلي الاسم..
سامحيني ...... سامحيني
بيج اشمن ريحت اهلي وتنزل دموعي مزن
وانكسر جن عود يابس
مارحم بيه الزمن سامحيني من اغنيلج قصيده بكلبي خنكتها المحن
سامحيني
ومن اسولفلج سوالف
كلها الام وشجن..
سامحيني
من اشوف الناس،، كل الناس غربا
وانتي اشوفنج وطن