منشق ... يسولف ... لاتلومونه .... (((((:

[المنشق]

سلااااااااااااااااام...
شوفو انا انسان فاضي ومسكت معي غلط الا اكتب موضوع >>بعدماجيت من السفر (بعلمكم اني سافرت)بعدين انا انسان من هواياتي السياحه وقلت ياولد ليه ماتروح تتسيح دامك فاضي . صح اني مطفر بس الله يخلي السلف من عند ذا الف ومن عند ذاك الفين ومنى خمسميه ومناك ميتين تجمعها على بعض تصير ولد نعمه لمده يومين المهم وانا جالس اليوم في الشات قلت خل اسلم على الناس الغاليه والله لقيت ناس اغلى من الغلا ( راضع مع مصاريه) والله واسلم عليهم وانا متشقق من الوناسه ..خلاص خلصت ذي السالفه ..نخش في سالفه ثانيه
مره قريت موضوع عن شطب واحد ..والله اني انقهرت ابي اعرف وش كتب بس انا واثق انهم ماشاتوه الا على شي يستاهل المهم الله يستر عليه وانا فكرت اتميلح بموضوع شبيه له ويوم شفت اللي صار معه قلت لنفسي ياولد انثبر واقضب ارضك وخل عنك الفلسفه الزايده . والله درس موب صاحي المهم نخش في سالفه ثانيه .. فكرت ثم فكرت وش اكتب طلع مافي راسي موضوع قلت ياولد اقعد بربس على كيفك وقلت خل اقولكم قصه صارت مع واحد من الشباب ايام الثنوي (موب انا ) القصه هذي قد علمت واحد في الشات وقعد يتريق على .. نخش في القصه ..
مره من المرات وانا في المدرسه ايام المطور كان عندي حصه فراغ وقاعد اتسرمح في المدرسه انا واثنين معي وطلعنا الدور الثالث وكل مامرينا من عند فصل لقيناه فاضي المهم مرينا من عند الفصل الاول وتعديناه وكان فاضي ومرينا من عند الثاني وكان فاضي وقبل امر من عند الثالث قلت ياولد خل نستهبل وقبل نوصل عند الباب نطيت انا ذيك النطه واقلب على الارض ويصير نصي داخل الفصل والنص الثاني برا ورافع يدي وماسك القلم على انه مسدس ويوم رفعت راسي الا الفصل مليان طلبه يختبرون والمدرس يراقب عليهم . عاد انا طاح وجهي وماقدرت اسوي شي واللي معي يضحكون ويقول المدرس وش فيك انهبلت انت عاد انا قمت وانصى الدرج واعط وهو يزهمني تعال ياولد بس هين ارد واطق اللطمه وامشي مليون مع الدرج .. انتهت القصه ..
نخش في سالفه جديده .. هذي قصه ثانيه قسم بالله انه موب انا هذا واحد من الطلبه كان معي في الفصل في نفس السنه ونفس المدرسه . المهم كان عندنا مدرس فيزيا مصري ماودي اقول انه ملعون والدين عشان حرام اللعن المهم المدرس سئل سؤال ومحد عرفه من الفصل الا واحد من اخويانا ومن الحماس رفع اصبعه وقال انا( يمه) عاد انا فهقت من الضحك ويجي المصري ويرز وجهه عند وجه الطالب ويقوله امك بتدرس فيزيا ياله..الطالب ضيع مايدري وش يقول ضاعت علومه اخر شي جاوب غلط ....... انتهت القصه.
نعطيكم سالفه اخيره اسمعو بس او اقرو عشان اللي بيستخف دمه ..
هذي الله يسلمكم مره من المرات كنا في جده انا وكم واحد معي في عطله ربيع وكانت ايام حافله بالنكبات منها ... مره رحنا الحمرا سنتر محل اللي يأجرون الدبابات والله وكل واحد منا ياخذ دباب عاد انا احب اتفلسف وخاصه يوم اجي مسرع والهواء يلعب في شعري ( قطعني عند ذي الحركه ) والله بينما انا ادور الا واقز مجموعه من البنات جالسات والله انهم عاقلات بس الشيطان قالي ياولد بدع عندهم يمكن تعجب فيك وحده والله واجيك ماغط من حولهم بالدباب وقلت خل افحط ( يلعن ام الاسلوب) المهم اول مره فحطت طلعت ماش التفحيطه ماعجبتني قلت خل اسوي وحده احسن منها والله واروح اخر الميدان واجيك من هناك ماشي مليون .والف الدركسون واحضر انا والدباب عند اللي يبيع البليه واصفط عدته كلها ويتسلك ضهري ويصفقني راعي البليله واعطيه الخساير واروح انثبر في السياره وانا مسلخ .. وهذي قصه ثانيه قسم بالله صارت بعدها بيومين يمكن بس ذي المره مالي دخل كان بطل القصه واحد من الشباب الله يذكره بالخير رحت انا وهو ومعنا اثنين على البلو لاقون اللي قبل بحيره القطار وقلنا خل نستاجر قارب ويوم رحنا شفنا القوارب ونشوف عندها اشياء زي السيكل وقلت خل نجرب السياكل يمكن تكون اسرع واصرف وكل واحد ياخذ له سيكل ونتسابق وقالو يالله ويوم خذينا السياكل ونروح نتسابق الا والله انها بطيئه مره ومتعبه . والشباب اللي معنا واحد منهم وقف السيكل حقه وركب مع الثاني وقلت لخوي اللي معي ليه مانسوي زيهم والله واركب معه ونروح نسابقهم بس هم سريعين مره ومعهم كاسه يعبونه مويه من البحيره ويرشونا بها عاد خويي مسكت معه قال اسمع انا ابخربها وانط عليهم واغرقهم وانا قلتله كفو والله يفسخ الفنيله اللي عليه وكان لابس شورت ويوم قربنا منهم وينط ابو الشباب على راسه في المويه يحسبها عميقه المهم ويضرب في راسه في الارض ويتعبى شعره تراب ويوم قام على ارجوله الا المويه والله ماتوصل الا عند ركبته مره قليله بس من وساختها الواحد مايشوف الارض ويحسبها عميقه وقسم بالله اني من كثر ماضحكت اني حضرت في المويه وشربت يمكن جيلون وربع .. وسلامتكم . هذا اللي عندي الحين وانشاء الله اكتبلكم غيرها .. والله يجمعنا معكم على خير

[قمشطيط]

هه

[Hadia]

مسكين يالمنشق هذا كله صار لك
بس ليش كل شوي تقول
موب انا
خايف نفضحك؟؟
اعترف بسرعة
هادية الشريرة

[muhajer]

الاخ منشق :
لعنبوا دارك قصيمي وفسقان كخخخخخخ امزح امل منك المزيد. وشكرا