شرق وغرب ...مع التحية

[بوفهد]

بحكم معيشتي في بيئه مهجنه بين الحجاز ونجد لفت انتباهي الفرق بين الشاب النجدي والحجازي.وطبعافرق واضح انامن رايي يشوفه الاعمى.تستخدم العباره للمبالغه كفرق الثرى عن الثريا وكفرق السما عن الارض.وكلهم طبعا فيهم الخير ماننقص من قدراحد. وهذي الفروق لها اسبابها الوجيهه من وجهه نظري المتواضعه . وهي من سته نواحي:
.الرومانسيه. لغه العيون. العلاقه بالاطفال. السريه والتعتيم. التواضع. الالفاظ.

*********************************************

اولا : الرومانسيه / مايختلف اثنين ان الحجازي اكثر رومانسيه من النجدي. هذي مافيها طقه عصى. دائما النجدي مايعبر عن الي في قلبه ويعتبر هذا ضعف. بس الحجازي اكثر وضوح واقل تعقيد من هالناحيه عني ممكن تشوف دموع الحجازي. بس النجدي يموت بس مايبكي. مع ان البكا ابدا مو ضعف هو تعبير عن شعور زيه زي الضحك.

ثانيا : لغه العيون / الكل يستخدمها بس الاختلاف في الغرض من استخدامه الشاب النجدي يستخدمها للتهديد والوعيد والبنت الي تبي تفهم قصدي تجرب تقول لابوها في حضره اخوها:ابوي خله يوديني للسوق.بعدين تشوف النظرات الرهيبه الي راح رسلها لها لاخو العزيزالي لويسلطها على جبل هدته <--- حشى ليزر ذي مو عيون.
بس الحجازي لا غييير حد عيونه التسبيل بس يعني يستخدمهااستخدام سلمي. والي يحد من استخدامهاانها غالبا تكون حمرى من التدخين(مايخفى عليكم ان التدخين منتشر في الحجاز اكثر من نجد) .

ثالثا. من ناحيه الاطفال / الحجازي يتحملهم يعني ممكن يسلم على عيال خواته كلهم. بس النجدي بيحب اثنين منهم والثالث بيصافحه الباقين بيطقهم. وعلشان تفهم الوضع قارن بين حالتين اذا نط الطفل وجر شماغك. الحجازي بيلحقه علشان يقرصه في خده ويضحك ويقول ايش الشقاوه هدي والنجدي بيلحقه بعد بس علشان يرفسه في بطنه ويصك به الجدار .

رابعا: من ناحيه السريه / يوووه والله الغموض الي فيه النجدي يوووه ماتدري وينه رايح وينه جاي. بيروح مشوار وجاي من شغلا لي. الف علامه استفهام على تنقلاته ليش ما ادري مع انه ممكن مايسوي شي غلط بس شعاره التعتيم الاعلامي قد مايقدر. تقول كنه اكبر همنا ياتشارلز على غفله لاتخاف ترى محد جابلك خبر) والدراسه يوووه ماتدري وينه واصل الوعد يوم التخرج بس وش مستواه هذي ولا الموساداليهودي يجيبها.

خامسا:التواضع / لا عاد هذي حكايتها حكايه. النجدي ذا فيه عنطزه ماادري وينه جايبها منه لاحظتها في خواني بس عجزت اقنعهم انهم مافيهم زود عن غيرهم. يعني شعب الله المختار. هو غير العالم ذا كله. طيب قله : ليش يقولك وهو يضخم صوته: لاني من نجد طيب والنعم بنجد ماقلنا شي بس تراها ماتتعدى صحرا كلها ضبان وجرابيع( ياهاواي على غفله) بس الحجازي لا بالرغم من انه عنده ميزه رهيبه وهي كونه هو والرسول صلى الله عليه وسلم من نفس المكان ومع ذلك تشوفه متواضع .

سادسا:الالفاظ / يوووووه حدث ولا حرج. النجدي يعني..غالبا..غالبا..اقول غالبا.. حطو تحت غالبا خمسه خطوط واحد منها احمرعلشان تنتبهون غالبا مايكون جلف اييه جلف بكل ماتعني الكلمه يعني ناديته يقولك هاه بغى يناديك يقول هيه مع ان الكلام ببلاش والملافظ سعد بس هذا الواقع. اذا تبي تلاحظ الي انا اقول احضر جلسه شباب يمونون على بعض ولاحظ كلمات عندهم وتريقه يقولونها عادي زي السلام عليكم بالرغم من انها تزعل الحجازي لو وجهت له وتخليه يقدم على نقل ويترك الديره كلها.

وتلاحظ انهم يتصيدون اخطاء بعض يعني ياويلك زل لسانك بكلمه خلاص مسكوها الشباب عاد اذا لاحظو انك انحرجت ماعاد نسوها ابد لا ويمكن ينادونك بها لا وفيه شي ملاحظ ما ادري انتم لاحظتوه ولا لا في مجالس شباب نجد يتكلمون كلهم بصوت عالي وفي نفس الوقت من الي يسمع ما ادري بس الحجازيين السلام بالدور والكلام بالدور لحظات الصمت موجوده. انا خبرتي في هالناحيه محدوده ماتتعدى جلسات اخواني وبعض اعمامي واخوالي بس الي عنده راي ثاني ولا فرق بين المجلسين ولا ملاحظه ياليت يضيفها هذا مما لاحظت وقرات وسمعت ..طيب سبب الاختلاف انا في رأيي سـببين :

الاول البيئه : البيئه الصحراويه والجمل تاثيرها غير بيئه الاوديه والغنم يعني احتكاك النجدي بالصحراء والجمل اثر فيه زي ما اثر احتكاك الحجازي بالاوديه والغنم. الصحراء وجفافها وقسوتها غير سهوله الوادي وخضاره. وترى الغنم غيير الجمل كثير الغنم يبيله سياسه في التعامل معه بس الجمل تنفع معه الجلافه. وكل هذا له تاثيره على الانسان ..

الثاني الاحتكاك : النجدي مجتمعه مغلق يعني مافيه احتكاك الا من نفس النوعيه علشان كذا زادت صفاته تاصل بس الحجازي مجتمعه مفتوح وكل سنه يرد عليه الكثير من البيئات والثقافات في الحج. وهذا اثر فيه وخلاه ياخذ منهم الزين والشين بس بما ان البقاء للاصلح فانا في رايي ان الزين اكثر.

واخيرا اقول ان النجدي والحجازي قطبين من اقطاب بلدناالحبيب الغالي علينا كثير .وكلهم والنعم فيهم هم ابوانا واخوانا الي اذااحتجنا لهم مايقصرون. بس ابي الي عنده راي ولا فكره طرحها سواء كانت مؤيده ولا معارضه. ولاتنسون اختلاف الراي لايفسد للود قضيه

[سامية51]

ما شاء الله عليك .تحليل ممتاز

[بوفهد]

الأخت سامية

( بالعامية ) زين فيه أحد عرف يقرا بين السطور

توقعت أن يهاجمني أحدهم ويتهمني بهذا أو ذاك !!!

تحياتي

[سامية51]

لا تتفأل كثيراً ، الله يعينك على المقبل .

بغيت احلل معك بس قلت ننتظر النتائج ونشوف حجم الخسائر

[mody.s.a]

مقارنه حلوه وجميله ..............
انا مثل ساميه ابنتضر النتائج

[بوفهد]

أحبتي

للآسف ( وكالعادة ) لم يحظى الموضوع بالإنتباة الكافي من إخواني رواد الخيمة ... وماأدري هل أنا السبب أو البعد عن المشاكل هو السبب الرئيسي
لكن الغريب ياسامية أن نفس الموضوع وبجميع تفاصيلة لقي كل التجاوب ( في موقع أخر هزلي حبتين ) وطبعا طاحوا فيني على حش ..الله لايوريك !!

أما مودي فحكايته حكاية ...معاهم معاهم عليهم عليهم ...

لاتنتظروا النتائج ...فكل يعرب البير وغطاه ( وعلى قولتك ياسامية ....خيمة تجيب الإكتئاب )

سلامتنا جميعا

[جاد]

بل اعجبنا الموضوع الى درجة كبيرة ولكن احيانا نقرأ ولا نتمكن من التعليق لضعف بديهاتنا فاصفح عن ***جاد***

[سامية51]

ابو فهد الموضوع حلوووووو وكنت ارغب في اضافة

واحمد ربك الي جت على كذا .

موضوع مثل هذا عادة يطلعون لك المتحاورين من الشاشات وانا اثرت السلامة

اقول هالكلام من خبرة

[الدكتورةعاشقة]

هلا بو فهد000
مقارنة رهييييييييييبة والله
وا اظن في احد راح يزعل من الحق اللي قلته000
الدكتووووووووورة عاشقة

[بوفهد]

السلام عليكم

أخي جاد

أحرجتني بتواضعك ..ولا أملك أن أقول إلا

مشكور حبيب قلبي نورت الخيمة

على دروب الخير نلتقي