ع اللى حصل لى يوم الأستفتاء ( رسالة لفارس ترجل )

[الجربوع44]

موضوع فارس



مساء الفل يا عم فارس

نفسى أحكيلك على اللى حصل لى فى يوم الأستفتا
قمت الصبح و قلت ياواد ياجربوع اجرى بسرعة على اقرب لجنة واثبت وجودك
ده انت بتجرى على 12 جربوع وامهم و لو مرحتش هينفخوك
وبالمرة تاخد لك حبة فياجرا تعدل بيها النسل شوية
12 جربوع مش كتير ..نزودهم شوية
الصحة تعبانةو متستحملشى جربوعين كمان
يبقى لازم حبة فياجرا
ربك و الحق انا قلت اعمل حركة ذكية
عملت ايه بقى ؟
رحت على اللجنة ودخلت ومعايا الورقة و بصيت شمال و يمين و اطمنت ان مفيش حد شايفنى غير ربنا و رحت كاتب لا وبسرعة رميت الورقة فى الصندوق

و خرجت أخدت حبة الفياحرا و على ام الجرابيع جرى
و أخدت الحباية
و بشرت ام الجرابيع بيوم مش هتحلم بيه
الولية انكسفت ومردتشى
وانا نشيت قدامها بتفاخر ولا عنتر ابن شداد
وع اللى حاصلى
مفيش داعى احكى بالتفاصيل بلاش فضايح
المهم
رجعت اللى ف بطنى و ناقلونى على المستشفى
وجت ام الجرابيع تزورنى
اول ما شفتها عينى منها جت ف الأرض

قالت لى ما تنكسفشى كده كفاية 12 جربوع صغير .. الصحة مش قد كده
اتمرعت وقلتلها اخرسى ياولية دحنا اللى دهنا الهوا دوكو

المهم ايه ياعم فارس مطولشى عليك ( قولى طول )
الولية قالتلى ايه :
يابوالجربيع أنت عملت ايه فى اللجنة
قلتلها : ليه يا ولية
قالت : اصل كان فيه كام كلب فى الحارة عندنا بيشمشموا فقلت أكيد الجربوع عمل حاجة
بينى و بينك يا عم فارس قلبى وقع فى ركبى قلت لها:
كتبت لا
قالت : ليلتك طين دول الحكومة و يعرفوا كل حاجة قوم فز قبل اليوم مايخلص و روح غير الورقة و قلهم انك غلط ومتقصدشى هتودينا ف داهية
جريت بسرعة و ألفت كلمتين ف راسى عشان ادخل عليهم بالحنجل و المنجل و اخدهم ف دوكة و حبتين فهلوة و اصلح اللى عملته ( بلا نيلة قال هعمل فيها اسد....دى الأسود بتموت و الجربيع هى اللى بتعيش )

دخلت على مدير اللجنة و صرخت ف وشه و قلت :
منك لله منك لله
قال : مالك فيه ايه
قلت : ده فصل تعملوا فيه ؟ تدينى فياجرا و تعمل فيه كده
قال : معلهش وزارة السكان هى صاحبة الأختراع المهبب ده قالوا لازم نستغل الأستفتاء و نسيطر على الأنفجار السكانى
عيط و بكيت و لطمت على وشى وقلت : يالهوى يالهوى يعنى ايه هى الحباية دى اييييييييييييه ؟
فال : انت عندك كام جربوع
قلت : ف وش العدو 12
فال : ابقى تف على و شى لو جبت الـ 13
اااااااه يامة الجربوع باظ يامة الجربوع انكسر يامه

اتلم الناس عليا و صبرونى و فجأة دخل اللواء اللى بيفتش على نظام اللجان وشخط و قال : فيه ايه
قلت : ابدا يا سيدى كنت غلط فى الورقة و لما افتكرت جيت أصلحها
فال : انت الحمار اللى كتب لا
قلت : سامحنى ياباشا مش هعمل كده نانى
راح ماسك ودنى و شدها وقال :
خلاص ياحمار
دى آخر مرة و متكررهاش
يالا روح احنا صلحنهالك خلاص