يوميات زوج معددّ .................................!!!!!!!!

[المتأمل]

.............................................


( 3 )

الخطبة , والفروقات الإجتماعية ..!!


.............................................


لمّا كنت حددت أسبوع واحد لرؤية البنات المرشحات للخطبة وإللي تنطبق عليهم شروطي ( !!! ) ... , وجدت الوقت بيمضي ولا قدرت أوصل لواحدة تناسبني وأناسبها ..

وفي آخر لحظة .. خطرت على بالي واحدة صغنونة شفتها في مناسبة هناك , قلت أروح أجرب حظي معاها ... تمت الأمور بسرعة غريبة وتوفيق أغرب ..!! .. وعجبتني بنت الناس الطيبة .. ذات الستة عشر ربيعا .. يعني .. وبحسبة بسيطة نلاقي إنه عمري بالضبط ضعف عمرها ..!! .. والغريب إني عجبتها ...

وبعد الرؤية والدردشة إللي طولت أكثر من اللازم .. قلنا نتوكل على الله ونتكّلم مع الرجال .. لقيت أخوانّا مشكلين لي مجلس كونسلتو ( إستشاري ) من الأب والأرحام والعدلاء علشان يقابلوا السعودي إللي جاء يخطب بنتهم .. وبدأت تمطرني الأسئلة إللي كنت خايف منها :

س - ليش بدك تتجوز على المدام .؟؟ . هي مريضة .. ؟؟ .. ماتجيب ولاد ..؟؟

ج - لا .. والله بنت الناس ماقصرت .. طيبة وبصحة وعافية , وجابت لي أربعة ولاد .. لكني عاوز أعدد ..

س - وين حاتسكّن البنت إذا صار نصيب .؟؟ .. لا يكون مع المدام ..؟؟

ج - البنت حاتسكن لوحدها وفي شقة خاصة بيها ..

س - .........؟؟؟

ج - ....................

واستمرت لجنة التحقيق والمساءلة إلين ما أقتنعوا بإنو العريس المحترم ماهو ناوي يودي بنتهم في داهية .. ودخلنا في المهر وما يطلبه المستمعون .. - عفوا قصدي المتسائلون - من أهل العروسة .. والحقيقة إنهم طلبوا مبلغ محترم للمقدم والمؤخر ... وشقة أشتريها لها هناك قريب من أهلها ..!!

وراح فكري في بنت الناس زوجتي السعودية , إللي أتجوزتها بدون ما نتكلم في المهر مع أهلها ..

- إللي تجيبوا , نحن بنشتري رجّال ..

طيب وبعدين ..؟؟؟ .. أخوكم حدد مهر معقول يساوي مهر السعودية وعليها تكاليف الزواج والذي منّه ..!! .. أما الشقة فلا يمكن أوافق ... هي حاتسكن عندي ولا عندكم ..؟؟؟ .. وبعد مفاوضات متعثرة .. وتشبث مني وتشبث منهم , جات في بالي فكرة غريبة وجريئة :

- قلت لهم : أستشيروا العروسة ... ( طبعا جاء في بالي إني إذا عجبتها لابد يكون موقفها مختلف ..!! )

راح والدها الطيب وسألها , وكانت المفاجأة إللي تقول إنو العروسة موافقة على إللي أقدمه .. كانت هي الخيرة ولله الحمد .. , تمت إجراءات الخطبة وعقد القران الصوري ( مايصير تعمل عقد قران رسمي بدون تصريح من الداخلية السعودية ) ..

والحقيقة أنا كنت حريص إني أعقد القران علشان آخذ راحتي من البداية , هوّ زواج ولاّ لعب عيال على قول أخونا المصريين ..

طبعا طلبت إن الحفلة البسيطة تكون ماهي مختلطة , ووافقوا على طول ... حفلة الرجال لازم نعمل مولد ... كدة قال أبو العروسة ..

- مولد إيه ياعم .. لا يسمعك المشايخ عندنا بعدين يزعلوا منك ..

أتضح إنو المولد إللي يقصدوه هو نوع من الأناشيد الدينية في مدح الرسول عليه الصلاة والسلام .. ومدح العروسين .. وشوية ذكر لطيف وماعليه غبار ... بعد التأكد قلت لهم أتكلوا على الله وربنا بجيب الطيب ...

الحقيقة .. وأنا في الحفل سرحت بعيد عنهم وعن العروسة .. في أفكار غريبة ..

- إيش الوضع دا إللي جيت بنفسك ليه ..؟؟ .. طيب إنت تقدر تتلائم مع عادات هادولا الناس إللي من أولها واضح بعد عاداتهم عنك وعن مجتمعك ...؟؟

- طيب وبنت الناس هادي إللي حاتدخل حياتك وهي لسة مغمضة , وماتعرف إيش إللي وراها وإللي قدامها كيف حاتخليها تحبك وتحافظ عليك زي ما إنت تحافظ عليها ..؟؟

تبغوا الصراحة , خفت من الفروقات الإجتماعية الكبيرة إللي شفتها للآن , وأكيد ماخفي كان أعظم ..!! .. لكني أتذكرت إن الأشياء إللي تجمعنا برضة كبيرة .. الإسلام وخاصة إنها كانت قريبة من الدين بشكل معقول ... تتحجب الحجاب العادي .. لدرجة إنها لما جيت أشوفها رفضت في البداية تخلعه وتوريني شعرها ... إلين ما أقنعتها إنو من حقي أشوف إللي يدفعني للزواج منها ..

وبرضة , أتذكرت الآية القرآنية الشريفة ( .. إنّا جعلناكم شعوبا وقبائل لتعارفوا .. ) .. والزواج أكيد من الأشياء إللي تخلي الناس يتقاربوا ويتعارفوا أكثر .. وهذا الرسول عليه الصلاة والسلام عقد على أم المؤمنين ماريا القبطية رغم إختلاف المكان والعادات واللغة ..

أخيرا صحيت من أفكاري الشاردة على صوت المأذون وهو يبدأ إجراءات العقد .. وقلت في نفسي الله يجعله خير علي وعلى حياتي القادمة ...

عزمت في نفسي إني أحط خطة لكسب قلب بنت الناس الشامية , لإن الحب هو أحسن طريق للتوفيق بين الزوجين .. وكانت أساسيات هذه الخطة إني أخطف رجلي كل كام أسبوع لعندهم علشان أقرب المسافة بيننا .. وكمان بصراحة علشان أنبسط أكثر وأكثر .. يعني على قول أهل مكة الطيبين ( حج وبيع سبح .. ) .

وسلامتكم , إنتو وكل واحد ناوي يعدد .. , وكل عام والجميع بألف خير .

المتأمل .